Rəyisi: de Baydeni hiç qıləy vindemon əncom doey nibəbe.

İ Bıə Milləton təşkiloti 77 minnə umumi iclosədə iştiroki astanədə, İron İslam Respublika prezident, Ayətullah Sed İbrahim Rəisi de qıləy Amerkəvıjə mediya votımonədə elanış karde: de Amerkə prezident, Co Bayden hiç vindemoni əncom nibəbe.

Bə İrna raporti əsos, Sed İbrahim Rəisi ğərore ki İ Bıə Milləton Təşkilati 77 minnə umumiyə iclosədə iştirokiro, bə Niyu-York səfər kon.

CBS Niyuz xəbəiyə kanal raportış do ki Ayətullah Rəisi de ın xəbəiyə kanali votımonədə elanış karde ki de Co Bayden hiç vindemon əncom nibəbe.

Bə həminə raporti əsos, Rəisiku qıləy soval bıə ki ehtımolış heste İ Bıə Milləton təşkilati umumiyə iclosi kənoədə de Co Bayden həm vindemon əncom bıbu, İron İslam Respublika prezident cəvobış do: ım məsələ ehtımolış ni, nə vindemon və nə muzakirə İroniro çok ni.

Həmçınin İroni prezident bə ım soval ki aya Trampi dıvlət iyən Baydeni dıvləti miyono farğışe, jıqo cəvobış do: Amerkədə tojə hukumət iddeo kardedə ki de Trampi dıvlət farğışe, əmmo əmə əmələdə hiç  əvəz bey nıvindemone.

Çımiku bənav həm İron İslam Respublika prezident de Ğətəri Əlcəzirə xəbəiyə kanali mısohibədə bəyonış kardə be ki bə atomiyə sazışi təvafuğnomə rəseyro oxonə ğərol bə Amerkə ohdəy, Əv iyən təkidış karde: de ğoymə surətədə, İron və çəy milləti huğuğiku mudafiə kəmon.

Pencşəmbə şəvədə və həminə mısohibədə Rəisi əlovəş karde: İroni sanksiyaon peqətey bəpe de qarantiyaon bə ico bıbu və atomiyə muzakirəon bənav şeyro bəpe mudafiə mıvzoon həl bıbun.

İroni prezident ijən votışe: çımiku bənav ki ğərb çəməku tələb kərdəş be ki çəmə atomiyə fəaliyəton behərəkət kəmon, bəpe ım mıvzo sionist rejimiku tələb kon ki qırdə bıə silahon soybe.

Ayətullah Rəisi ijən təkidış karde ki de ğoym surətədə, İron və milləti huğuğiku mudafiə kardey holədəmon, de Amerkə sərostə vindemoni ehtımonli barədə votışe: atomiyə sazışi mıvzo barədə de Amerkə sərostə muzakirə hiç foydəş ni və Amerkə bəpe de İronıjə tərəf etımod soxtey hərəkəton əncom bıdə.