İroni sıə xəttonku dəvarde əbı ni.

İroni sepah təşkilati fərmondə votışe: deşmən əqə qədə hərəkəton fikədə həm bıbu sıftəku əy be təsir bəkamon.

Qeneral Huseyn Səlami zinə Tehronədə bəsici şəhidon kanqresədə təkidış karde: İroni millət ıştə milli və islami ərjon oqəteyro 40 sor muğavimətış karde iyən ım roədə de zumandəti rə bə qıləy yolə ğudrət əvəz bey holədəy.

İroni sepah təşkilati fərmondə bə islam dınyo zumandəti işorə və əlovəş karde: ımruj Suriyə, İrağ və Yəmənədə millət Amerkə, sionist rejim və Ale-Səud rejimi vədə muğavimət kardedən və ıştə mıstəğilə hakımiyəti domuədən.

Əv votışe: məntəğə milləton Amerkə bə təcrid bardəşone və qədə qədə əy dınyo coğrafiyaku məhv bəkan.

İroni sepah təşkilati fərmondə bə İronədə bıə dəvardə haftəon iğtişoş işorə və ım macəraədə milləti və fitnəkoron miyono coəti İroni milləti huşin mande nımunə zınəş be ki Amerkə istikbori planon ijən məğlubış karde.

Qeneral Səlami votışe: deşmən tojə fitnə vasitə pidəş be anti İron makzimum təziğon və İroni daxıli məsələonədə rabitəon icod bıkə ki de milləti bəsirət be zuş mande.