İron çı Əfğanıstoni sulh muzakirəon nəticə mısbət zıneydə. 

İroni xarıci vəzarətxonə ğərbi Asiya mudir Rəsul İslami ki bənə nımoyəndə İroni tərəfo Moskva sulh muzakirəonədə iştirokış karde bə ım muzakirəon nəticə umdəvoe. 

Əv təkidış karde: Moskvaədə sulh muzakirəon vey muhimmə sıviyyədə dəvom kardedə və çəy dılədə Əfğanıstoni sulh aliyə şura nımoyəndəon, Taleban və məntəğə iyən hamsuyə kişvəronku nımoyəndəon iştirok kardedən çən çı əhəmmiyət co dəvardə muzakirəonku vey ziyode. 

Zinə şəv həminə muzakirəon kənoədə Pakistoni xarıci vəzarətxonə sıxənəvot Muhəmməd Feysəl həm bə Əfğanıstoni əmniyyəti siyasi roy iyən məntəğəiyə cəhdon vasitə təmin karde təkidış ka. 

Xəbə ome zinə Moskvaədə Əfğanıstoni sulh aliyə şura heyət və Talebani nımoyəndəon de yande vindemon və canqi bə oxorosniyə iyən sulhi çoknə bərpo karde barədə sohbət kardışone. 

Moskvaədə Əfğanıstoni sulh muzakirəon de İron, Rusiyə, Əfğanıston, Çin, Pakiston, Hındostan, Ğəzaxıston, Tacikiston, Ğırxizıston, Ozbəkiston və Tırkmənistoniku nımoyəndəon iştirok zinə bino bıə. Amerkə həm ıştə səfarətxonə qıləy koşınasonış bə ım iclos vığande. 

Moskvaədə Əfğanıstoni sulh muzakirəon qıləy şərayetədə bino bıə ki bə Əfğanıstoni çand qılə viloyəton çı Talebani hımlə hejo dəvom kardedə. Helmən viloyətədə həm 13 nəfər çı Talebani uzvon kıştə bıən. 

Əfğanıstoni milli yolə koalisiya həm tojədən elanış karde ki omə prezidentəti səçınədə qıləy vahid nomzədi elan bəkay.