Əmirəbdullahiyan: bə Şanxay həmkoəti təşkiloti koməkiro, İron veyə zərfiyəton soybe.
İron İslom Respublika xarıci vəzir, Şanxay həmkoəti təşkiloti sərkatibi vindemonədə votışe: muxtəlifə baxşonədə İron İslom Respublika veyə zərfiyəton soybe ki karde bəzne təşkiloti hədəfon bə vırə rosniye cəhəto istifodə ko.
Dışəmbə rujədə Şanxay həmkoəti təşkiloti sərkatib bə Tehron varid bıə və de xarıci vəzarətxonə siyasi muavin Əli Bağıri Kəni vindemon və votımonış kardə.
Bə İran Peres aqentiyəti raporti əsos, Dışəmbə əsrədə İron İslom Respublika xarıci vəzir Huseyn Əmirəbdullahiyan de Şanxay həmkoəti təşkiloti sərkatib Janq Minq və çəy bə ico bıə heyəti vindemonədə, Şanxay Təşkilotədə əktivə rol ifoəkə və iştirokiro bə İron İslom Respublika irodə təkidış karde.
Əmirəbdullahiyan ıştə sıxənon dəvomədə votışe: bovəmon heste ki ım təşkilot tojə beynəlxalğə iğtisodi və əmniyyəti baxşonədə karde bəzne vey muhimmə rol ifo ko və iğtisodi həmkoətion bə inkişof rosniye bə stabilə əmniyyət komək bəkay.
İron İslom Respublika xarıci vəzir ijən təkidış karde: İroniro mədəniyət, turizm, texnoloqiya, sənaye, texniki baxşonədə veyə zərfiyəton mevcude ki karde bəzne əvoni təşkiloti hərəfon bə vırə rosniye cəhəto iroə ko.
Həminə vindemonədə Şanxay həmkoəti təşkiloti sərkatib Janq Minq həm təkidış karde: be şək məntəğə və beynəlxalğədə İroni iştirok bənə vey zumand və təsirinə kişvəronku qıləyni karde bəzne İroni de uzv bıə kişvəron əloğəon bə inkişof rosniye və təşkiloti hədəfon bə vırə rosniyeədə qləy vey muhimmə qəm bıbu.
Minq ijən əlovəş karde: bovəmandimon ki beynəlxalğə bıhranon vədə İroni təcrubə karde bəzne təşkiloti uzvonro vey mənafe soyb bıbu.
