Nəhcul-Bəlağə pand iyən hikməton

Nəhcul-Bəlağə pand iyən hikməton

Və ğalə Əli(ə):”əvzəul-ilmi ələl-lisan....vey be erjə elmon əve ki,fəğət zıvonədə bımando(və əmələdə zohir nıbu) və həmməysə erjinə elmon əve ki,çe bədəni əzo-cəvorih və sutunədə oşko bıbu) və çəy soyb əy ıştə jimonədə oko bıdo”.

Əmirəl-Muminin Həzrət Əli(ə) Nəhcul-Bəlağə nəve dıminə hikmətədə bə elmi erj iyən ğıyməti mizon iyən mığdori işorə kardedə və hamyedə:”vey be erjə elmon əve ki,fəğət zıvonədə bımando(və əmələdə zohir nıbu) və həmməysə erjinə elmon əve ki,çe bədəni əzo və sutunədə oşko bıbu) və çəy soyb əy ıştə jimonədə oko bıdo”.

İmom Əli(ə) nəzəku çe elmi həmməysə saruyə mərhələ əve ki,əv zıvonədə bımando və bə əməli mərhələ nırəso.bo alimi elm qıləy məsuliyyət ofəyedə.əv qıləy çiyon zıneydə ki,umum məxloğ çə çiyonku kamə xəbəşon heste.qıləy inson ki,ıştə zınə çiyonku boştə jimoni xilos kardero oko nıdo,beşək zərəl bəkarde. jıqo beəmələ alimi kardə moyizəon həm kamə təsirış bəbe.mərdum bə zəmon çe alimi sıxanon ğəbul bəkardeyn ki,bızınon ki,əv ıştən bəştə votə sıxanon bovəş heste iyən ın bovə bəştə kardə sıxanon əməliku ruşin və məlum beydə.İmom Sadığiku(ə) omə qıləy hədisədə handedəmon ki,ə həzrəti hamyəşe: ”innəl alimu...qıləy zəmon ki,alim bəştə elmi əməl nıko,çəy pand iyən nəsyəton dılonku ru bəbe,çoko ki, voş çe saxtə sıği piyo rubəbe”.

Liza çe elmi həmməysə barz iyən erjinə mərhələ ıme ki,çe insoni jimonədə zohir bıbu və bəy əməl bıko.ın nuktə həmonə elmi de əməli bə ico bıey məsələy ki,Kərimə-Ğıroni ayəon iyən şərifə rəvoyəton bın zəminədə ziyode.çoko ki,Xıdovənde-Mıtəol Səffi mıborəkə surə 2 iyən 3-ə şərifə ayəonədə hamyedə:”ya əyyuhəlləzinə amənu....ha imon vardə kəson ha!çıro qıləy sıxan votedon ki,bəy əməl kardedəniyon?ın ko bə bə Xıdo nəzdədə dıjdə ğəzəbi boyis bəbe k, sıxanon bıvotən ki,bəy əməl nıkon”.

Tıbğe Kərimə-Ğıroni ayəon əsl çe insoni rəftore,nəyinki,çəy kardə sıxanon.qıləy sıxan ki,əməli təyid iyən təsdığ nıko,nəyinki,çəy hiç qıləy erjış nibəbe,bəlkəm çe Xıdovəndi dıjdə ğəzəbi həm dumo ıştə bəvarde. zira əksə təsir dumo ıştə vardedə.İmom Sadığiku(ə)qıləy məşhurə hədisədə bə Əhli-Beyti(ə) tərəfdoron xitobən hamyedə:”kunu duatən-nasə....milləti deştə rəftoron dəvətkənən və nyinki,deştə sıxanon”....