594-ə hissə-Həcci surə-46-51 şərifə ayəon

594-ə hissə

أَفَلَمْ يَسِيرُوا فِي الْأَرْضِ فَتَكُونَ لَهُمْ قُلُوبٌ يَعْقِلُونَ بِهَا أَوْ آذَانٌ يَسْمَعُونَ بِهَا فَإِنَّهَا لَا تَعْمَى الْأَبْصَارُ وَلَكِن تَعْمَى الْقُلُوبُ الَّتِي فِي الصُّدُورِ (46)‏

Bəqəm əvon zəmini dimisə seyr nıkardeşone ta çəvon fik kardə dılon iyən məsə quşışon bıbu ki, həyğəton dərkkəyn. həlbəttə çəvon çəşon ku nin, əmmo şəvon sinəonədə bıə dılon kue.

Vəynə ayədə bə çandə qılə ğovmon sərnıvışt iyən tale işorə be ki,Xıdovənd bəçəvon zılm iyən sıtəmi xoto,çəvon şəhro-diyoron bəçəvon sə rıjniyeşe.ın ayə hamyedə: həmonə sıtəmkoron bəştə dəvardə tarıxi diyəşon nıkarde və çəyku ibrət penıqətışone. əgər çəvon çəş,quş iyən ağlon həyğətışon vindəbe və ğəbulışon kardəbe, bə jıqo yavə ağıbəti dıço nıəbin.

Əvon çı sultan iyən podşoon viron bıə sarayon vindedəbin,əmmo ijən ıştə sıtəmonku dast peqəteydənıbin və çı ziyodə ğudrət iyən sərvəti dumo bin.çəvon çəşon vindedəbin, əmmo çəvon dılon bo həyğəton ğəbul kardey hozzı nıbin,əve çəvon oxo jıqo orəxe.çəvon quşon dəvardə hadisəonışon məsəbe,əmmo ıştə ağli nido iyən sədo məseydənıbin.jıləvoni tarıx tikror bedə.əvon çı dınyo zohiri vindedən iyən məseydən, əmmo əvon həyğətədə ku iyən kor bıən ki,həyğətonışon vindəni iyən məsəşon ni.

Çın ayəku umutedəmon:

1-bo navkonə bəşər və milləton tarıxi çok-çoki zıneyro iyən çəvon ağıbətiku ibrəti dərsi peqətey, səyohət iyən zəmini dimisə qardey,qıləy mənfəətin iyən erjinə koe.

2-zılm iyən sıtəm, ko bə vırə rosneydə ki,inson həyğəton ya vindedəni və ya əgər bıvindo iyən dərəso həm, ğəbul kardedəni.

وَيَسْتَعْجِلُونَكَ بِالْعَذَابِ وَلَن يُخْلِفَ اللَّهُ وَعْدَهُ وَإِنَّ يَوْماً عِندَ رَبِّكَ كَأَلْفِ سَنَةٍ مِّمَّا تَعُدُّونَ (47) 

Əvon ıştıku təcili əzobi omey tələb kardedən. qıləy holədə ki, Xıdovənd hiçfaxti bəştə və`də xilof beşeydəni və həlbəttə ıştı pərvərdıqori palu iqlə ruj şımə hisob kardə həzo sori əndozədəy.

وَكَأَيِّن مِّن قَرْيَةٍ أَمْلَيْتُ لَهَا وَهِيَ ظَالِمَةٌ ثُمَّ أَخَذْتُهَا وَإِلَيَّ الْمَصِيرُ (48) 

Və əmə bə veyə məmləkəton çəvon əhali sıtəmkor bıey holədə bəvon mohlət domone(əmmo əvon boştə islohiro oko nıdoşone və bəştə kufri isror kardeşone) peşo(əvonro) deştə ğəzəbi qətemone. və(çı həmməy) oqardemon bəçımı tərəfe.

Peyğombər(s) bə mışrikon çəşnavi doə faxti ki,şımə mığət bıbənən və bənə navkonə milləton bə ilahi ğəzəbi giriftor məbənən,əvon bə peyğombər(s)-i sıxanon quş doey əvəzi, məsxərə kardə holədə voteydəbin ki,ehanə kardey zıneydəşbu ıştə Xıdokuhəm tələbkə ki, çanədə rə bəmə qıləy əzob bıvğando.Xıdovənd çəvon cəvobədə hamyedə:dastpoçə məbənən.zira Xıdovənd bə navkonə zolım iyən kofiron həm bilofosilə əzobış nıdoe,bəlkəm bəvon mohlətış doe ki,ğasbu əvon ıştə yavə royku oqardon və tobəkəyn. əmmo çoko ki,məlum be əvon ıştə botılə royədə isror kardedən və hozzı nin ıştə botılə koonku dast bıkəşon,Xdıovənd əvonış muaxizəş karde və əvonış bəçəvon cəzoş rosne.

Bın ayəonədə bə qıləy zərifə nuktə işorə bıə.əv həm ıme ki,şımə insonon palu həzo sor çı Xıdovəndi palu iruji miğdorədə həm ni və şımə ım dastpoçəti bemənoe. Xıdovəndi tonoku isaat,iruj ya i sor fərğ kardedəni və hafaxti çəvon mohlət bə oxo bırəso, əvon bə ilahi ğəhro-ğəzəbi dıço bəbeyn.çoko ki,navkonə umməton həm ıştə peyğombəronku ım çi tələb kardebəbin və voteydəbin:ehanə rost voteydəşbu,ıştı Xıdo əməni bəçəmə cəzo bırosni.əmmo əvon bə əzobi giriftor bıeydə həni boçəvon fərol kardey xoto co qıləy ro nımande.

Çın ayəonku umutedəmon:

1-bə əzobi omey iyən rə bıey şəkk kardey əvəzi,Xıdovəndi çəmə ixtiyorədə ğərol doə fırsətiku çok istifodəkəmon iyən ilahi rəhmətiku bəhrə bobəmon.

2-Xıdovəndi deştə mığoyisə məkəmon.çəy rəhmət bəsə çəy ğəsəbisə bənave iyən inson qıno kardə faxti rəyrə bəy cəzo doydəni.

قُلْ يَا أَيُّهَا النَّاسُ إِنَّمَا أَنَا لَكُمْ نَذِيرٌ مُّبِينٌ (49) 

(Ha pəyğombər ha!)Vuji: həyğətən, mı boşımə qıləy ruşinə çəşnavi doəkəsim.

فَالَّذِينَ آمَنُوا وَعَمِلُوا الصَّالِحَاتِ لَهُم مَّغْفِرَةٌ وَرِزْقٌ كَرِيمٌ (50) 

Çən, imon vardə kəson iyən çokə əməl əncom doəkəson, boəvon baxşeş iyən çokə rızğo-ruzi bəbe.

وَالَّذِينَ سَعَوْا فِي آيَاتِنَا مُعَاجِزِينَ أُوْلَئِكَ أَصْحَابُ الْجَحِيمِ (51) 

Və çəmə ayəon inkori(koyədə) cəhd kardəkəson və jıqo fik kardeydən ki, əməni ociz kardey bəzıneyn, əvon cəhəndımi əhlin.

Dəvardə bərnoməonədə ərzımon karde ki,kofiron de məsxərə və istehzo bə peyğombər(s)-i voteydəbin ki,ehanə tı ıştə iddioədə rostişbu,Xıdoku boəmə əzob tələbkə. ın ayə hamyedə:çı peyğombəron ko çəşnavi doeye,nəinki,cəzo doeye.əvon məxloği moyizə iyən irşod kardedən və çəvon çok iyən yavə koon təsiri bəyon kardedə ta məxloğ ıştə yavə koon ağıbətiku aqah bıbon və deştə aqahəti ıştə roy intixob kardedən. peyğombəron çı xəbərdorətiyonsə əlovə,bəşorət həm doydəbin. əvon bə kofiron bəşorət doydəbin ki,ehanə ıştə nəğbətəti iyən kəcbəsətiku dast bıkəşon və imon biyən,Xıdovənd həm şımə dəvardə qınoon bəbaxşe iyən həm dınyo və axırətədə ilahi erjin iyən məxsusə nemətonku bəhərə bəbardiyon.əmmo ehanə şımə ıştə botılə royku dast nıkəşon iyən Xıdo kitobi mığobilədə bımandon və qımonkoyn ki, bın koyədə mıvəffəğ bəbiyon,dınyoədə həm bə qıləy nəticə nibərəsiyon. hətta axırətədə həm şımə bə cəhəndımi otəşi dıço bəbiyon.

Çın ayəonku umutedəmon:

1-peyğombəron nə məxloği bo dini ğəbul kardey xoto məcbur kardedəbin və nə əvon bə kofiron cəzo doydəbin.çəvon vəzifə məxloği irşod iyən təblığ kardey bıə.

2-peyğombəron de ruşinə zıvon iyən dərəsə formədə de məxloği sıxan kardedəbin, nəinki, nıdərəs və mırəkkəbə formədə.

3-kofiron de ilahi dinon mıborozə royədə ziyodə cəhdon kardedən ta mominon məğlubkəyn. çən.mominon həm bəbe de ruşinə dəlil iyən məntıği bəbe ıştə dini mıdofiyəkəyn.