554-ə hissə-Taha surə-95-98 şərifə ayəon

554-ə hissə

قَالَ فَمَا خَطْبُكَ يَا سَامِرِيُّ (95) 

(Peşo Mosə bə Samiri) Voteşe:ha Samiri ha! çın(yolə) fitnəku ıştı məğsəd çiç be?

قَالَ بَصُرْتُ بِمَا لَمْ يَبْصُرُوا بِهِ فَقَبَضْتُ قَبْضَةً مِّنْ أَثَرِ الرَّسُولِ فَنَبَذْتُهَا وَكَذَلِكَ سَوَّلَتْ لِي نَفْسِي (96) 

(Samiri) Voteşe: az de qıləy çiyon həyğəti oşno bim ki, əvon bıənin. çən, çı rəsuli(firiştə) əsəriku i mışt peqətıme. çən, əvım bəsə(poynəsə) şodome və jıləvoni çımı nəfsi ım koş bomı dərostışe.

Navnə bərnomədə votemone ki,həzrəte Mosə(ə) çı Turi bandiku oqardeyədə,de ziyodə şikilədə bıə bıtpərəston dim bə dim ome ki,ıştə tohidiyə ayinuku dastışon kəşəbe iyən bə şırki tərəf dimışon qətəbe.həzrəte Mosə(ə) sıftədə deştə bo Harun(ə)-i tındə rəftorış karde və çəyku sıvol-cəvobış karde.iyo Harun(ə) çı ğovmi bəy nıpemandeyku bəhsış karde.əmmo çun çı inhirofi mənşə qıləy Samiri nomo bıə fərd iyən telıə heykəl be ki,deçəy dasti soxtey bıəbe.

Bın ayəonədə həzrəte Mosə(ə) çəyku xəbə seydə ki,boçi  jıqo qıləy koş əncom doe?

Samiri cəvobədə voteydə:az sıftədə bəştı çı pərvərdıqori rəsuli unvanədə vardə çi imonım hestebe.hətta çı həyğətonku aqah bim ki,cokəson çəyku xəbəşon nıbe. əmmo bəştə həvaye-nəfsi giriftor bim iyən ıştə umutə çiyonım bə diyəro şodoe.

Rəvoyətonədə omə ki,qıləy ruj həzrəte Əli(ə) bo Bəsrə şəhri əhali moyizə kardedəbe.bın zəmon ıştə zəmonə alimonku bıə Həsən Bəsri çə həzrətiku məsə çiyon nıvışteydəbe.İmom(ə) de bılındə sədo bəy xitob kardeşe və hamyeşe:ım fərd çın umməti Samiriye ki,çımı sıxanon nıvışteydə,əmmo vəoməyədə bə çımı ələyh sıxan bəkay iyən milləti bə inhirofi tərəf bəkəşe.

Çın ayəonku umutedəmon:

1-camiyə rəhbəron bəbe huşyar bıbon.zira məxloği bə inhirofi tərəf kəşəbənə Samiri odəmon ziyode.

2-həvaye-nəfs qahi faxti çı fərdon imoni bə bod doydə.bə həvaye-nəfsi tabe bıey mumkine hətta bə qıləy ğovm iyən cəmiyyəti inhirofi həm boyis bıbu.çəy nəfsi əy bə dast dənoə kəs,cokəson həm bə dast dəbənoe.

قَالَ فَاذْهَبْ فَإِنَّ لَكَ فِي الْحَيَاةِ أَن تَقُولَ لَا مِسَاسَ وَإِنَّ لَكَ مَوْعِداً لَّنْ تُخْلَفَهُ وَانظُرْ إِلَى إِلَهِكَ الَّذِي ظَلْتَ عَلَيْهِ عَاكِفاً لَّنُحَرِّقَنَّهُ ثُمَّ لَنَنسِفَنَّهُ فِي الْيَمِّ نَسْفاً (97) 

(Mosə bə Samiri) Voteşe:çən,(çı məxloği miyonoku) bışi. həyğətən, ıştı dınyoədə bıə bəhrə ıme ki,(bə qıləy dardi mıbtəlo bəbeyş və dayima) bəvoteyş: bəmı dast məjənən və bərosti ğıyoməti ruji həm botı qıləy miadqo(və`də vırə) heste ki, hiç faxti çəy xilof nibəbe(əv hukməm bıənine). və(ısət) bəştə pərəstış kardə mə`budi diyəkə. əmə hukmın əy bəsutnemon(və) peşo çəy otəşi xoki bə dıyo pebəşandemon.

Ruşine Samiri cəvob uzr vardey iyən bəhonəsə co qıləy çi nıbe və həzrəte Mosə(ə) əvış ğəbul nıkarde. Liza hukmış doe ki,Samiri çiyo dərbədərkəyn bıtojnin və hamyeşe: ıştı dınyəviyə cəzo ıme ki,tı bə qıləy siroyət kardə noxəşəti dıço bəbeyş. joqo ki, de cokəson bə ico jimon kardey nibəzıneş və təcrid bıə holətədə bəjiş. təbiiye ki, ıştı uxrəviyə cəzo ıştə vırədəy iyən ıştı uxrəvi əzobiku hiççi bəkam nibəbe.

Çən, çı Samiri məsələ həll bıey bədiqə,həzrəte Mosə(ə) çı telıə poynə barədə həm bə qıləy ğərol ome və deməkə ki,əv de telı pur be,əmrış karde ki,əy jıqo məhvkəyn ki, hətta çəyku qıləy əsər həm nımando.

Islomi peyğombər(s) həm Məkkə fəthi bəpeştə qırd bıtonış hırd karde iyən arışteşe. deməkə ki,çəvon kali qıləyni ğeymətış bəpe be,əmmo çun çı şırk iyən kufri məzhər be, əve əvoni ğədimi iyən antik əşya nomədə oqətey,cayiz nıbe.çun ım ko bə de şırki aludə bıə təfəkkuri bəyji bıey boyis əbi.

Çın ayəku umutedəmon:

1-mufsidon çı camiyəku tojney,ilahi muslih və islohəkəyon şivəonkue.fərhənqi iyən ideolojiyə  inhirofi amilon baykot kardey,çı ilahi rəhbəron vəzifəonkue.

2-qıno iyən inhirofi əbzoron bəbe məhv bıbu,harçənd ğeymətin həm bıbu.çı kufr iyən şırki əsəron bəbe çı miyoniku bışo.

إِنَّمَا إِلَهُكُمُ اللَّهُ الَّذِي لَا إِلَهَ إِلَّا هُوَ وَسِعَ كُلَّ شَيْءٍ عِلْماً (98)

(Ha çımı ğovm ha!) Həyğətən, şımə məbud Allah(Xıdoe) ki, ğərəz əv co qıləy məbud ni. (və)çəy elmi qırd çiyonış ehtivoş kardə.

Samiri iyən çəy soxtə çi inkor bıey bədiqə,həzrəte Mosə(ə)  bəştə bə şırki giriftor bıə ğovmi hamyeşe:ğərəz i bıə Xıdo,hiçkəsi pərəstış iyən ibodət məkənən iyən sovə Xıdo hiçkəsi bo məbud bıey ləyoğətiş ni.qıləy Xıdo pərəstışkənən ki,şımə ziyon iyən xəyku aqahe iyən bo xəy rosney və zərəli dəf kardey ğudrətış heste.

Çın ayəku umutedəmon:

1-botıli rədd kardeyədə,çəy vırədə bıə həxıku bəhskəmon.

2-sovə pərvərdıqore-aləmi,hiçkəs çəmə dəvardə,ısətnə holi iyən vəoməyku xəbədo ni ta əməni bəştə pərəstışi vodorkəy.