Rəyisi: D8 kişvəron tranzit iyən ticari zərfiyəton beko mandən.

İron İslam Respublika prezident votışe: D8 kişvəron miyono məhsul iyən əmtəə mıbodiləon əlovə beyro vey zərfiyəton mıvcude ki çəvonku ğəflət bıə.

D8 nomo bıə qrup ya bə inkişof rəsə 8 qılə mısılmonə kişvəron qrup, ki İron, Banqladeş, Pakiston, Tırkiyə, Malayziya, Misr və Niqeriya kişvəronku şomile, əcumlə məntəğə təvafuğnoməonku bə hisob omeydə ki  ım hədəfonro icod bıə: islami bə inkişof rəsə kişvəron miyono iğtisodi rabitəon zumand, beynəl xalğə vıjoronədə ım kişvəron nıfuzi zumand və de sənəti kişvəron votımoni əlovə kardey.

İslami bə inkişof rəsə 8 qılə kişvəri miyono texnoloqiya şəbəkə mıbodilə kardey ofis ki bə D8(TTEN) məşhure, İroni Pərdis texnoloqiya mərkəzədə ğərorış qətə.

Bə İroni prezident məlumatərosnə mərkəzi raporti əsos, zinə İron İslam Respublika prezident Sed İbrahim Rəyisi, D8 nomo bıə Təşkilati sərkatib, İsiyaka Əbdulğaderi vindemonış kardə və bə ım məsələ təkidış kardə ki İron İslam Respublika siyasət de məntəğə, beynəl xalğ və dınyo kişvəron miyono həmkarəti karde siyasəte, və əlovəş do: İron hozzoe ki, ıştə bə elmi əsos bıə zıney iyən texnoloqiya muvəffəğiyəton D8 kişvəron miyono ixtiyorədə ğəror bıdə.

Rəyisi D8 qrupi uzvon miyono ticari mıbodiləon əlovə bey vey zərrori zıneydə iyən əlovəş do: ım təşkilati uzvon cəhdışone ki əlovə bə ıştə zərfiyəton əktiv kardey, həminə təşkilati uzv bıə kişvəron miyono ticari mıbodiləon əlovə kon.

İron İslam Respublika prezident ijən votışe: Amerkə pidəş ni ki bə inkişof rəse holədə bıə kişvəron bə inkişof bırəson və meylışe ım kişvəron həmçınan bə sultə nizom vabəstə bıbu.

Həmçınin həminə vindemonədə İsiyaka Əbdulğader həm İron kişvəri bənə D8 nomo bıə təşkilati əctivə uzvonku qıləyni bə hisobış varde və votışe: D8 təşkilati uzv bıə kişvəron bə cəmiyəti zərfiyət diğğət kardey iyən uzvon miyono ticari mıbodilon əlovə bey, 2 qılə muhimmə metodin ki ım təşkilati sərkatibi zəmoniku təsə bə ısət bəvon diğğət bıə.

8 qılə kişvəri iğtisodi iyən həmkari təşkilati sərkatib ki bə D8 məşhure de İron lslam Respublika rəsmi şəxson vindemon iyə votımon kardeşe.