559-ə hissə-Taha surə-121-126 şərifə ayəon

559-ə hissə

فَأَكَلَا مِنْهَا فَبَدَتْ لَهُمَا سَوْآتُهُمَا وَطَفِقَا يَخْصِفَانِ عَلَيْهِمَا مِن وَرَقِ الْجَنَّةِ وَعَصَى آدَمُ رَبَّهُ فَغَوَى (121) 

Nəhoyət,(Odəm iyən Həvvo de şəytoni vəsvəson) çə(həmonə ğədəğən bıə doyku) hardeşeone. çən,(çəvon vəhışti oləton rubin) və çəvon aybə vırəon çiye.və(noçorən) har dıqləyni de(vəhışti doon) livəon bəştə dəçokney məşğul bin. və(jıləvoni) Odəm bəştə pərvərdıqori nıpemande və tonəro şe.

ثُمَّ اجْتَبَاهُ رَبُّهُ فَتَابَ عَلَيْهِ وَهَدَى (122) 

Çən, ıştə pərvərdıqorış vıjniye. çən,(əy ıştə lutfış) bəy oqordıneşe iyən əvış hidoyətış karde.

Navnə proqramədə votemone Xıdovəndi bə Odəm(ə)-i xəbərdorətiş doe ki,şəyton əvoni bə dast nıdəno.zira əv şımə deşmone iyən şıməni de neməton pur bıə vəhıştiku bekardey dumoe.əmmo anəndə vəsvəsəş karde ki,bəvon ğədəğən bıə çiyku hardeşone və çəy iminə təsir ımbe ki,çəvon vəhışti məxsusə olət çəvon taniku erize rube və əvon quculi bin.əve əvon məcbur bin ki,ıştəni de doon livəon bıpuşnin.

Bə şəytoni və`dəon əsos  əvon de ın do miyvə hardey,bəbe bə barzə dərəcəon iyən əbədiyə jimoni rəsənin bin.əmmo bənə şeytoni co və`dəon ım və`də həm du be və əvonış məyus iyən nokam bəçəvon ıştə holiş vadoe.bın macəradə Odəm(ə) iyən çəy jimoni həmronokam vandeysə əlovə,bə Xıdo əmri nıpemandin iyən bəy nez bıə məğamiku bə diyəro mandin.

De ın holi Xıdovənde-Aləm Odəm(ə)-ış ıştə rəhmətiku əbədi bə diyəroş nıkarde, bəlkəm ijən ıştə lutfış bəvon oqordıneşe,əvonış hidoyət kardeşe və çəvon tobəş ğəbul karde. hətta əvış boştə co bandəon hidoyətiro bə risolət məğami vıjniyeşe.

Çın ayəonku umutedəmon:

1-umrıjnə camiyədə  rəvocış pəydu kardə uryonəti,bə şəytoni əmron pemandey iyən bə Xıdo əmron nıpemandey nəticəonku qıləyniye.iminə odəm həm bə Xıdo əmron itoət nıkardey xoto,bə uryonəti giriftor bedə.

2-bə Xıdo əmron nıpemandey,insoni çı səodət iyən xoşbəxtətiku oqəteydə iyən bə inhirofi tərəf rəvonə kardə.

قَالَ اهْبِطَا مِنْهَا جَمِيعاً بَعْضُكُمْ لِبَعْضٍ عَدُوٌّ فَإِمَّا يَأْتِيَنَّكُم مِّنِّي هُدًى فَمَنِ اتَّبَعَ هُدَايَ فَلَا يَضِلُّ وَلَا يَشْقَى (123) 

(Xıdovəndi bəvon) Hamyeşe: şımə har dıqləyni kali qılə de i yənde deşmon bıə holədə çı vəhıştiku(yolə məğamiku) etatən beji. çən, əgər çımı tərəfiku qıləy ro nışon doə kəs bo şımə ome, çən,(bızınən ki) ha kəs bə çımı vığandə ro nışon doə kəsi pemando, nə ro dəbəqıjniye, və nə bədbəxt bəbe.

وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكاً وَنَحْشُرُهُ يَوْمَ الْقِيَامَةِ أَعْمَى (124) 

Və hakəs mıni zikr kardeyku dim bıqordıno. çən,həyğətən, çəy jimoni quzəron tanq bəbe iyən əmə ğıyoməti ruji əy ku məhşur bəkamon.

Deməkə ki, Xıdovəndi Odəm(ə)-i qınoku dəvarde,əmmo həni çəy iyən çəy jimoni həmro vəhıştədə vırəş nıbe və çəvon iyən şəytoni çı vəhıştiku xaric bıey iyən zəmini dimisə sakin bıey əmr sadir be.qıləy holədə ki,çəvon miyono deşmınəti dəvom pəydu bəkay. bın zəmon Kərimə-Ğıron bo məxloği hidoyəti xoto bıə bə ğanuni işorə kardedə və hamyedə:hafaxti boşımə qıləy pəyğombər vığandıme,bəy pemandənən ki,şımə səodət çəy girovədəy.əmmo şımə bəy etino nıkoyn və Xıdo çı yodo bekoyn, dınyo iyən axırətədə bə muşkilaton giriftor bəbiyon.dınyoədə bə tanqə jimoni quzəroni və axırətədə ku bəbeyn.joqo ki,bə uxrəviyə baxtəvərəti rəsey roy ki, həmonə əbədiyə vəhışte,pəydu kardey nibəzıneyn.

Həlbəttə jimonədə tanqi,fəğırəti iyən nıbey ni.zira vey puldoron heste ki,bəştə pəxıləti xoto, hejo de tarsı-larzi jimon kardedən iyən hiç qıləy oromətişon ni.

Təbiiye qıləy şəxs ki,Xıdo çı yodo bekoy iyən deəy ıştə rabitə bıbırno,sovə dınyo co çi nibəmande ki,ıştə dıli bəy dəvasto və əy ıştə məğsəd ğərol bıdəy.nəticədə ıştə qırd zəhməton bəy həsr kardedə iyən rujbəruj çəy dayirə ziyod bedə və de əy məşğul bedə.həlbəttə şək ni,ım tamah iyən pəxıləti ko bə vırə rosneydə ki,çəy bə dast vardə çiyon əy rozi kardedəni.

Jıqo qıləy inson muşkilaton buruz kardə faxti ğəmqin bedə iyən çəy noxəş və mardə faxti, bəştə bə vırə nırəsə oruzon fik bəbe iyən ıştə bə dast vardə çiyon çı dasto doey xoto tarsış bəbe.

Çın ayəonku umutedəmon:

1-insoni nicot iyən səodət,bə ilahi peyğombəron pemandey girovədəy.

2-Xıdo zikr kardeyku bə diyəro mandey,bə iztirob,həsrət iyən sərqərdonəti boyis bəbe. harçənd çəy soybi pul və molış ziyodhəm bıbu.

3-dınyoədə bo mənəviyə həyğəton vindey hozzı nıbə kəson,ğıyoməti ruji həm ku məhşur bəbeyn ki, ım həmonə əməlon təcəssım pəydu kardeye.

قَالَ رَبِّ لِمَ حَشَرْتَنِي أَعْمَى وَقَدْ كُنتُ بَصِيراً (125)‏

(Ğıyomətədə) Bəvote: Xıdolim ha! çıro mını ku məhşurı karde? Qıləy holədə ki, az(dınyoədə) vindedəbim!

قَالَ كَذَلِكَ أَتَتْكَ آيَاتُنَا فَنَسِيتَهَا وَكَذَلِكَ الْيَوْمَ تُنسَى (126) 

(Xıdovəndcəvobədə) Bəhamye: çoko ki, çəmə ayəon bətı rəse iyən tı əvonı çı yodo bekarde, ımruj tı(həm) çı yodo bebəşeyş.

Çun axırət çı əməlon təcəssım pəydu kardə ruje,bə osmoniyə kitobon iyən çı məxloği miyono Xıdo zikri səbəbkor bıə bə ilahi peyğombəron be etino bıey,boyis bəbe ki, inson ğıyoməti ruji ku məhşur bəbe və çəy harcurnə etıroz bə hiç vırə nibərəse.

Bə ın ayəon əsos nəinki, kofiron,bəlkəm bə mısılmınon həm bə Kərimə-Ğıronibe etino bıkəyn ya nımoj ki,həmonə Xıdo zikr kardeye,bəvədə sıstəti bıkon,dınyo iyən axırətədə bə jıqo ağıbəti dıço bəbe.

Çın ayəonku umutedəmon:

1-ilahi cəzoon bə ədoləti əsose və de insoni qınoon mutənosibe.

2-harçənd dınyoədə de çəşi vindey bo bəşəri muhimme,əmmo ğıyoməti ruji vindey boəy vey muhimme ta inson kardey bızıno vəhışti reçinəti iyən neməton bıvindo.