Mığovimət iyən Sabitəti Ruj

Mığovimət iyən Sabitəti Ruj

Əzizə duston səlom, şımə ruj bə xəyr bıbu, əzizon jəqo ki təğvimədə ğeyd bıə, ımruj Xordadə manqi 4 minnə ruj, bə İroni ələyh Səddam rejimi 8 sornə icbor bıə canqi cərəyonədə, Dezfol şəhri milləti muğavimət və səbarzəti ruje. Həmonə canq ki islamiyə inğilob iyən kişvəri mudafiədə, bə İroni milləti fidokarəti, muğavimət iyən ciqəmanəti simvol əvəz bıə iyən bə çəy xoto, “muğəddəsə mudafiə” nomış qətə.

Im bərnomə, 8 sornə icbor bıə canqi cərəyonədə çı İroni milləti muğaviməti barədəy, xuxusi Dezful şəhri milləti muğavimət. Dəvət kardəm de ım bərnomə quş doe vositə, dəmə bə ico bımandən.

Mehribonon, İroni Yolə Rəhbər Həzrəte Ayətullah Xamenei Dezful şəhri milləti barədə hamiyəşe: “İraği mızdorə rejim, bo ım ki Dezful şəhri, inğilobi hərbion və millətiku tey bıkə, bə Dezful şəhri səmti diyəro məsofə rəketon vığandəş be, əmmo Dezful şəhrədə ğərəz imon, ciqəmandəti iyən təvəkkol nıbe.”

Əzizon bə İraği hakim bıə rejimi hisob-kitobon əsos, ğəror be ki çand haftə mıddətədə, İroni ğərb de İraği rejimi hərbion vositə, işğol bıbu, və hətto İron İslam Respublika sistem həm məhv bıbu. həlbətə de diğğət bə İslami inğilobi təhəvolaton bəpeşt, İroni ərtışi zəifəti, İraği əbzaron və ım kişvəriku ğərəbi və ərəbi kişvəron himoyədorətion xoto, çəvon hisob-kitobon səhih bə nəzər rəsedə be,əmmo səddam iyən çəy ğərbi mışoviron, İroni milləti muğaviməti rohiyəku ki İslami inğilobi barzə təlimonədə rişəş be xəbəşon nıbe.

İron İslam Respublika silohinə hərbion iyən millət, ıştə ciqəmand və tədbirinə fərmondə, İmom Xomeyni(r)-i fərmandəti jintonədə, və de kamə canqi əbzaron və iminnə hərbi nəzmi, səddam rejimi hərbion və çəy mıttəfiğon vədə, 8 sor muğavimət kardışone.

Be şək ım səbarzəti əqəçı canqi cəbhəonədə İslami canqəkəyon cihod iyən fidokorəti nəticə be, əmmo əqə bə nıbe İroni milləti himoyədorəti, ım muvəffəğiyət icod neəbi, həmonə millət ki muxtəlifə şəhronədə jen, merd, pi iyən cıvonə odəmon və hətto hırdənon həm şomil be. Həğiğətədə millət həm modi cəhəto iyən pisixi və mənəvi cəhəto, deşmənon muğabilədə ıştə sırzımin və namusiku himoyə əkardin.

Əmmo Səddam Huseyn de inğilabiyə milləti mislış nıbıə muğaviməti vədə dim bə dim bıə ki çəy muğabilədə,ıştə ğəyre insoniyə həmləon bino kardeşe, əcumlə ım be ki bəştə ərtışi əmr kardəş be ki şəhronədə bə ğəyre hərbion həmlə kon, həmçınin İroni yolə şəhronədə, əcumlə Tehronədə, vey rəketon vığandəş be ki həminə dəhşətinə həmlədə çand həzo çı İroni ğəyre hərbion şəhid iyən çan da nəfər həm zəxmin bıən. Hətto çəvon miyonədə hırdən həm vindey bıdə be. ım həmləonədə İraği nəhsə rejim kimyəvi silohonku həm istifodə kardəş be, ki Hicri Şəmsi 1366 minnə sori Tirə manq ya Miladi 1987 minnə sori iyonə manqədə, bə Sərdəşt şəhri kimyəvi həmlə, çəy vey dəhşətinə nımunə be.

Bə İroni milləti ələyh Səddam rejimi səmtiku, hevujə həmləon, bə ım xoto əncom be ki İroni canqəkəyon rohiyə zəif kon əmmo çəy nəticə əks bıə və canqəkəyon və milləti muğaviməti ruhiyə vey ğoym bıə.

Bə İroni ələyh, İraği icbor bıə canqi əvvəliku, şəhrononku qıləyni ki həmişə de İraği bambaon iyən rəketon vositə, həmlə bıə be, Dezful be.

Im şəhr Xozıstan ostani şimolədə ğəror qətəşe. əqə Səddami ərtış ım şəhri işğol əkardəş be, muvəffəğ bıdə be ki, Xozıston ostani həmmə vırəon işğol ko. əmmo Dezfuli milləti muğavimət, deşməni ım nəhsə plani bə vırə rəseyro mane bıə.

Muğəddəsə mudafiə zəmonədə 176 qılə rəket bə Dezful şəhri səmti vığandə bıə, jəqo ki ım şəhr bə Rəketon şəhr məşhur bıə be. Im ğəyre insoni iyən dəhşətinə həmləon nəticədə, 2600 nəfəriku vey şəhid iyən çand həzo nəfər zəxmin bın iyən təğribən 19 həzo kə həm xərob bin. əmmo Dezfol şəhri millət ki Səddomi xəbisə planiku xəbəşon be, ıştə şəhrədə mandən və bəştə şəhri xərob bıə kəon dutey məşğul bin.

Hətto millət ım şəhri, canqəkəyonro bə qıləy çokə vırə əvəz kardeşone ki vaxti canəkəyon ıstirohətiro bə ım şəhri oməydə bin, harcurnə imkanat çəvon ixtiyorədə ğəror əqəti.

Dezful şəhri milləti muğavimət, həvo iyən rəketi həmləon vədədə, İroni hərbi ğıvvon, milləti umid və himoyədorəti, həmçınin deşmənon noumidi iyən əsəbaniyəti bois be. Jəqo ki İroni nizomi yolə təsisəkə İmom Xomeyni(r) qıləy mesajədə, çəvonku ğədrdonətiş kardə be iyən hamiyəş be: “ey dezfuli əholi, ım şıməro imtivon be, və şımə ım imtevoniku vey çok səbarz bin, İslami vədə şımə ıştə ğarzi doərone.

Həmçınin İroni Yolə Rəhbər Həzrəte Ayətullah Xamenei Dezful şəhri barədə hamiyəşe: “ İraği mızdorə rejim bo ım ki çı inğilobi hərbion və milləti, Dezful şəhriku xarıc ko, bə ım şəhr de diyəro bıə məsofə rəketon vositə, həmlə kardəş be, əmmo şəhrədə ğərəz imon, təvəkkul iyən ciqəmandə jimon nıbe.”

Yəni Həzrəte Ayətullah Xamenei Dezfuli milləti muğaviməti ruhiyəş, bə Xıdo təvəkkul kardey iyən mənəviyəti nəticə zıneydə. həğiğətədə İroni milləti yolə inğilob de islami həminə barzə erjon bə ico be, ki bois bıə muğəddəsə mudafiə cərəyonədə vey çok ıştəni nışo bıdə.

Əzizə əməson bə ım bərnomə quş doe xoto şıməku təşəkkur kardm.

Dəvət kardəm bə co bərnoməon həm quş bıdənən.