567-ə hissə-Ənbiya surə-25-29 şərifə ayəon

567-ə hissə

وَمَا أَرْسَلْنَا مِن قَبْلِكَ مِن رَّسُولٍ إِلَّا نُوحِي إِلَيْهِ أَنَّهُ لَا إِلَهَ إِلَّا أَنَا فَاعْبُدُونِ (25) 

(Ha peyğombr ha!)Iştı bənav har qıləy peyğombər ki, vığandemone bəy votemone: ğərəz mı co qıləy məbud ni. çən,(fəğət) bəmı ibodətkənən.

Vəynə proqramədə bəyon be ki,ehanə dınyo de çandə qılə Xıdo vositə ofəyə iyən idorə bıəbe, qırd xılğəti soxtemon bəyənde əqıni və məhv əbi.həmçinin işorə kardemone ki,aləmədə bıə ım nəzm və həmahənqəti,çı i bıə Xalıği nışonəonkue.

Im ayə həm hamyedə:qırd peyğombəron çı i bıə Xıdo tərəfiku məb`us bıə və çəvon vəzifə məxloği bə ibıə Xıdo tərəf dəvət karde iyən fəğət i bıə Xıdo pərəsətış kardey bıə. həzrəte Əli(ə) bəştə fərzəndi imom Həsən(ə)-i hamyedə:baləlim ha! əgər dınyoədə co xıdoon hukumətışon kardəbe,əvon həm boştə peyğombər əvğandin ta məxloğ əvoni bızınon iyən bəvon itoətkəyn.

Çın ayəku umutedəmon:

1-tohid çı qırd peyğombəron proqramon iminə dərəcə ko bıə.liza çı xristiyanon bə “təslisi” etığod, de həzrəte İsa(ə)-i məxloği bə i bıə Xıdo dəvəti i omeydəni.

2-imon çı əməliku co ni.bə i bıə Xıdo imonış bıə kəs,çoko çı Xıdo ibodətiku dast bəkəşe və nımoj nibəvote?

وَقَالُوا اتَّخَذَ الرَّحْمَنُ وَلَداً سُبْحَانَهُ بَلْ عِبَادٌ مُّكْرَمُونَ (26) 

Və(kofiron) voteşone: Rəhmonə Xıdo(məlayikonış boştə) fərzəndış vıjniyə. əv pok, mığəddəse. bəlkəm,(firiştəon) əziz-qıramiyə bandəonin.

لَا يَسْبِقُونَهُ بِالْقَوْلِ وَهُم بِأَمْرِهِ يَعْمَلُونَ (27) 

(Məlayikon)Çəy sıxani bənav qıləy sıxan nibəvoteyn və(fəğət) bəçəy əmri əməl kardedən.

Həzrəte İsa(ə)-i Xıdo fərzənd zınə ki,navnə ayəon əvış inkor karde,məsihiyon mığobilədə-ın ayə bə mışrikon botılə əğıdə işorə kardedə və hamyedə:əvon ki, voteydən Xıdovəndi firiştəonış boştə fərzəndış peqətə,qıləy holədəy ki,Xıdovəndi zot çı har curnə fərzənd soybi bıeyku bə diyəroe.ısət çı peyğombər bıbu ya firiştə.

Ayə dəvomədə hamyedə:məlayikon həm Xıdovəndi ofəyə məxloğin və bəçəy əmron tabeyin.əvon sıxan və əmələdə çı Xıdoku bənav dəşeydənin iyən ıştə bandəçəti komilə surətədə bə vırə rosneydən.

Bə rəvoyəton əsos mələkon komilə ağli soybin iyən bəvonədə daxiliyə meyl və şəhvət movcud ni.binobərin əvon hejo bə Xıdo əmron pemandedən və əməl kardedən.

Çın ayəonku umutedəmon:

1-kuframizə sıxani məseyədə,bəbe Xıdovəndi harcurnə nəğs və aybonku mınəzzəh bızınəmon iyən həxə əğedə ibrozkəmon.

2-insoni kəromət bə Xıdo təslim bıey iyən çəy bandə bıey girovədəy.

يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلَا يَشْفَعُونَ إِلَّا لِمَنِ ارْتَضَى وَهُم مِّنْ خَشْيَتِهِ مُشْفِقُونَ (28) 

(Xıdovənd)Çəvon navi və ya dəvardəon zıneydə. və əvon(mələkon) fəğət Xıdovəndi(çəvonku) rozi bıəkəson xoto şəfoət kardey bəzıneyn və əvon çəy heybətiku bətarseyn.

وَمَن يَقُلْ مِنْهُمْ إِنِّي إِلَهٌ مِّن دُونِهِ فَذَلِكَ نَجْزِيهِ جَهَنَّمَ كَذَلِكَ نَجْزِي الظَّالِمِينَ (29)

Çəvonku hakəs ki, bıvoto: az çı Xıdo əvəzi şımə məbudim, çən, çəy cəzo de cəhəndımi bədomon. (və)əmə jıləvoni bə sıtəmkoron cəzo bədomon. 

Vəynə ayəon dəvomədə ki,çı məlayikon barədə be,ın ayəon hamyedə:harçənd Xıdovənd çı aləmi koon,min cumlə insonon koon de məlayikon vositə idorə kardedə, əmmo əvon həm çı ilahi fərmoni jiyədən və deçəy əmron mıxolifət kardeyku tarsışon heste.zira zıneydən ki,Xıdovənd çəvon dəvardə iyən vəomə əməlonku xəbədoe.əvon Xıdovəndi izn nıbə holədə hiçkəsi bə vəhışt bardey ya əvoni çı cəhəndımiku nicot doey əzınin.

Çı mışrikon botılə əğıdəonku qıləyni ım be ki,bo har qıləy çi ilahə və rəbbun-novi nəzədə qəteydəbin.məsələn voşi ilahə ya həşi ilahə.və həmonə ilahəon çı mələkon toyfəku zıneydəbin.ayəon dəvomədə jıqo botılə əğedə inkor kardə holədə hamyedə: ehanə qıləy kəs jıqo qılə əğıdədə bıbu,əmə bəy şiddətinə cəzo bədomon. əvon oxo çoko jıqo qıləy yavə nisbəti doydən?

Çın ayəonku umutedəmon:

1-nəinki, peyğombəron,bəlkəm məlayikon həm əhle şəfoətin.həlbəttə ə şəxson bə şəfoəti şomil bəbeyn ki,Xıdovənd çəvon din iyən əğedəku rozi bıbu.

2-dini fərhənqədə harcurnə botılə əğedə iddioədə bıey,inov sıtəm hisob bedə.bəştə zılm və məxloği hidoyəri royədə bə ziyodə məşəğğəton tov vardə peyğombəron bıə zılm.