572-ə hissə-Ənbiya surə-46-50 şərifə ayəon

572-ə hissə

وَلَئِن مَّسَّتْهُمْ نَفْحَةٌ مِّنْ عَذَابِ رَبِّكَ لَيَقُولُنَّ يَا وَيْلَنَا إِنَّا كُنَّا ظَالِمِينَ (46)

Qıləy holədə ki, əgər ıştı pərvərdıqori əzobi bu bəvon bırəso, hukmən bəvoteyn: vay bıbu bəmə! Həyğətən, əmə sıtəmkor bimon.

وَنَضَعُ الْمَوَازِينَ الْقِسْطَ لِيَوْمِ الْقِيَامَةِ فَلَا تُظْلَمُ نَفْسٌ شَيْئاً وَإِن كَانَ مِثْقَالَ حَبَّةٍ مِّنْ خَرْدَلٍ أَتَيْنَا بِهَا وَكَفَى بِنَا حَاسِبِينَ (47) 

Və əmə ğıyoməti ruji ədoləti tavzoon bərpo bəkamon. çən,(həmonə ruji) bə hiçkəsi hiç qıləy zılm nibəbe. və əgər qıləy əməl xardəli donə vəznədə(həm) bıbu, əmə əy(bo mıhosibə) bəvardemon. və(mıhosibədə bıə dığğət) kifoyət kardedə ki, əmə bə hisobi rəsedəmon.

Vəynə proqramədə votemone ki, ğıyoməti ruji inkor kardə kəson,bə məğrurəti iyən ğəfləti dıço bin və əvon nə ıştə mardey vindedən və nə çı peyğombəron sıxani məseydənıbin. ın ayəon hamyedə:əgər  dınyoədə ilahi əzobiku i hissə bəçəvon soyəx boy, əvon çı ğəfləti haniku oğo bəbeyn və qıno karde iyən bə əmri nıpemandey etırof bəkan.əmmo çı ilahi peyğombəron məntığ iyən həxə sıxan bəvon təsir nibəkay və əvon pand nibəqəteyn.həlbəttə ım bə dınyo jimoni ayide və axırəti ruji hakəs bəştə əməlon mutənosib cəzo bəvinde.qıləy məhkəmə təşkil bəbe ki,çı insoni əncom doə və çəy nameye-əmələdə nıvıştə bıə qırd əməlon,hətta vey qədə koonku həm mıhosibə və sıvol-cəvob bəbe.

Isət insoni əməlon ğıyoməti ruji de çiçi bəpamuen,vey əcibe.rəvoyətonədə bə peyğombəron, imomon,saleh iyən pokə fərdon işorə bıə ki,əvon komilə insononin və çı cokəson əməlon deçəvon əməlon mığoyisəbəbe və bəvon ğıymət doey bəbe.

Çın ayəonku umutedəmon:

1-dınyoədə bə ilahi əzobi giriftor bıey,insoni bə etırof iyən uzrxahəti vodor kardedə. əmmo əgər mığət məbəmon,ijən bə ğurur və ğəfləti dıço bəbemon və çəmə qıno bo vey sanqin bəbe.

2-Xıdovənd həm alime,həmən adil.liza hiç qıləy əməl çəy mıtləğə elmiku məxfi ni və ğıyomətədə əv bəştə ədoləti əsos cəzo ya mıkofot bədoe.

وَلَقَدْ آتَيْنَا مُوسَى وَهَارُونَ الْفُرْقَانَ وَضِيَاء وَذِكْراً لِّلْمُتَّقِينَ (48) 

Və həyğətən, əmə bə Mosə və Haruni Furğan, nur(ruşnəəbaxş) və bo təğva əhli qıləy pand-nəsyət əto kardemone.

الَّذِينَ يَخْشَوْنَ رَبَّهُم بِالْغَيْبِ وَهُم مِّنَ السَّاعَةِ مُشْفِقُونَ (49) 

(Həmonə)Şəxson ki, ıştə pərvərdıqoriku məxfiyə holədə(əy nıvində holədə) tarseydən və ğıyomətiku tarsışon heste.

Vəynə ayədə çı tohid iyən ğıyoməti ruji barədə mətləbon bəyoni dəvomədə,çın ayə bədiqə çı kali ilahi peyğombəron jimoni barədə icmoli surətədə bəhs kardedə.ın ayəon bə Mosə(ə)-i nozil bıə Tovrati kitobi işorə kardedə.

Osmoniyə kitobon,min cumlə Kərimə-Ğıron seqlə xısusiyyətışon heste.əvon çı həxı de botıli miyono fərğ noydən və bə Xıdo rəsə ro, çı co qıləy roonku co kardedən. peşonə mərhələdə roy mıəyyən kardey bəpeştə səhihə royədə hərəkət kardeyro, bə qıləy nur iyən ço ehtiyoc heste.osmoniyə kitobon həyğətədə həxə roy nışon doə nur və ruşnən.seminə mərhələdə bo əkəsone ki,həxə roysən və çı nuri şua kəno hərəkət kardedən,əmmo çı fırsiye və ğəfləti mə`rəzədə ğərolışon qətə və osmoniyə kitobon bəvon pand və nəsyət doydən.

Ayə dəvomədə pərhizkor iyən mıttəğiyon vəsf kardə holədə hamyedə:çəvon bə Xıdo bıə imon anəndə zumande ki,hətta məxfiyə holədə əy ıştə səy sape hazıro-nazir vindedən və çı yavə və bə xoş nomə koonku bə diyəro mandedən.zira əvon ıştə koy ağıbət iyən ğıyoməti rujiku tarsışon heste.

Çın ayəonku umutedəmon:

1-şəryət və kitobi soyb bıə peyğombəron məhdud bıən və co peyğombəron çəvon kitob iyən dinon mıbəlliğon və təblığəkəyon bıən.çoko ki,Harun(ə) çı Tovrati maarifi bə məxloği rosneydəbe.

2-məxloği miyono ıştə rəftoron kontrol kardey,fi nəfsih yəni (ıştən-boştə) çı təğvanin bıey dəlil ni.vey mumkine şəxson heste ki,çı məxloği palu boştə abır-həyo oqəteyro, çəvon tono ıştə əməloon kontrol kardedən.həyğətədə çı təğva əsliyənışonə,məxfiyə holətədə Xıdoku tarseye və əy sovə Xıdo hiçkəs zınedəni və vindedəni.

وَهَذَا ذِكْرٌ مُّبَارَكٌ أَنزَلْنَاهُ أَفَأَنتُمْ لَهُ مُنكِرُونَ (50) 

Və ın(Ğıron) çəmə boşımə nozil kardə qıləy mıborəkə zikre. ayə əy inkor kardedon?

Osmoniyə kitobon vey muhimmə xısusiyyəton,zikr iyən bə yod dənoeye.qıləy bə yod dənoey ki, Xıdovəndi çı qırd insonon fitrətədə əvış noə və de insoni nəfsoniyə həvəson əvış puşniyə. əve əv bə insoni ğəfləti boyis bedə.

Ilahi peyğombəron həm de ım məğsədi omən ki,de pand və xəbərdorətiyon insoni həmonə fitrəti çı ğəfləti haniku oğokəyn.əvon bəçəy xoto vıjniyə bıən ki,bə qırd insonon xoş omə çok və ğəşənqə koon camiyədə pevolokəyn və çı har insonon nifrət kardə yavə çiyon əncom doey vəy qətey bıbu.de ın holi ziyodə insonon bəştə inodkorəti xoto ilahi peyğombəron inkor kardedən iyən həxə sıxanon ğəbul kardedənin.

Çın ayəku umutedəmon:

1-ehanə Ğıroni tilovəti zəmon,pand qətey məğsədımon bıbu,ım kitob bo əmə vey foydənin iyən mıborək bəbe.

2-ilahi peyğombəron iyən osmoniyə kitobon inkor kardey,həyğətədə  boçəmə qırd cismoni iyən ruhi noxəşətiyon mualicə kardeyro bıə və insoni çı təkəbbırəti, məğrurəti və ğəflətiku oğo kardə, qıləy dıləsutə doktori şifobaxş kardə nusxə rədd kardeye.