580-ə hissə-Ənbiya surə-89-94 şərifə ayəon

580-ə hissə

وَزَكَرِيَّا إِذْ نَادَى رَبَّهُ رَبِّ لَا تَذَرْنِي فَرْداً وَأَنتَ خَيْرُ الْوَارِثِينَ (89)

Və Zəkəriyya(bə yod dənə) bə zəmon ki, ıştə pərvərdıqorış vanq je: Xıdolim ha! mıni coyli(be varis) məhaşt və tı ıştən varison vey çokə qıləş.

فَاسْتَجَبْنَا لَهُ وَوَهَبْنَا لَهُ يَحْيَى وَأَصْلَحْنَا لَهُ زَوْجَهُ إِنَّهُمْ كَانُوا يُسَارِعُونَ فِي الْخَيْرَاتِ وَيَدْعُونَنَا رَغَباً وَرَهَباً وَكَانُوا لَنَا خَاشِعِينَ (90)

Çən, əmə çəy(dıvo) mıstəcob(ğəbul) kardemone. və Yəhyaro bəy baxş kardemone iyən çəy jimoni həmro(ki, beson be) boəy ləyoğətin ğərol domone. (ım bəçəyroe beki)həyğətən, əvon çokə koonədə bənav dəşedəbin və(əvon) əməni de umud iyən tarsi vanq jedəbin və çəmə mığobilədə muti(təvazukor) bin.

Navnə bərnomədə bənə Əyyub(ə) iyən İdris(ə)-i bıə peyğombəron sərquzəşton bəyon be. ın ayəon bə həzrəte Zəkəriyya(ə) iyən çəy fərzənd bıə Yəhya(ə)-i macəra işorə kardedə. çoko ki,Kərimə-Ğıroni co ayəonədə həm omə,həzrəte Zəkəriyya(ə) bə piyə merdəti faxto oməbe rəsəbe,əmmo çəy hənuz həm fərzəndış nıbe.zira çəy jimoni həmro beson be və ovladış bedənıəbe.ə həzrəti Xıdovənde-Aləmiku xahişış karde ki, bəy qıləy fərzənd ətokəy ta çəy ro iyən məktəbi dəvom bıdəy və çəy təblıği koon bə oxo bırosni.

Xıdovənd çəy dıvoş icobət karde iyən çəy jeni əğıl nıbe işkiliş bərtərəf karde.bəy qıləy fərzəndış əto karde ki,çəy nom Yəhya be.ayəon dəvomədə bə ım ilahi xıyzoni xısusiyyəton işorə kardedə və hamyedə:əvon qırd holədə,ısət çı saxtəti ya rifoh bıbu,dıvo iyən de Xıdo razo-niyozi əhl bin və hejo bənə bə ehtiyocinə şəxson iyən dastışon təyli bıə kəson koməq kardey bıə çokə koonədə əvon bənav dəşeydəbin.

Çın ayəonku umutedəmon:

1-hiç qıləy holədə Xıdoku bəbe məyus nıbu.çəmə vəzifə dıvo kardey və ıştə koon anqıli oj kardey xahişi kardeye.ehanə Xıdo məsləhət bızıno,çəmə dıvoon icobət bəkay.

2-çokə xeyzon, qıləy ayləy ki,çəy əzo mıştərəkə surətədə çokə ko əncom doydən və hiçfaxti beçizə insonon çı yodo bekardedənin.

وَالَّتِي أَحْصَنَتْ فَرْجَهَا فَنَفَخْنَا فِيهَا مِن رُّوحِنَا وَجَعَلْنَاهَا وَابْنَهَا آيَةً لِّلْعَالَمِينَ (91) 

Və(bə yod biyə Məryəmi ə) jeni ki, ıştə isməti çı qınonku pok oqətedəbe. çən, əmə ıştə rufiku bəy pu kardemone. və əv iyən çəy zoə(İsa-Məsih) bo aləmon məxloği qıləy nışonə ğərol domone.

Həzrəte İsa(ə) çı islomi peyğombəri bənav bıə silsiləvari peyğombəron oxonə qıləy. ın ayə bə ə həzrəti təvəlludi macəra işorə kardedə və hamyedə:həzrəte Məryəm(ə)-i pokdovnəti,ismətin iyən abru-həyo soyb bıey və ruhi cəhəto pokəti, qılıy zəminəş hozzı karde ki,Xıdovənde-Aləm deştə firiştə vositə bəy pu kardeşe və əv dıconi be və çəyku bənə İsa-Məsih(ə)-i qıləy fərzənd bə dınyo ome.

In ayəon ki, Ənbiya surə sıftəku bə ilahi peyğombəron işorə kardedə,oxoyədə həm bə həzrəte Məryəm(ə)-i əzəmət,ismət və pokdovnəti işorə kardedə.ım bəçəy xotoe ki, təsəvvır nıbu ki,fəğət merdon bə ilahi ğorb və nezəti məğami rəseydən. bəlkəm, jenon həm deştə ləyoğəti Xıdovəndi palu bə barz və yolə məğami soyb bıey bəzıneyn iyən de ın məğamon kəsb kardey,ilahi məxsusə inoyətonku istifodə kardey bəzıneyn.tosə əvrə ki,oxoyədə çəvon nomon çı ilahi peyğombəron kənoyədə bo qırd dınyo məxloği ulqu unvanədə ğeyd bedə.

Çın ayəku umutedəmon:

1-jenı-merd ilahi iyən insoniyə kəmoləton kəsb kardeyədə fərğışon ni və kardey bəzıneyn bə ali mənəvi iyən insoniyə məğamon nayil bıbon.

2-moə iffət və pokdovnəti çə xısusiyyətonkue ki,ıştə fərzəndi hərəbaxtətiyədə veyə təsirıış heste.

إِنَّ هَذِهِ أُمَّتُكُمْ أُمَّةً وَاحِدَةً وَأَنَا رَبُّكُمْ فَاعْبُدُونِ (92) 

(Ha məxloğ ha!) Şək ni şımə ım ummət qıləy vahidə umməte. və az şımə pərvərdıqorim. çən, bəmı pərəstışkənən.

وَتَقَطَّعُوا أَمْرَهُم بَيْنَهُمْ كُلٌّ إِلَيْنَا رَاجِعُونَ (93) 

Və əmmo əvon(məxloğ) ıştə miyono bə təfrığə poə bin. (və əvon bəbe bızınon oxoyədə) qırd  bəçəmə tərəf obəqardeyn.

Çın ayəon oxoyədə ki,çandə qılə ilahi peyğombəron nom aşmardey be,ın ayəon hamyedə: qırd peyğombəron iqlə vahidə ummətiku bıən və əvon həmmə iqlə hədəfi dumo bıən.harçənd çəvon zəmon iyən şərayiton fərğ kardedən və har qıləyni boştə ğovmon mıxtəlifə bərnoməonışon bıə.çəvon həmməy ko məxloği bə tohidi tərəf dəvət kardey iyən de zılm,şırk və kufri mıborizə bardey bıə.qırd əvon məxloğışon bə vahidə Xıdo pərəstış kardey səloşon jıə və sovə Xıdo ısət harçi həm bıbu, pərəstış kardeyku nəhyışon kardə.əmmo milləti veyni çı ənbiya və peyğombəron xəttiku fosilə qətəşone və bə təfrığə iyən ixtilofi dıço bıən.əvon bə tohidi etığod bıey əvəzi,bə de şırk iyən kufri aludə bıə əğayidon giriftor bıən və çı həxə royku mınhərif bıən.

Çın ayəonku umutedəmon:

1-qırd ilahi peyğombəron din iyən ayin iqlə bıə və əvon həmmə çı iqlə məğsəd və hədəfi dumo bıən.

2-həmmə dinon mesaj,tohide və dini-islom qırd dinon tərəfdoron bə vəhdət iyən tohidi dəvət kardedə.əmmo çə dinon tərəfdoron bə mıxtəlifə təfrığə roon təğsım bıən.

فَمَن يَعْمَلْ مِنَ الصَّالِحَاتِ وَهُوَ مُؤْمِنٌ فَلَا كُفْرَانَ لِسَعْيِهِ وَإِنَّا لَهُ كَاتِبُونَ (94) 

Çən, hakəs momin bıə holədə çokə koon əncom bıdo, çəy zəhmət qim nibəbe(ıştə mıkofoti bəstəne) və həyğətən, əmə(çəy çokə koon) boəy bənıvıştemon.

Xıdovənde-Aləmi ğanun və adətonku qıləyni,bə çokə ko soybon mıkofot doeye. vey əcibə ko ıme ki,Xıdovənd de çokə ko xıvandon rəftorədə,ıştəni bəvon təşəkkurəkə unvanədə təğdım kardedə və hamyedə:qımon məkən ki,az şımə çokə koon çı yodo bebəkam və bəşmə təşəkkur nibəkam.ne,jıqo ni! bəlkəm,az şımə qırd çokə koonku xəbəm heste və çəy faxtədə şımə əcr iyən mıkofoti bəşmə əto bəkam.

Kərimə-Ğıroni mıxtəlifə ayəonədə adətən qırd çokə koon əncom doey,bə Xıdo imoni şərt hisob kardedə.əmmo ın ayədə hamyedə:əgər qıləy mominə şəxs kali çokə koon həm bə əməl biyəy,çəy əməli Xıdovənd ğəbul bəkay və əy çəy nameye-əmələdə ğeyd bəkay,bənıvışte.

Çın ayəku umutedəmon:

1-insoni iyən əxloğiyə koon,dini islomədə hejo sitoyiş bıə iyən bə təğdıri loyığ vindey bıə. əmmo de ın şərti ki,ım çokə ko əncom doə kəsi niyyyət,Xıdo rizoyəti cəlb kardey bıbu.

2- ilahi ideoloqiyədə,bə har qıləy çok və foydəninə ko,Xıdovənd cəvob doydə və çəy əvəzi əto kardə.harçənd co kəson əy nıvindon iyən nıməson.