570-ə hissə-Ənbiya surə-38-41 şərifə ayəon

570-ə hissə

وَيَقُولُونَ مَتَى هَذَا الْوَعْدُ إِن كُنتُمْ صَادِقِينَ (38) 

(Kofiron)Voteydən: ehanə rost voteydon, çı ğıyoməti ım və`də keynə bome bərəse?

لَوْ يَعْلَمُ الَّذِينَ كَفَرُوا حِينَ لَا يَكُفُّونَ عَن وُجُوهِهِمُ النَّارَ وَلَا عَن ظُهُورِهِمْ وَلَا هُمْ يُنصَرُونَ(39) 

Əgər kofiron zınəyşonbe ə zəmon ki,(həmonə ruji) otəşi şoləon ıştə dim iyən peştiku bə diyəro kardey nibəzıneyn və bəvon hiç qıləy koməq nibəkay.

Vəynə proqramədə ərzımon karde ki,koforon əksəriyyət çı imoni əhli dəvəti mığobilədə jıqo voteydəbin:əmə imon nibəvamon.ehanə şımə Xıdo dılış heste bəmə cəzo bıdəy,çən boçi rəyrə əzobi bəçəmə soyəx vığandedəni?

In ayəon həm bə ım movzu işorə kardedə və hamyedə:ğıyoməti inkor kardə kəson çəy keynə bıeyku dəparseydən və əy çı imoni əhli ıştə iddio rost bıey şərt zıneydən. qıləy holədə ki,qıləy ko bə əməl ome faxti nızıne,bə həmonə ko bə əməl nıomey dəlil ni. ıştənən bə zəmon ki,bə ğıyoməti omey rəse,çandə qılə ağli dəlilon movcude və bəy təkid kardedən və qırd ilahi peyğombəron ki,ıştə zəmonə çı rostəti iyən dırıstəti ulquon bıən,çəy vucudiku xəbəşon doə.

Xıdovənde-Aləm ğıyoməti inkor kardə kəson cəvobədə hamyedə:ağl iyən məntıği ğəbul nıkardə kəson,fəğət otəşi şoləon əvoni əhotə və mıhosirə kardə vəəvon əyıştə dim iyən peştədə hiss kardə iyən əvoni sutunə faxti,əy ğəbul bəkan.əmmo həni bə zəmon di bəbe və bəçəvon holi hiç qıləy foydəş nibəbe və həni hiçkəs həm bəvon koməq kardey iyən əvoni çı cəhəndımiku peroxney əzıni.

Çın ayəonku umutedəmon:

1-kofiron ıştəni rostəvıj iyən mominon duəvıj zıneydən və qımon kardedən ki,hakəs çı ğıyomətiku qəp bıjəno,qıləy dıjdə duş votə.

2-kufr iyən ğıyoməti inkor kardey,həyğəti nızney nışonəy və peyğombəron iyən osmoniyə kitobon, dınyo iyən axırəti həyğəton bəyon kardey dumon.əmmo məxloği veyni bo ımi ğəbul kardey hozzı nin.

بَلْ تَأْتِيهِم بَغْتَةً فَتَبْهَتُهُمْ فَلَا يَسْتَطِيعُونَ رَدَّهَا وَلَا هُمْ يُنظَرُونَ (40) 

Bəlkəm, həmonə ruj ğəflətən bəçəvon soyəx bome bərəse və əvoni bə heyrət dəbənoe. çən(həni) nə əy dəf kardey zuşon bəbe və nə bəvon mohlət doey bəbe.

Vəynə ayəon dəvomədə ki,otəşi şoləon çı cəhəndımi əhli əhotə kardeyku bəhs kardedəbe, ın ayə hamyedə: uxrəviyə koon ki,de mardey bino bedə,qırd əvon ğəflətən bəbe. hiçkəs ıştə mardey zəmoniku xəbəş ni və əv ənəxəbədə bome bərəse. bərzəxiyə cəzoon ki,mardey bədiqə bino bedə və cəhəndımi əzobon ğıyomət bərpo bıey bədiqə bino bəbe və kofir iyən zolımon coni bəstəne və ım zəmoni çı naviku təyin kardey nibəbe və çəy vey muhim çi əy oqordıney iyən bə təxir eğandey həm nibəbe.əmmo qınokoron bə ilahi cəzoon ım xısusiyyəton hiç qıləy dığğət kardedənin.

Çın ayəku umutedəmon:

1-bə kofiron mohlət doey,Xıdovəndi dınyoədə bıə adət və sınnəte,əmmo axırətədə həni bəvon mohlət və fırsət doey nibəbe.

2-ımruj ıştəni elmi əhl zınə kəson və eyni holədə ğıyoməti ruji ğəbul nıkardə kəson, de ğıyoməti ruji əsəron vindey heyrətədə bəbeyn və çəvon ağl iyən fik həni ko nibəkay. 

وَلَقَدِ اسْتُهْزِئَ بِرُسُلٍ مِّن قَبْلِكَ فَحَاقَ بِالَّذِينَ سَخِرُوا مِنْهُم مَّا كَانُوا بِهِ يَسْتَهْزِئُون (41) 

(Ha peyğombər ha! norohət məbi!)Bə ıştı bənav bıə rəsulon həm istehzo və məsxərə kardedəbin. əmmo oxoyədə çəvon məsxərə kardə çiyon çəvon(məsxərə kardə kəson) dovnəş qəte(əvonış məhv karde).

Im ayə bə peyğombər(s)-i dılvandi iyən təsəlli doə holədə hamyedə ki,ehanə Məkkə mışrikon bəştı sıxan iyən  doə və`dəon məsxərə kardeənbu,hiç norohət məbi. zira ıştı bənav bə çəmə vığandə peyğombəron həm məxloğ hejo istehzo kardedəbin və əvoni bə ləğ noydəbin.əmmo çəvon ım nodon və cohilonə rəftoron bəvon hiç qıləy foydəş nıbe və əvon ya bın dınyoədə və ya mardey bədiqə bə ilahi şiddətinə əzobon giriftor bin.

Vey muhimmə məsələ çı navkonə peyğombəron ıştə royədə istiğomətin və sabit ğədəməti bıə. əvon bəştə mıxolifon təhğır iyən məsxərə xoto,hiç faxti ıştə qətə royədə sıst nıbin iyən ıştə həxə sıxaniku dastışon nıkəşe və ım bəbe boçəvon tərəfdoron qıləy ulqu bıbu.

Çın ayəku umutedəmon:

1-məntıği əhl nıbə kəson,çı peyğombəron məntığinə dəvəton mığobilədə,bəvon ləğ-ləğə iyən məsxərə kardedəbin.ımruj həm de ğələm iyən sıxani ozodəti bəhonə, karikaturə və hınə əsəron ğalibədə qıləy məğalə və kitob nıvışteydən və bə osmoniyə dinon mığəddəsə çiyon istehzo kardedən.

2-qahi faxti çı dəvardə peyğombəron kəşə muşkilat iyən əzobon,roy boçəvon həyğiyə tərəfdoron hoston kardedə.