Nəvuzə İdi mesajədə İroni Yolə Rəhbər votışe: 1402 minnə sorədə inflasiya məhor karde iyən istehsalədə inkişof çı kişvəri əsli məsələy

Həzrət Ayətullah Xamenei 1402 minnə sori dəme mınosibəti məxsus mesajədə nuyə sori dəme bə İroni millət və dınyoədə Nəvuzə İdi dəvoniyə kişvəron təbrik votışe və əlovəş karde: dəvardə sorədə bıə kişvəri muhimmə məsələ iğtisod iyən jimoni məişət be ki bəy təkyə karde xoto lmsor həm kişvəri əsliyə koy həmonə iğtisod bəbe ki bəçəy əsos 1402 minnə sori şuar inflasiya məhor karde iyən istehsalədə inkişof elan bıdə.

Bə İranpress aqentiyəti raporti əsos, İroni Yolə rəhbər ıştə Nəvuzə İdi məxsus mesaji əvvələdə bə təbiət iyən mənəviyəti bəhari de yande bino bey hamyəşe: mıburək Rəməzanə manqədə bıə mənəviyəti xoşə bu bə həmmə kəson aid bıdə və bəbe ıştə dıli həminə İlohi və ətrinə atmosferədə ğəror bıdəmon.

Həzrət Ayətullah Xamenei kırtə sıhbəton çərçivədə bə 1401 minnə sori diyəş karde və əy bənə İroni inğilobi bə peşt bıə co soron de muxtəlif şin və telə hodisəon bə ico zınəş be və təkidış karde ki dəvardə sorədə kişvəri muhimmə məsələ iğtisod be hamiyəşe: iğtisodədə həm şin və telə hodisəon bin ki telə məsələon veyni bə inflasiya iyən bohoçiyəti xususi xorək iyən jimoni əsli çion məxsus be ki vey çəvon ğəymət əlovə bıə ki bə iştimaiyəti zəifə dastəon təziğış vardə.

Ə həzrət bə yodış varde: həlbətə iğtisod sahədə çokə koon həm əncom bıə ki bə milləti jimon iyən məişəti aid bəbe.

İroni Yolə Rəhbər 1401 minnə sorədə istehsoliku himoyədorətion de çand həzo tətil və nimə tətilə fabrikaon oj karde, bə elmi əsos bıə şirkəton miğdori əlovə bey iyən tikəy bekoçiyətiku kam bey çərçivədə əcumlə bəzi koonku bə hisobış varde və votışe: dəvardə sorədə bıə iğtisod baxşədə bıə coqılə roziədə noğtəon İmom Xomeyni nomo bıə Huseyniyədə dıvləti və ğeyri dıvləti istehsoləkəyon məhsulon və zumandəti nımoyeşqoh dəvoniye və de kişvəri iğtisodi fəalon iclos be.

Həzrət Ayətullah Xamenei təkidış karde ki kiçvəri istehsokəkəyon koon barədə çəy nəzə mısbət heste, bə iğtisodi bəzi indekson mısbət bey və çəvonədə inkişofi işorəş karde və votışe: bimədə vəziyət çoke, ov, qaz, roy iyən ekoloqiya baxşonədə çokə koon əncom bıə.

Ə Həzrət əlovəş karde: de təkidi voteydəm, iğtisodədə çokə kooni əncom bıə ki bəpe jimonədə hostonəti iyən millət xususi zəifə təbəğəon surfədə təsirin bıbu və ın ko fəğət de dəğiğə plan iyən dəvominə kopy imkon bəbe.

İroni Yolə Rəhbər çı kişvəri iğtisodi vəziyəti barədə ın nuktə bə yodış varde ki bəpe ğizovət və təhlilədə bə tel iyən şinə məsələon yande kənoədə diyə bıbu.

Həzrət Ayətullah Xamenei iğtisodi muşkilatonış bə həmmə kişvəron hətto bə zumand və inkişofinə kişvəron məxsus zınəş be və bə çəvon bankon iflosəti vəziyəti iyən qıvoninə ğarzon işorə və izovəş karde: dıvlət rəsmi şəxson iyən mədəni, siyosi və iğtisodi fəalon bəpe de zumandə cəhdon telə hodisəon kam iyən ımsornə sori bənə şinə sori İroni millətiro icod bıkon.

Ə həzrət 1402 minnə sori barədə təkidış karde: əsli və mehvər məsələ ımsor həm iğtisod bəbe, həlbəte çimi məno ım ni ki co baxşon muhim ni, kişvərədə və muxtəlif baxşonədə  məsələn mədəni və siyasi baxşonədə problemoni hese əmoo əqə dıvlət, məclis, iğtisodi fəalon iyəm mərdomi cıvonə dastəon deştə purənqizə cəhdi milləti muşkilaton həlliro hərəkət bıkon vey muşkilaton əcumlə işorə bıə problemon həm həl bəbe.

İroni Yolə Rəhbər çı milləti muşkilaton həlli, iğtisodi əsos və fundamental fəaliyəton bənə istehsol, insoniyə koy, muvasat və milləti miyono həmdıləti sayədə və bə zəifə təbəğəon komək karde sayədə imkonin zınəş be və hamiyəşe: istehsoli kənoədə coqılə koy sərmoyə noey muhimmə məsələy ki bəpe dıvləti rəsmişəxson və ğeyri dıvləti təşkiloton bəy məxsusə diğğətışon bıbu.

Həzrət Ayətullah Xamenei sərmoyə noey baxşədə bə dəvardə 10 sori mıddətədə bıə zəifə funqsiya işorəş karde və votışe: ın baxşədə bəpe de plani zəminə və şəroyet hozzı bıbu.

Ə Həzrət əlovəş karde: azde həmmə ın məsəlon iyən inflasiya bənə əsli mıvzo nəzərdəqəte iyən istehsoli çı iğtisodi problemonku kişvəri xilosəkə kilidi zıne, 1402 minnə sori şuari  inflasiya məhor karde iyən istehsalədə inkişof elan kardeydəm.

Həzrət Ayətullah Xamenei təkidış karde: bəpe rəsmi şəxson, iğtisodi fəalon, mərdomi əktivə dastəon, mədəni baxşon iyən telerədio təşkilot ki mədəniyət soxteyro məsuliyətşon heste, ıştə həmmə səy-cəhdon 2 qılə məsələro qırdə kon iyən çəy səpe təmərkuz bıkon, i minnə dərəcədə inflasiya məhor iyən kam bıbu və 2 minnə dərəcədə istehsoli inkişofi zəminə icod bıbu.

İroni Yolə Rəhbər ıştə nəvuzə idi mesaji oxoyədə de bə Həzrəte Ağa İmom Zəmon(əc)-i ıştə irodəti nışo doe və İmom Xomeyni iyən şəhidon vırə barz beyro dıvo karde, Nəvuzə İd iyən Nuyə sorədə İroni millətiro şoəti və  xuşbəxtiyəti Xıdoku tələbış karde.