599-ə hissə-Həcci surə-72-76 şərifə ayəon

599-ə hissə

وَإِذَا تُتْلَى عَلَيْهِمْ آيَاتُنَا بَيِّنَاتٍ تَعْرِفُ فِي وُجُوهِ الَّذِينَ كَفَرُوا الْمُنكَرَ يَكَادُونَ يَسْطُونَ بِالَّذِينَ يَتْلُونَ عَلَيْهِمْ آيَاتِنَا قُلْ أَفَأُنَبِّئُكُم بِشَرٍّ مِّن ذَلِكُمُ النَّارُ وَعَدَهَا اللَّهُ الَّذِينَ كَفَرُوا وَبِئْسَ الْمَصِيرُ(72)‏

Çəmə ruşinə ayəon handey bıeyədə kofir bıə kəson çehrədə qıləy ğəzəb bəvindeyş. (jıqo ki)kam  mandə əvon bə çəmə ayəon boəvon handəkəson hucumkəyn. (ha pəyğombər ha! bəvon)vuji: ayə şımə bəsə ımisə qıləy vey yavə xəbə bıdəm? Qıləy otəş ki, Xıdovənd bə kofiron və`dəş doə və (əv)çı yavə ağıbəte.

Navnə proqramədə Xıdovənde-Aləm çı mışrikon bıtpərəstəti mızəmmət kardedəbe və əy bə vəhy iyən ağli əks qıləy ko zıneydəbe.ın ayə çə mətləbi dəvomədə hamyedə: əvon anədə cohilonə təəssıbışon hestebe ki,hətto hozzı nin Kərimə-Ğıroni ayəon bıməson iyən çəy barədə fikkəyn.və hafaxti bəvon ikəs Ğıroni ayəon tilovətkəy, əvon jıqo əsəbi və ğeyzin bedəbin ki,piyedəşonbe çə həmonə şəxsi sə barışton ta əy çı Ğıroni handeyku oqəton.qıləy holədə ki,ağılmandə inson de co kəson fik iyən əğedə oşno bıey və çəy sıxani məsey fikədəy ta əgər səhih iyən məntıği bıbu, əy ğəbul bəkay və əgər ğeyri-məntıği bıbu,de dəlil iyən istidloli əy rədd bəkay.

Bəle! əvonki,ımruj de yavə ruşinfikəti dini təlimon mığobilədə mandedən iyən Xıdo və çəy peyğombəron inkor kardedən,çəvon çı inodkorəti iyən nəğbətətiku bıə kufr, jıqo bəçəvon vucudi əhotəş pəydu kardə ki,hiç qıləy məntığ bo həxı ğəbul kardey hozzı nin və bə mominon ələyh bıə zu iyən ğudrəti əbzoriku bəhrə bardedən. qıləy holədə ki, çəvon ım rəftor bə maddiyə dınyo məhdude və ğıyoməti ruji əvon bə saxtə əzobi dıço bəben.ehanə dınyoədə Xdıo kəlomi məsey boəvon vey sanqinebu, əvon ğıyoməti ruji bə vey şiddətinə əzobi giriftor bəbeyn ki,ım çəvon kufr iyən inodkorəti cəzoe.

Çın ayəku umutedəmon:

1-həxı ğəbul nıkardey iyən inkori ruhiyyə,insoni bə kufr iyən Xıdo inkori tərəf bardedə.

2-ikəs ki, məntığ iyən ağli əhl nıbu,ıştə ğeyri-məntığiyə ideoloqiyə mıdofiyə kardey xoto, həmlə iyən hucum kardedə.ım çəvon məntıği əhl nıbey nışon doydə.

يَا أَيُّهَا النَّاسُ ضُرِبَ مَثَلٌ فَاسْتَمِعُوا لَهُ إِنَّ الَّذِينَ تَدْعُونَ مِن دُونِ اللَّهِ لَن يَخْلُقُوا ذُبَاباً وَلَوِ اجْتَمَعُوا لَهُ وَإِن يَسْلُبْهُمُ الذُّبَابُ شَيْئاً لَّا يَسْتَنقِذُوهُ مِنْهُ ضَعُفَ الطَّالِبُ وَالْمَطْلُوبُ (73) 

Ha məxloğ ha! qıləy misol jıey be. çən, bəy quş bıdənən! həyğətən, şımə i bıə Xıdo əvəzi vanq kardə kəson hiç faxti kardey nibəzıneyn qıləy muz(həm) xəlğkəyn, harçənd bın koyədə əvon bə ivırə cəm həm bıbon. və əgər həmonə muz çəvonku qıləy çi peəto bıboy, əvon əy(çəyku) bə dumo sıey əzınin. tələbəkə iyən tələb bıə çi har dıqlə ocizin.

مَا قَدَرُوا اللَّهَ حَقَّ قَدْرِهِ إِنَّ اللَّهَ لَقَوِيٌّ عَزِيزٌ (74)

(Mışrikon)Bə Xıdo çoko əv loyığe ehtirom noydənin. hukmən Xıdovənd zumand iyən məğlub bıənin ni.

In ayəon xiyoliyə məbudon ocizəti, ısət çı sığ iyən çu bıbu iyən çı inson iyən heyvoni toyfəku bıbu, de qıləy sodə məsəli bəyon kardedə və hamyedə: şımə jıqo qımon kardedon ki, şımə xiyoliyə məbudon şımə jimonədə bəşmə təsirış bıə iyən  bəşmə qıləy xəy ya zərəl rosney zıneydən.ne jqıo ni əvon hətta de dınyo alimon bə ico qırd həm bıbon,qıləy muz həm xəlğ kardey nibəzıneyn.

Əvon nəinki, muzi xəlğ kardey nibəzneyn,bəlkəm ehanə həmonə muz çəvonku qıləy çi peqəto və bıpəro bışo,əvon əy bə dumo sıey ğıvvəşon nibəbe.əvon ki,de qıləy muzi bəsə vardey zıneydənin,çokonə şımə ıştə jimonədə bəvon peştı-puriyon? və şımə çokonə  bənə(sığ,çu,heyvon iyən co qıləyni bıə) zəyifə məxloğon de Xıdo i restədə ğərol doydon ki,həmonə Xıdo osmonon,zəmin iyən qırd ım təbyətış ofəyə?

Ayə oxo həm kırtə cumləonədə bə ım mətləbi təkid kardedə və hamyedə:həm ım tələbəkəyon ocizin iyən həm çəvon tələb bıə məbudon.

Çın ayəonku umutedəmon:

1-Xıdovəndi xəlğ kardə çiyon hırd məzınəmon,harçənd muz bıbu ya muçək.

2-qıləy zumandə Xıdo bə kəno noey iyən sovə əy bə cokəson soyəx şıey,inov bə Xıdovəndi neməton nunkurəti iyən çəy ğədri nızıneye.

اللَّهُ يَصْطَفِي مِنَ الْمَلَائِكَةِ رُسُلاً وَمِنَ النَّاسِ إِنَّ اللَّهَ سَمِيعٌ بَصِيرٌ (75) 

Xıdovənd çı firiştə iyən məxloği miyono rəsulon vıjniyedə. həyğətən Xıdovənd əməs iyən vindedə.

يَعْلَمُ مَا بَيْنَ أَيْدِيهِمْ وَمَا خَلْفَهُمْ وَإِلَى اللَّهِ تُرْجَعُ الأمُورُ (76) 

(Əv)Çəvon vədə bıə çiyon iyən dumoədə bıə çiyon zıneydə iyən qırd koon bə Xıdo(tərəf) oqordıney bəbe.

Məkkə bıtpərəstə mışrikon mığobilədə kali əhle-kitob bənə Cəbrəyili(ə) bıə mələkon iyən bənə həzrəte İsa(ə)-i bıə peyğombəron pərəstış kardedəbin.

Inayə bəvon xitob kardə holədə hamyedə:həm firiştəon,həmən peyğombəron har dıqlə Xıdovəndi xəlğ kardə məxloğin iyən əvon çı Xıdovəndi kəlomi bə insonon rosnə mıbəllığonin. pərəstış fəğət bə Xıdo məxsuse iyən hiçkəs sovə əv bo ibodəti loyığ ni. harçənd peyğombər bıbu ya mələk.

Xıdovənd nəinki, bə milləti koon,bəlkəm həm bə məlayikon koon həm nəzorət kardedə və əvon ıştə əməlon mığobilədə məsul iyən cəvobdehin.

Çın ayəonku umutedəmon:

1-mələkonku idastə, Xıdo iyən peyğombəron miyono bıə vəhyi bə milləti rosney xoto bıə vositəçiyonin.

2-aləm çı Xıdo məhzəre.Xıdovənd çı məxloği sədo məseydə iyən çəvon koonku aqahe.

3-hestemoni aləmi oxo bənə ıştə bino bıey,bə Xıdo tərəfe və hiççi iyən hiçki ilahi elm iyən ğudrəti dayirəku xaricədə ni.