583-ə hissə-Ənbiya surə-105-108 şərifə ayəon

583-ə hissə

وَلَقَدْ كَتَبْنَا فِي الزَّبُورِ مِن بَعْدِ الذِّكْرِ أَنَّ الْأَرْضَ يَرِثُهَا عِبَادِيَ الصَّالِحُونَ(105) 

Və həyğətən, əmə çı Zikri(Tovrati) bədiqə bıə Zəburədə həm nıvıştemone ki, hukmən çımı salehə bandəon zəmini varison bəbeyn.

Navnə proqramədə ğıyoməti rujədə vəhışt iyən cəhəndımi əhli vəzyəti barədə be və Xıdovənde-Aləm bo muminon dınyo iyən axırətədə çokə ağıbəti bəşorətış doe.ın ayə çə bəhsi dəvomədə hamyedə:nəinki, həzərte Mosə(ə)-i kitob bıə Tovratədə  bəlkəm, həzrəte Davud(ə)-i kitob bıə Zəburədə həm bəyon kardemone ki, vəomyədə zəmini dim bə salehə şəxson məxsus bəbe iyən əvon çı zəmini dimisə hukumət bəkayn.

Davud(ə)-i Zəbur ki,Əhde-Ğədimədə de  “Məzamiri-Davudi” unvani  omə,çı Davud (ə)-i dıvo,mınocot iyən nəsyətonku iborət qıləy məcmuə kitobe.Zəburi penc qılə vırədə çı salehə şəxson zəmini dimisə hukumət kardey barədə bıə ilahi və`dəon movcude. həzrəte Davud(ə) çı Bəni-İsrayili yolə peyğombəronku be ki, hukumətış təşkilış doe iyən Şami sərzəminədə  çı salehon hukuməti nımunəş bə nımoyiş noşe. bə motəbərə rəvoyəton əsos axırəz-zəmonədə de Xıdo-Rəsul(s)-i nəsliku bıə həzrəte Məhdi (əc) dasti qıləy hukumət bərpo bəbe ki,ə həzrət qırd dınyo de ədoləti pur bəkay və çı zolımon rəğ-rişə bəbırniye.

Çın ayəku umutedəmon:

1-Kərimə-Ğıron iyən navnə osmoniyə kitobon çı naviku dınyo barədə sıxanışon votə iyən zəmini dimisə salehə bandəon hukumət kardey barədə xəbəşon doə.

2- bə dınyo hukumət kardey dıqlə şərtış heste,qıləyni Xıdovəndi ğanunon mığobilədə təslim beye iyən co qıləyni bo hukumət kardeyro elm iyən əməliyə ləyoğəti movcud bıeye.

إِنَّ فِي هَذَا لَبَلَاغاً لِّقَوْمٍ عَابِدِينَ (106) 

Həyğətən, bın kitobədə bo Xıdopərəstə məxloği qıləy ruşinə xəbə heste.

Vəynə ayə dəvomədə ın ayə hamyedə:Xıdovəndi salehə bandəon bıznon ki,fəğət de ibodəti nibəbe hukuməti çı zolımon dastiku bıstəni və bə hukuməti taxti bınışti. bəlkəm, bəbe təloşkəy və bo dınyo iştimaiyyəti idorə kardey xoto lozımə səlohiyyəton  bə dast biyəy.ısət çı bənə elm iyən təğva bıə ləyoğəton və ya çı bənə fərhənqi, siyosi iyən ixtisodi sektoronədə camiyə koon tədbir kardey bıə sosyal ləyoğəton.

Çın ayəku umutedəmon:

1-zəminisə hukumət kardey çı mumin iyən salehə bandəon həxe nəinki,ğarətgər  və ğoldorə insonon. binobərin imoni əhl bəbe bo hukumət iyən ğudrəti bə dast vardey cəhdkəy.

2- bo imoninə fərd iyən camiyə lozım bıə çiyon Xıdovəndi osmoniyə kitobonədə ım xəbəş rosnənəşe və imoninə şəxson ilahi mesajon zıney iyən bəy əməl kardey boştə qıləy vəzifə zıneydən.

وَمَا أَرْسَلْنَاكَ إِلَّا رَحْمَةً لِّلْعَالَمِينَ (107) 

Ha pəyğombər ha! əmə tınımon bo qırd aləmon ğərəz rəhməti co çi nıvğandemone!

Zəmini dimisə imoni əhli bə hukumət rəsey barədə bıə bəşorəti dəvomədə ın ayə hamyedə: Peyğombəre-Əkrəm(s)-i besət ki, de ə həzrəti canişinon dınyoədə hukumət kardey bə oxo bərəse,bo həmmə aləmon qıləy rəhmət bəbe .boştə şəxsi iyən partiyə mənafeyon dumo hərəkət kardə hukuməton əks,salehə bandəon bə Xıdo məxloği xıdmət kardey dumon iyən əvon camiyə həmmə səthədə ədoləti bərğərol kardey fikərdən. jıqo hukumətədə hətta kofiron həm çı əmniyyət və oroməti sayədə həmonə camiyədə  jiyedən və bəvon əyo zılm bedəni.

Umumən peyğombəron vucud,bo qırd məxloği ısət çı mumin bıbu ya kofir,qıləy rəhməte. çun əvon ğərəz Xıdo tələbon co çi icro kardedənin. Xıdovənd həm bəştə qırd bandəon nisbətədə rəhmətış heste iyən çəvon xəy isloh iyən səodətış piyedə. həlbəttə hejo çı məxloğiku i dastə ıştə xəy iyən hərabaxtəti zıneyədə bə səhvi dıço bedən yaan ki,bəştə inodkorəti xoto bo həx iyən həyğəti ğəbul kardey hozzı nin və zıne-zıne ya nızne-nızne bəştə zərəl rosnedə.

Çın ayəku umutedəmon:

1-Xıdovəndi tərəfiku bo məxloğoi bə islomi peyğombəri(s) rosnə bıə çiyon bo bəşəri camiyə nicot iyən baxtəvətrit xotoe.

2-həzrəte Muhəmməd(s) bo qırd aləmon omə oxnə peyombəre nəinki,bo qıləy ğovm ya milləti. lzia dini ioslmi təlim və bərnoməon bə qırd dınyo şomile,nə inki bə qıləy məxsusə məntəğə.

قُلْ إِنَّمَا يُوحَى إِلَيَّ أَنَّمَا إِلَهُكُمْ إِلَهٌ وَاحِدٌ فَهَلْ أَنتُم مُّسْلِمُونَ (108) 

Ha pəyğombər ha! bə məxloği vuji: bərosti bəmı vəhy bedə ki, şımə Xıdo qıləy vahidə Xode. ayə təslim bedon iyən islom vardedon?

Vəynə ayə Xıdo-Rəsul(s) vucudi bo qırd milləton qıləy rəhmət elan kardədebe.ın ayə bə ilahi peyğombəron vey muhim iyən əsosə sıxani,yəni məxloği bə tohidi tərəf dəvət kardey kəlimə işorə kardedə  və hamyedə: peyğombəron millət bəştə tərəf səlo jedənıbin, bəlkəm bə Xıdo tərəf iyən boəy pərəstış kardey dəvət kardeydən ta əvon həni de bıtpərəstəti iyən xorafati məşğul nıbon.

de qıləy co bəyoni ilahi rəsulon milləti bə i bıə Xıdo itoət kardey səlo jedəbin iyən həyğətən əvoni çı sultəgər,ğarətgər və zılmkorə hukumətonku ozod kardey fikədə bin.

Çın ayəku umutedəmon:

1-məxloği bə tohid iyən vahidə kəlmə tərəf səlo jıey,ilahi rəhməti zəminədə bıə qıləy cilvəy.

2-ilahi əmron mığobilədə təslim bıey,bə tohidi etığodi şərte.şəkk ni imon çı əməliku co ni.