622-ə hissə-Nuri surə-21-23 şərifə ayəon

622-ə hissə

يَا أَيُّهَا الَّذِينَ آمَنُوا لَا تَتَّبِعُوا خُطُوَاتِ الشَّيْطَانِ وَمَن يَتَّبِعْ خُطُوَاتِ الشَّيْطَانِ فَإِنَّهُ يَأْمُرُ بِالْفَحْشَاء وَالْمُنكَرِ وَلَوْلَا فَضْلُ اللَّهِ عَلَيْكُمْ وَرَحْمَتُهُ مَا زَكَا مِنكُم مِّنْ أَحَدٍ أَبَداً وَلَكِنَّ اللَّهَ يُزَكِّي مَن يَشَاءُ وَاللَّهُ سَمِيعٌ عَلِيمٌ (21) 

Ha imon vardə kəson ha! bə şəytoni ğədəmon tabe məbənən və hakəs bə şəytoni ğədəmon pemando, bərosti ki, əv çırkin iyən yavə çiyon əmr kardedə və əgər Xıdovəndi fəzl iyən rəhmət bıənıəbe, hiçfaxti şıməku qıləyni pok nıəbi. əmmo Xıdovənd hakəsiki bıpyişe, pok bəkarde və Xıdovənd əməs iyən əzıne.

Bə peyğombər(s)-i jenonku qıləyni norəvoə behtonoi ayid bıə ayəon macəra bə oxo rəsey bədiqə,ın ayə qıləy kulliyə ğayidə unvanədə hamyedə: mığət bıbənən ki, şəyton şıməni ğədəm bə ğədəm bə inhirof iyən suğuti tərəf kəşeydə.

Çı “xutuvatiş- şəytan”-i təbir yəni “şəytoni ğədəmon” Kərimə-Ğıroni ayəon ço qılə ayəonədə omə ta ım muhimmə xətər və təhlukə bəçəvon quşi bırosno ki, şəyton ğədəm bə ğədəm insoni bə qıno vador kardedə.bə har qıno mırtəkib bıey insoni fik iyən ruhədə qıləy inhirof icod kardedə və əy tikror kardey,bo dıjdə qınoon əncom doe zəminə hozzı kardedə ta inki,insoni bə suğutitərəf kəşeydə.

Kərimə-Ğıron bo şeytoni vəsvəsəon zıneyro,qıləy mıəyyənə meyarış təyin kardə. har ağılmand iyən solimə inson bəştə fıtrəti əsos,bənə xəyonət, behton, dızdi, ğətl iyən co qılə yavəti çı çokətiku dərk iyən co kardedə.

Həlbəttə, hikməti soyb iyən mehribonə Xıdovənd çı şəytoni iyən nəfsaniyə vəsvəsəon mığobilədə qıləy daxili iyən xariciyə kontroli əbzori bə insoni əto kardedə. çı daxiliku ağl iyən fıtrət və çı xariciku kitob iyən peyğombər hejo iyən dayima bə insoni xəbərdorəti doydə iyən çı səhihə jimoni roy bəy nışon doydə. ehanə ımon bıənıəbin,odəmi nəfs çı dıləku iyən çı biku şəytoniyə vəsvəsəon hejo insoni bə bevəcə koon tərəf sovğ doydə iyən həmməkəsi bə fəsod iyən qıno giriftor kardeydə.

Çın ayəku umutedəmon:

1-imoni əhl bəştə imoni təkyə nıkəyn iyən deəy məğrur nıbon və ıştəni çı nicot pəydu kardə kəsonku nızınon.zira inson hejo çı inhirof iyən şəytoni vəsvəsəon mə`rəzədəy.

2-şəyton ahəstə iyən qədə-qədə və tədricən bə insoni rufi nufuz kardedə. çən, çı şəytoni qırd nufuzi royku mığət bıbəmon iyən çı həmonə sıftənə ğədəmiku hodi bıbəmon.

وَلَا يَأْتَلِ أُوْلُوا الْفَضْلِ مِنكُمْ وَالسَّعَةِ أَن يُؤْتُوا أُوْلِي الْقُرْبَى وَالْمَسَاكِينَ وَالْمُهَاجِرِينَ فِي سَبِيلِ اللَّهِ وَلْيَعْفُوا وَلْيَصْفَحُوا أَلَا تُحِبُّونَ أَن يَغْفِرَ اللَّهُ لَكُمْ وَاللَّهُ غَفُورٌ رَّحِيمٌ (22) 

Şıməku bıə mol iyən sərvəti soybon ğəssəm nəhəyn ki, bəştə nezə odəmon, bə miskinon iyən muhaciron hiççi nıdəyn. bəlkəm, bəbe əfv iyən quzəştkəyn və çəvon(qınoku) dəvardon. ayə şımə dılon ni Xıdovənd şıməni bıbaxşo? Və Xıdovənd əbaxş iyən mehribone.

Vəynə ayəonədə bə peyğombər(s)-i jimoni həmro şər-behton ğandə kəson de şiddəti tənğıd kardedəbe və Xıdovənd mısılmınonro bəçəvon bın macəradə səhlənkorəti xoto sə-sıxan kardedə.çəy bədiqə çı sərvət iyən mol-dıvləti soyb bıə səhobəonku kali qılə bə ğərol omin ki, bın şayiə pevolo kardey koyədə əsosə rolışon bıəkəson, çı harcurnə maliyə koməq iyən infoğiku məhrumkəyn. harçənd çəvon nezə odəmon həm bıbu ya ehtiyocinə şəxson bıbu.ın ayə nozil be və əvonış çın koyku bərhəzər iyən nəhyış karde.ğasbu ıəm bəçəy xoto bıə ki, bə ehtiyocinə şəxson infoğ iyən koməqi bırniye,harçənd əvon qınokor həm bıbon, bo tənbih kardeyro qıləy çokə şivə və metod ni.bəlkəm,de koməqon dəvom doey iyən de əvon sosiyal rabitəon hifz kardey bəbe qıləy ko bıkəy ki, əvon ıştə səhvə royədə bıey dərəson iyən islomi camiyə həm əvoni bıbaxşon.

Ayə dəvomədə bə qıləy muhimmə nuktə işorə kardedə və hamyedə: bəqəm şımə ıştən tosə ısət bə səhv iyən xəto mırtəkib bıəniyon? bın surətədə Xıdovəndiku çiç çəş kardedon? bo tobə iyən oqardeyro mohlət iyən fırsəti çəş kardedon ya ilahi ğəhro-ğəzəbi de surəti omey?əgər Xıdoku əfvi çəş kardeydonbu, çən jəqodə şımə həm xətokorə bandəon bıbaxşənən.

Çın ayəku umutedəmon:

1-çı cokəson səhvon əfv kardəkəson iyən ıştə moli bəvon əto kardə kəson, ilahi baxşeşi mə`rəzədən.

2-de xətokoron rəftorədə bəbe bə ifroti dıço məbəmon və qırd bəon bəçəvon dimi dəməbastəmon.

3-ehtiyocin bıey,bo koməq iyən infoği kifoyət kardə şərte, saleh bıey lozım ni.

إِنَّ الَّذِينَ يَرْمُونَ الْمُحْصَنَاتِ الْغَافِلَاتِ الْمُؤْمِنَاتِ لُعِنُوا فِي الدُّنْيَا وَالْآخِرَةِ وَلَهُمْ عَذَابٌ عَظِيمٌ (23) 

Həyğətən, bə pok iyən(çı harcurnə mıdolətiku) bexəbə bıə iyən muminə jenon(zino) nisbəti bıdo(əvon) dınyo iyən axırətədə ilahi rəhmətiku bə diyəron iyən bo əvon qıləy dıjdə əzob heste.

Bə peyğombər(s)-i jeni “ifk”(behton) iyən şər ğandeyku bəhs kardə ayəon oxoyədə, ın ayə qıləy kulliyə ğayidə unvanədə çı qırd iffətinə jenon barədə hamyedə: hiçkəsi həxış ni bə nosolimə rabitə aludə nıbə iyən imoninə jenon bəştə suyi-zənni ya bə cokəson sıxan və şayiəon əsos çı zino koyədə əy mıttəhəmkəy iyən çəy abru-həyo bobəy.jıqo fərdon bəbe bızınon ki,əvon de Xıdovəndi dimbədimin və Xıdovənd məzlumə odəmon himoyə bəkay və bəvon vey şiddətinə əzob bədoe. Xıdovənd əvoni dınyoədə ıştə benəhoyətə rəhmətiku məhrum bəkay iyən axırətədə əvoni bə cəhəndımi tərəf rəvonə bəkay.

Çın ayəku umutedəmon:

1-pok və iffətinə jenon həxon hifz kardey,çı Kərimə-Ğıron iyən islomi dini proqramonkue.

2-jenon bəbe xıyzoni iyən sosiyal rabitəonədə,çı harcurnə rəftoron ki, behtonon zəminə hozzı kardedə,pərhizkəyn.