Çin ijən ətomiyə sazışiku himoyədorətiş karde.

Çini xarıci vəzarətxonə rəsmən ətomiyə muğaviləku ijən himoyədorətiş karde.

Bə İrib raporti əsos ım vəzarətxonə sıxənəvot Qenkşoanq ıştə tojə mısohibədə bə ətomiyə saışi oqəte çərçivədə Çini səy-cəhdon dəvom işorəş karde və votışe: co tərəfon həm bəpe xarıci fişaron vədə bemandon iyən ım sazışiku himoyədorəti kon.

Çini xarıci vəzarətxonə sıxənəvot bə Pekinədə İron və Çini xarıci vəziron miyono tojə muzakirəon işorə və təkidış karde: ım vindemonədə ətomiyə sazışiku Amerkə ğeyri ğanuni xaric bey iyən ım beynəl xalğ muğavilə çoknə oqətey barədə sohbət be.

İroni xarıci vəzir Muhəmməd Cəvad Zərif həm ıştə səfəri oxoyədə de Twitteri vasitə elanış karde: Amerkə sanksiyaon dınyoədə multi lateralizimi təhdid kardedə.

Muhəmməd Cəvad Zərif votışe: Amerkə be ğanunə hərəkəton hətto Avropa vədə maneon icodış karde boçi ki əvon bəpe bənə yeqanəro ıştən sıxəni əvəzi bəştə ehdəmonon əməl kon.

İroni xarıci vəziri səfər bə Çin ki bə Rusiyə səfəri bəpeştə əncom bıə, ticarət və iğtisod sahədə həm vey stratejik nəticəon bə vıcodış varde. İroni xarıci vəzir ım səfərədə bə İron-Çini miyono stratejik həmkarion əhəmiyyəti təkidış karde.