796-ə hissə-Fatiri surə-31-35 şərifə ayəon

796-ə hissə

وَالَّذِي أَوْحَيْنَا إِلَيْكَ مِنَ الْكِتَابِ هُوَ الْحَقُّ مُصَدِّقاً لِّمَا بَيْنَ يَدَيْهِ إِنَّ اللَّهَ بِعِبَادِهِ لَخَبِيرٌ بَصِيرٌ (31) 

Və çı kitobiku bətı vəhy kardə çi, həmonə həxe ki, çəy bənav bıə kitobon təsdığ kardedə. hukmən, Xıdovənd bəştə bandəon nisbətədə xəbədo iyən vindedə.

ثُمَّ أَوْرَثْنَا الْكِتَابَ الَّذِينَ اصْطَفَيْنَا مِنْ عِبَادِنَا فَمِنْهُمْ ظَالِمٌ لِّنَفْسِهِ وَمِنْهُم مُّقْتَصِدٌ وَمِنْهُمْ سَابِقٌ بِالْخَيْرَاتِ بِإِذْنِ اللَّهِ ذَلِكَ هُوَ الْفَضْلُ الْكَبِيرُ (32) 

Peşo ın kitobro(Ğıron) bəştə vıjniyə bıə bandəonku i dastə bə miros domone. çən, çəmə kali bandəon(bə kitobi əməl kardeyədə) bəştə sıtəm kardeşone və bəziyon mutədil(miyonə ro şıə) iyən kali qıləyni(həm) de ilahi izni bə xeyə koon nisbətədə bə və dəşin ki, ım həmonə ilahi dıjdə fəzle(lutfe).

Navnə bərnomədə osmoniyə kitobi tilovətiku iyən bəçəy əmron pemandeyku bəhs be. ın ayəon hamyedə: bə Peyğombəre-Əkrəmi(s) ğəlbi nozil bıə Ğıron, həxə sıxaniku iborəte. zira həxı sərçəşməkuye yəni Xıdo tərəfiku vəhy bıə və de insoni ağl iyən fitrəti i iyən cur omeydə.

Çımisə əlovə ım kitob de vəynə peyğombəron kitobi həmahənq iyən i omeydə, navkonə peyğombəron iyən çəvon kitobon təsdığ kardedə və bəvon imon vardey bə Xıdo imon vardey zıneydə.

Ayəon dəvomədə hamyedə: qırd islomi ummət ki, de bə Xıdo iyən bə islomi peyğombəri(s) imon vardey vositə, çı coqlə umməti miyono vıjniyə bıən, çı Kərimə-Ğıroni varisin və bəbe ımi dərəson, bəy əməlkon iyən əy nəşrkon. əmmo məələsəf çın ummətiku i quruh bəştə zılmışon kardə, çı Ğıroni royku co bıən və coqləyni bəçəy əmron pemandedən, bəy əməl kardedən iyən əy camiyədə pevolo kardeyədə həm camiyədə vədə şıəkəsonin. bə islomi rəvoyəton əsos, Peyğombər(s)-i Əhli-Beyt(ə) çə həzrəti həxə canişinonin ki, bın ərsədə vədə şıəkəson bıən iyən əvon bo milləti imom və rəhbər bə hisob omən.

Çın ayəonku umutedəmon:

1-Kərimə-Ğıronədə botıl, hədərə və xorafiyə sıxan mevcud ni və həmmə ayəon bə həx iyən həyğəti əsose. lizaəv hejo sabit iyən əbədiye.

2-osmoniyə kitobon iyən ilahi peyğombəron, çı iqlə hədəfi dumon iyən iqlə cəhətədə hərəkət kardedən. bə həmonə dəlili xoto, əvon iyande təsdığ kardedən.

3-Ğıron iyən çəy maarifiku bə diyəro mandey, bəştə zılme, nəinki, bə Xıdo iyən bəçəy pəyğombəri.

4-Ə kəson çı Ğıroni elmon varisin ki, xeyə koonədə bənav dəşedən. de qıləy co bəyoni Ğıroni mirason ğəbul kardey şərt, çok iyən xeyə koonədə bə və dəşeye.

جَنَّاتُ عَدْنٍ يَدْخُلُونَهَا يُحَلَّوْنَ فِيهَا مِنْ أَسَاوِرَ مِن ذَهَبٍ وَلُؤْلُؤاً وَلِبَاسُهُمْ فِيهَا حَرِيرٌ (33) 

(İlahi mıkofat iyən dıjdə fəzl)Dayima havz bıə boğonin ki,(əvon) bəvon varid bəbeyn və əyo de telı iyən mırvaridə dastinəon zinətin bəbeyn və çəvon əyo bıə olət(çı) avşımikuye

وَقَالُوا الْحَمْدُ لِلَّهِ الَّذِي أَذْهَبَ عَنَّا الْحَزَنَ إِنَّ رَبَّنَا لَغَفُورٌ شَكُورٌ(34) 

Və bəvoteyn: şık bə Xıdo ki, çəmə ğəmış(miyoniku) bardeşe. həyğətən, çəmə pərvərdıqor əbaxş iyən ğədrəzıne(təşəkkurəkəy).

الَّذِي أَحَلَّنَا دَارَ الْمُقَامَةِ مِن فَضْلِهِ لَا يَمَسُّنَا فِيهَا نَصَبٌ وَلَا يَمَسُّنَا فِيهَا لُغُوبٌ (35) 

Xıdovənd ki, bəməş ıştə fəzliku qıləy əbədiyə vırəş əto karde ki, əyo bəmə hiç qıləy renc(əzob) nibərəse və viyəvonəti bəçəmə soyəx nibome.

Vəynə ayəonədə islomi ummət bə seqlə dastə təğsım be. zolımon, tərəfdoron iyən imomon. ın ayəonədə bə dı iyən seminə qrupi çı mıkofati və`də doydə. ə mıkofaton ki, ğıyoməti ruji de vəhıştədə sakin bıey bə həyğət bərəse. əvrə nəinki, qıləy reçin iyən ğəşənqə məkan bəbe, bəlkəm əvon əyo de ğəşənq iyən çokə oləton bətan kardə şəxson sohbət bəkardeyn və əyo inson de hiç qıləy ğəmo-ğussə dimbədim nibome. təbiiye ki, jıqo qıləy muhitədə insoni əhvol-ruhiyyə bəpe bəbe və əyo bə insoni renc iyən zəhməti boyis bıə hiç qıləy ko mevcud ni.

Dınyoədə dıqlə çi çı dıl dəbastey iyən çı depressiyə amile. qıləy çı xoşə çiyon iyən neməton hejo tikrorinə formədə bıey və coqləyni əvoni çı dasto doey tars. əmmo ğıyoməti ruji çı neməton nevbənevəti iyən çəvon ədədon ziyod beıy bə surətədəy ki, ım bə insoni bezo bıey boyis bedəni iyən hiçki çəy ixtiyorədə bıə ın neməton çı dasto doeyku hiç qıləy tarsış ni.

Vəhışti əhl ki, jıqo qıləy məkonədə jiyedən iyən əyo deəvon bəico jıqo insonon mevcude, əve əvon de Xıdovənde-Mutəali şukr kardey məşğul bəbeyn və vəhışti çı Xıdovəndi bəvon inoyət kardə fəzl və lutf bəzıneyn, nəinki, çəvon dınyoədə əncom doə məhdudə əməlon əvəzi. zira, Xıdovənd deçəvon qınoon əfv kardey iyən deçəvon xətoonku dəvardey, jıqo qıləy vəhıştış bəvon baxş kardə və ehanə çəy lutf iyən baxşeş bıənəbe, bo jıqo qıləy baxşeşi ğəbul kardeyro, hiç qıləy ro mevcud nıəbi.

Çın ayəonku umutedəmon:

1-əvon ki, bo Xıdo xoto, kali dınyəvi ləzzətonku məhrum mandedən, Xıdovənd çın mıvəğğəti ləzzəton əvəzi, bəvon dayimiyə ləzzəton bəbaxşe. bənə telı iyən avşımi ki, dınyoədə ım bo merdon hərome, əmmo vəhıştədə əvon çəyku bəhrə bəbardeyn.

2-vəhıştədə cismi asayiş de rufi oroməti bə icoye. bə dınyo jimoni əks ki, çı ğudrət iyən sərvəti xıvandon veyni, cismoni cəhəto asayişədən, əmmo rufi iyən psixoloji cəhəto oromətişon ni.

3-Xıdovənd bə xəto iyən səhfon nisbətədə əbaxşe və bə çokətiyon nisbətədə ğədrəzın iyən təşəkkurəkəy. əmə bandəon həm bəbe ıştədə ım ilahi sıfəti bəyjikəmon.

4-vəhışti əhl, vəhışti çı Xıdovəndi fəzl iyən kərəmi zıneydən, nə in ki, ıştə əməlon əvəzi. zira çı dınyo məhdudə əməlon de axırəti behisobə neməton miyono hiç qıləy nisbət mevcud ni.