Mıbohilə ruj
Mıbohilə ruj
Nəcroni xristiyanon nımoyəndə heyət qıləy holədə ki,dəb-dəbəninə avşımə olətışon bəştə tan kardəbe,bə məçit daxil bin iyən bə pəyğombəri(s) səlom doşone.əmmo çəvon nomınosibə vəzyəti pəyğombərış(s) norohət karde.əvon famin ki,pəyğombər(s) çəvonku norohət bıə.çən,məçitiku xaric bin iyən de qıləy sodə oləti iyən zər-zibo nıbə holədə bə pəyğombəri(s) huzur rəsin və səlom kardeşone.pəyğombər(s)həm de qıləy məxsusə ehtıromi bəçəvon səlomi cəvobış doe iyən çəvon vardə kali hədiyyəonış ğəbul karde və bəvon hamyeşe:mı şıməro bə vohidə Xıdo pərəstış iyən tohid ayini iyən bəçəy əmron təslim bıey səmt dəvət kardedəm.peşo çe Kərimə-Ğıroniku çandə qılə ayəonış boəvon tilovətış karde.
Nəcroni məsihiyon nımoyəndə heyəti voteşone:ehyanə çe İslomiku məğsəd bə aləmi ofəyə iqləyniyə Xıdo imonebu,əmə navko bəy imon vardəmone iyən bəçəy hukmon əməl kardedəmon.həzrət Muhəmmədi(s) hamyeşe:çe İslomi əlomətonış heste və şımə bəzi əməlon çımiku hikoyət kardedə ki,şımə bə həyğiyə İslomi səmt dimon qətəni.şımə”Səlib”-i pərəstış kardedəon,xuqə qujdi hardeyku dast kəşeydəniyon iyən bo Xıdo qıləy fərzənd ğayiliyon.Nəcroni məsihiyon nımoyəndəon voteşone:əmə İsa(ə) Xıdo zıneydəmon.zira Əv,bımyon bəyji kardedəbe iyən bə noxəşon şifo doydəbe və çe tuliku pərəndə soxtəbe və əy porvonedəbe.qırd ın əməlon çəy Xıdo bıeyku hikoyət kardedə.pəyğombəri(s) hamyeşe:ne!Əv,Xıdo bandə iyən çəy məxloğe ki,əvış çe Məryəmi(ə) rəhmədə ğərolış doe və ıın ğudrət iyən zu Xıdovəndi bəy baxşış karde. Nəcroni məsihiyon nımoyəndəonku qıləyni cəvobış doe:bəle,Əv çe Xıdo fərzənde.zira çəy inə Məryəmi(ə)de hiçkəsi izdivoc nıkardə holədə əvış bə dınyoş varde.çən,çəy pı çe dınyo Xıdoye. bın zəmon Cəbrəyil(ə) nozil be və bə pəyğombəri(s) voteşe ki,bəvon bıvoto ki,çe İsa(ə) xılğəti misol bənə həzrət Odəmi(ə) xılğəti misoliye ki,əvış deştə oxoş nıbə ğudrəti hiç qıləy pı-mo nıbə holədə çe tuliku ofəyışe və ehyanə dədə nıbey bımi dəlolət kardedə ki,əv çe Xıdo fərzənde, jəqoədə həzrət Odəm(ə) bo mənsəb iyən məğami veyə ləyoğətış heste.zira çəy nə dədəş hestebe və nə nənə.
Nəcroni xristiyanon nımoyəndə voteşone:şımə votə sıxanon əməni ğane kardedəni.yeqonə ro ıme ki,qıləy mıəyyənə vaxtədə boəmon de iyande mıbohiləkəmon,bo duyəvoji nifinkəmon iyən Xıdoku tələbkəmon ki,həmonə duyəvoji həlok bıko.bın zəmon vəhyi peyk iyən ğasid ijən ome nozil be və Mıbohilə ayəş hande və pəyğombərış(s) məmur karde ta de əy mıbohilə kardey piyə iyən həxı ğəbul nıkardə kəson mıbohiləko.çe mıbohilə kardey zəmon ome rəse.pəyğombəri(s) çe mısılmınon iyən ıştə nezə odəmon miyoniku fəğət ço nəfərış vıjniye ki,bın torıxi hodisədə iştirok bıkon.ın ço nəfər ğərəz Əliyyibni-ƏbiTolıb(ə),pəyğombəri kinə Fatməye-Zəhro(s)iyən çəvon dıqlə fərzəndon yəni Həsən(ə) və Huseyni(ə) cokəs nıbe.pəyğombər(s) qıləy holədə ki, Huseynış(ə) ıştə vanqoyədə iyən Həsəni(ə)dastış qətəbe və Fatməye-Zəhro(s) həm çə həzrəti dumo iyən Əliyyibni-ƏbiTolıb(ə) həm çəvon dumo hərəkıtışon karde və bə həmonə mıəyyən kardə bıə vırə omin rəsin.bə mıbohilə məydoni daxil bıey bənav ə həzrəti bəştə nezə odəmon hamyeşe:”az har vaxt ki,dıvom karde,şımə həm de Amin votey,bəçımı dıvon cəvob bıdən”.
Nəcroni məsihiyon nımoyəndə heyəti yolon votemon kardə holədə bin ki,ğəflətən çe pəyğombəri(s) nuroniyə çehrə de çoqlə şəxsi oşko be.əvon dərəsin ki,pəyğombəri(s) bəştə dəvət iyən dıvo qıləy ğoymə etığodış heste və əqər jıqo bıə nıəbe,əv ıştə vey nezə odəmon çe osmoni bəlo iyən İlahi əzobi mə`rəzədə ğərol nıədi.həmonə nımoyəndəon de ın vəzyəti vindey,ıştə miyono məşvərət kardeşone iyən bə ğərol omin ki,hiçvaxti bə mıbohilə məydoni daxil nıbon iyən hozzı bin ki,hasor bənə moliyyoti unvoni qıləy məbləğ pərdoxtkon,bıdon və çımi mığobilədə İslomi hukumət həm çəvon con iyən moli muhafizəko,oqəto.pəyğombəri(s)ıştə roziyətiş elon karde və peşo hamyeşe:”çe əzobi soğnə bəsə Nəcroni mərdumi nımoyəndə peyo hevuj bıəbe iyən əqər əvon bə mıbohilə daxil bıəbin,qıləy saxtə əzob əvoni dəəqəti”....
