561-ə hissə-Taha surə-131-135 şərifə ayəon

561-ə hissə

وَلَا تَمُدَّنَّ عَيْنَيْكَ إِلَى مَا مَتَّعْنَا بِهِ أَزْوَاجاً مِّنْهُمْ زَهْرَةَ الْحَيَاةِ الدُّنيَا لِنَفْتِنَهُمْ فِيهِ وَرِزْقُ رَبِّكَ خَيْرٌ وَأَبْقَى (131) 

(Ha pəyğombər ha!) Çəmə bəçəvon kali dastə doə neməton ıştə çəşi mədut(xıyə məkə) ki,(ım) çı dınyo jimoni cilvə və zizəonkue. (əmə piyedəmone) deçəy vositə əvoni imtovonkəmon. və(şək ni) ıştı pərvərdıqori ruzi vey çok və dəvomine.

Navnə proqramədə votemone ki,Xıdovənd ıştə peyğombəri çəy ələyhdoron yavə rəftoron iyən norəvoə sıxanon mığobilədə bə tov vardey iyən səbr kardey sıfarış karde. bın ayədə bə peyğombəri(s) xitob kardedə,əmmo əslədə bə umum mısılmınon xitob kardedə və hamyedə:mığət bıbənən ki,çı kofiron mol iyən sərvəton qıləy maddi iyən dınyəviyə məta iyən kamə bəhrəy və əv şımə çəşonədə cilvə pəydu nıkəy və bə Xıdovəndi bəşmə doə yolə nemət ki,həmonə imoni neməte, kam iyən beğeymət məzınən.çımisə əlovə çəmə bə kofiron doə çiyon sabit iyən dayimi ni və bənə əvəsori zizəon vey rə pəleşk beydən.vey muhimmə nuktə ıme ki, ımon həmmə çı imtovoni vositəonin və əvon bəbe çə neməton mığobilədə cəvobdeh bıbon.

Çın ayəku umutedəmon:

1-inson təbiiyə surətədə və fitri bə madiyyati meylış heste.əmmo bənə çəy co meylon bəbe ım meyl həm,kontrol bıbu iyən bə dınyo dəb-dəbə aşığ nıbu.

2-ıştə bıə çiyon barədə fik bıkəmon,nəinki,çı cokəson dastədə bıə çiyon barədə.

3-qırd dınyo neməton,bo insoni imtovon kardey xotoe.çiki dastədə ziyodə nemətış heste, çı ziyodə imtovoni mə`rəzədəy.de qıləy co bəyoni çiki kisəş dıjd bıbu,çəy şələ qon bəbe.

وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا لَا نَسْأَلُكَ رِزْقاً نَّحْنُ نَرْزُقُكَ وَالْعَاقِبَةُ لِلتَّقْوَى (132) 

Bəştə(əhli) xıyzoni nımoji əmrkə iyən bəvədə səbrkə(sabitğədəm bıbu) əmə ıştıku ruzimon piyedəni(bəlkəm) əmə bətı ruzi doydəmon və(çokə) ağıbət bo təğva əhliye.

Vəynə ayə dəvomədə,ın ayə bə dınyo sabit nıbə iyən noçizə moli dıl nıdəvaste xoto və bə ilahi əbədiyə neməton dıl dəvastey xoto,ijən bə peyğombər(s)-i xitob kardedə hamyedə: həm ıştən nımoji iğomə və bərpo kardeyədə ğoym bıbu iyən həm ıştə xıyzoni bə nımoji sıfarışkə.beşəkk mominon həm bə peyğombəri(s) tabe bıə holədə bəbe jıqo bıbon iyən bəbe bəştə və bəştə ayilə nımoji dığğətkəyn.

Ayə dəvomədə bə qıləy sıvoli cəvob doydə.kali cıvonon dəparseydən ki,Xıdovəndi bəçəmə nımoji çı ehtiyocış heste ki,əvış çəməku tələbış kardə? Xıdovənd hamyedə: çımı bəşmə həm ehtiyocım ni,ısət çı bımando bəşmə nımoji.ım şıməniyon ki,bəmı ehtiyocon heste.ehanə az ki,voteydəm şımə nımoj bıvotənən, bəçəy xotoe ki,şımə bə dınyo dıl dəmavəstənən iyən ruji çandə kərəaxırəti bəştə yod dənənən.şımə bəştə əbədiyə jimoni fik bıbənən iyən boştə axırəti cəhdo-təloşkənən.

Çın ayəku umutedəmon:

1-qıləy merd bəştə xıyzon iyən fərzəndon diniyə tərbiyə nisbətədə cəvobdehe və fəğət bəçəvon maddi cəhəto təmin kardey fik nıbu.

2-fərzəndi tərbiyə iminə mərhələ,ayilə və xıyzoni mərkəze,nəinki,məktəb.

3-çəmə ibodəton bo Xıdo hiç qıləy foydəş ni.çəmə ibodət iyən pərəstışi xəy,bəçəmə ıştəni obəqarde.

وَقَالُوا لَوْلَا يَأْتِينَا بِآيَةٍ مِّن رَّبِّهِ أَوَلَمْ تَأْتِهِم بَيِّنَةُ مَا فِي الصُّحُفِ الْأُولَى (133) 

(Mışrikon)Voteşone: boçi(peyğombər) ıştə rəbbi tərəfiku qıləy mecuzə və nışonə boəmə vardedəni? bəqəm boəvon qıləy ruşinə dəlil və nışonə vəynə(osmoniyə kitobonədə) oməni?

Məkkə mışrikon, Kərimə-Ğıroni qıləy mecuzə unvanədə ğəbul kardeydə nıbin və bəhonə vardə holədə bə peyğombər(s)-i voteydəbin: boçi tı bənə navnə peyğombəron mecuzə vardedəniş? qıləy holədə ki,bənə Mosə(ə) iyən İsa(ə)-i bıə vəynə peyğombəron ələyhdoron həm inodkorəti kardeydəbin iyən bəvon imon vardedə nıbin.

Mışrikon təvəğğoşon hestebe ki,əvon çiç təklif bıdəyn,peyğombər(s) həm ğəbul bəkayn. qıləy holədə ki,peyğombər(s) de Xıdovəndi izni mecuzə əncom doydə, nəinki, de məxloği tələbon.ehanə jıqo bıəbe,hakəs boştə imon vardey xoto qıləy əcib-ğəribə tələbonku bəhs əkəy.ım həm bə koon bəyənde qıniye iyən hərcı-mərcəti boyis əbi.

Xıdovənd cəvobədə bəvon hamyedə:çıro ımon mecuzə tələb kardedən iyən bəhonə dumon? Bəqəm ım Ğıron ki,de yolə imtiyozon çı navnə osmoniyə kitobon həyğəton məzmunış ıştədə cəm kardə bəvon vəs kardedəni?

Çın ayəku umutedəmon:

1-yoləşəxə iyən inodkorə inson movcud bıə ruşinə dəlilon bə kəno noydə və bəştə inodkorəti xoto co qıləy dəlilon dumoe.

2-həyğətədə çı mecuzə nov muhm ni,çı Ğıron ya çı Mosə(ə)-i əso bıbu.həxı ğəbul kardey ruhiyyə insonədə nıbu,hiç qıləyni ğəbul kardedəni.

وَلَوْ أَنَّا أَهْلَكْنَاهُم بِعَذَابٍ مِّن قَبْلِهِ لَقَالُوا رَبَّنَا لَوْلَا أَرْسَلْتَ إِلَيْنَا رَسُولاً فَنَتَّبِعَ آيَاتِكَ مِن قَبْلِ أَن نَّذِلَّ وَنَخْزَى (134) 

Və əgər əmə əvoni (çı Ğıroni omey) bənav de qıləy əzobi həlokımon kardəbe, əvotin: Xıdolim ha! boçi çəmə zəlilo-xar bıey bənav boəmə qıləy peyğombər nıvğande ta əmə bəştı ayəon pemandəmon.

قُلْ كُلٌّ مُّتَرَبِّصٌ فَتَرَبَّصُوا فَسَتَعْلَمُونَ مَنْ أَصْحَابُ الصِّرَاطِ السَّوِيِّ وَمَنِ اهْتَدَى (135)

(Ha peyğombər ha!) Vuji: qırd əmə çəş kardedəmon. çən, şımə(həm) çəşkənən ki, rəyrə bəvindeyon kom şəxsonin rostə roy soybon və kom şəxsi(həxə) royış pəydu kardə!

In ayəon ijən çı mışrikon bəhonəonku bəhs kardedə və hamyedə:əgər Xıdovənd bə kofiron əməlon xoto həmonə bın dınyoədə bəvon əzob bıvğando iyən əvoni həlokkəy, bəvədə əvon bəhonə bəvayn ki,boçi bo əmə qıləy peyğombər nıvğande? Ehanə qıləy peyğombərı vığandəbe,ğasbu əmə hidoyət əbimon və bəştı ayəon pemandimon.

Pərvərdıqore-Aləm zıneydə ki,çəvon imon vardey məğsədışon ni və fəğət çı bəhonə vardey dumon.liza peyğombər(s)-i bəçəvon soyəx de Ğıroni vığandeyədə,har ruj qıləy sıxan voteydən və çı həxıku fərol kardey xoto,qıləy tojə bəhonə toşedən.

Bın zəmon Xıdovənd peyğombəri məmur kardedə ki,bə ım bəhonə vardə munkiron bıvoti: qırd əmə iyən şımə çəşkəmon.əmə çəşkəmon ki,ta Xıdovəndi bəmə doə və`dəon ki, həmonə çəy həxə dini bə kofiron ğalib omə və`dəy,boy bırəso.şımə həm muntəzir bımandənən ta mısibət iyən muşkilaton bəmə bırəso.

Ayə dəvomədə hamyedə:rəyrə dəbərəsiyon ki,çəməku kom qıləyni səhihə royədə bıə. həmonə mustəğimə roy ki,insoni bə məğsəd rosneydə.şayəd ım cumlə çı Kərimə-Ğıroni ğeybiyə xəbəonkue ki,çı mısılmınon səbarzətiş bə mışrikon çı naviku xəbəş doə.əv həm qıləy zəmonədə ki,peyğombər(s) iyən mısılmınon çəvon deşmınon ziyodə təzyiği  jiyədə bin.

Çın ayəonku umutedəmon:

1-peyğombəron be`sət bo huccəti təmom kardey xotoe ta məxloğ ıştə xəbə nıbey bəhonə nıvəyn.çımisə əlovə tainki,ğanun nırəso,cərimə iyən cəzo bə ədoləti əsos nibəbe.

2-islom çı etıdoli məktəbe və mısılmınonro bə rostə ro

tərəf hidoyət kardedə.