Fransə səfiri iddio barədə İroni reaksiya; Paris bəpe cəvob bıdə.
İroni xarıci vəziri siyasi muavin təkidış karde: əqə İroni ətomiyə fəaliyəti barədə Fransə səfiri tojə sohbəton çı Fransə dıvləti rəsmi nəzər bıbu ım məsələ ətomiyə sazışi ləğv karde mənodəy.
Seyad Əbbas İrağçi votışe: Fransə dıvlət rə bəpe ım mıvzo barədə reaksiyaş bıbu iyən ojə-oşko ıştə nəzəri elan bıkə ta İron həm mınosibə reaksiyaonış bıbu.
Amerkədə Fransə səfir tojədən ideoş karde ətomiyə sazışi zəmoni təmom bey bəpeştə İronədə urani ijən qəncin karde lozim ni; və hol ım ki ım sazışi bəpeştə rəsmən de Əmniyyət Şura ğətnomə bərobər İroni ətomiyə həx-huğuğ təsdiğ bıə.
Co tərəf ətom enerji beynəl xalğ təşkilat həm detosə bə ısət 14 kərə İroni bə ətomiyə saziş bəfodor mande elanış karde.
Amerkədə bıə Fransə səfiri ım ideo bəpeştə İronədə Fransə səfiri vanq kardışone və rəsmən ım sohbəton barədə İroni etıroz bə Fransə dıvlət elan bıə.
Tehronədə Fransə tojə səfir Filip Tiye Bo İroni xarıci vəzarətxonədə hozzo peydo karde faxti ijən bə ətomiyə sazışi həmmə baxşon icrakarde təkidış ka.
Im ideo qılə holədəy ki İroni xarıci vəzir Muhəmməd Cəvad Zərif tojədən ətomiyə təvafuği çərçivədə bə Avropa qiədə bıə məsoliyət iyən vəzifə işorəş karde və votışe: İron karde ni bəzne çımiku vey Avropa ğərolon intizorədə bıbu iyən mətəl be mando.
Əv elanış karde: bə NPT, ətomiyə saziş və 2231 nomo ğətnomə əsos hiç faxt İronədə urani qəncin kaarde məhdod ni bəbe.
