Nəhcul-Bəlağə pand iyən hikməton

Nəhcul-Bəlağə pand iyən hikməton

Və ğalə Əli(ə):”la yəğulənnə əhədukum.....şıməku hiçkəs nıvoto ki,Xıdovənda pənoh bardedəm bətı çe imtovoniku.zira hakəs de qıləy formə imtovon kardey beydə.əmmo əgər ikəsi bıpyişe ki,bə Xıdo dəvito, çəyku bəpe bıpyo ki,bəy çe odəmi dəqıjnə imtovononku pənoh bıdo.

Əmirəl-Muminin İmom Əli(ə) Nəhcul-Bəlağə 93-ə hikmətədə bə qıləy muhimmə nuktə işorə kardedə və bo həmmə insonon imtovoni umumi bıey iyən har qıləy şərayitədə çəy hətmi və hukmən bıey bəyon kardedə.ə həzrət ıştə kəlomi ibtido iyən sıftədə jıqo hamyedə:” la yəğulənnə əhədukum.....şıməku hiçkəs nıvoto Xıdolim ha! çı imtovon bıeyku bətı pənoh bardedəm.peşo İmom(ə) ıştə ın sıxani illət iyən səbəbi izoh doydə və hamyedə:”liənnəhu ...bə ın dəlili xoto ki,həmmə kəson imtovon kardey bəbeyn”.

İnson bo təkamuliro ofəyə bıə və çəy təkamul çe imtovonon,təklifon,vəzifəon iyən məsuliyyəton məsir iyən roonku dəvardedə iyən imtovon nıbə holədə bə təkamuli səmt qıləy ro mevcud ni.umumən çe insoni jimon qırd de imtovonon pure və ın imtovonon bo məchuli kəşf kardeyro ni,bəlkəm bo istedodon iyən daxili sıfəton real kardeyroye.....

Əmirəl-Muminin Həzrət Əli(ə) Nəhcul-Bəlağə nəve seminə hikməti dəvomədə çe imtovonon zəmonədə dıvo kardey iyən pənoh bardey barədə səhihə roy bə insoni omuteydə iyən təlim doydə və hamyedə:”və lakin mən....əmmo ehyanə ikəsi dılış heste bə Xıdo pənoh bıbo və dıvo bıko,çe odəmi dəqıjnə və bə inhirofə ro bardə imtovononku bə Xıdo dəvito iyən pənoh bıbo”.de qıləy co bəyoni Xıdoku imtovononədə səbarzəti tovfiğ iyən ovandəti bıpiyo və çəy pokə zotiku qıləy mədət tələbko.

İmom Əli(ə) bın boho ğıymətinə sıxanədə dıqlə nəğli iyən ağli dəlilon bəyon kardedə.ə həzrət sıftədə bə Ənfali mıborəkə surə 28-ə şərifə ayə işorə kardedə və hamyedə:”fəinnəllahə subhanəhu yəğulu:və`ləmu ənnəma əmvalukum və əvladukum fitnə-Subhonə Xıdo hamyedə:bızınən ki,şımə molon iyən fərzəndon şımə imtovoni vəsiləonin”.peşo çın ayə təfsir iyən təhlilədə ağli dəlili bəyon kardedə və hamyedə:”və məni zalikə....çın sıxani məno ıme ki,Xıdovənd mərdum iyən milləti deçəvon mol-əmvoli iyən ovladon imtovon kardedə ta çəy ruziku ğıyzin bıə kəson iyən şık kardə və rozi bıə kəson məlum bıbu.harçənd Subhonə Xıdo millətiku vey aqahe,əmmo ın boçəy xotoye ki,bə səvob iyən əzobi ğəbul kardey boyis bıə koon zohir bıbu”.ın sıxan bə qıləy de məno pur bıə nuktə işorə kardedə və əv həm ıme ki,çe səvob iyən əzobi meyor ə əməlonin ki,de daxili sıfəton iyən niyyətonin.binobərin Xıdo ki,çe insonon daxiliku xəbədoye iyən çəvon həmmə niyyətonku komilə surətədə çəvon ıştəniku vey aqahe,ijən əvoni imtovon kardedə ta həyğəton oşko və məlum bıbu.məsələn həyğiyə mumin çe mısibəti zəmonədə ıştə diniku xaric beydəni və bə bə kıfr,səfiyəti iyən nodonəti səbəb bıə sıxanon bəştə zıvoni cari kardedəni.bəlkəm, səbr kardedə iyən ın muşkiloton çəy imon iyən ağli çe miyoniku bardedəni.əmmo qıləy inson ki,çəy ağl iyən imonış zəyif bıbu,şəyton bəy mısəllət bəbe və çe kufr iyən dojmoni roy bəqəte və bə zıllət iyən səfohəti də suğut bəkarde.