Erməniston otəş bast ittihomi rəddış karde.
Ermənistoni mudafiyə vəzorətxonə tərəfo otəşbasti ləğv kardey ittihom rəd be.
Bə Armenpress aqentiyəti raporti əsos, Ermənistoni mudafiyə vəzorətxonə zinə elanış karde ki ın kişvəri hərbiçion çı Ğərəboğ bandiyə məntəğə otəş basti darşiyəşon ni və həminə məsələ barədə çı Azərbaycan Respublika tərəfo jıə ittihomi rəddış kardə.
Ermənistoni mudafiyə vəzorətxonə ıştə raportədə elanış karde: ın ittihom ki çəmə hərbion zinə ruj de sıbık və qıvoninə silah-təchizoti bə Azərbaycan Respublika ğıvvon tərəf qullə ğandəşone dırıst ni və duə sıxane.
Miladi 2020 minnə sori Oktiyabrə manqədə Azərbaycan Respublika vey hevuj iyən həmmə tərəfinə əməliyati bo Ğərəboği məntəğəku Ermənion xaric karde və işğal bıə ərazi ozodəti xoto bino kardışone.
Azərbaycan Respublika 44 ruj canqi bəpeşt muvəffəğ bıə təğribən 3500 kilomiter çı Ğərəboği ərazi əcumlə 132 kilomiter çı İroni sərhəd nezi məntəğon ozod bıkə.
Canqi sə bey zəmoniku tosə bə ısət, har kərə sərhəddədə vəziyət de tərəfon beğanunə hərəkəti və qullə ğandey vositə darşiye bəbe ki har dıvlət co tərəfi bə sulhi şəroyeti rioyət nıkarde mıttəhəm kardə.
