801-ə hissə-Yasini surə-1-4 şərifə ayəon

801-ə hissə

De Fatıri mıborəkə surə bə oxo rəsey, ısət Yasini mıborəkə surə bino kardedəmon. ın surə ki, Məkkədə nozil bıə,deştə iminə ayə ki,”muğəttəə” hərfonkuye, nom noey bıə. Yasini mıborəkə surə həşto seqlə ayəku iborəte.

In surə bə etığodi məsələon işorə kardedə. çın surə ayəonədə bə pərvərdıqore-aləmi hestemoni aləmdə bıə əzəməti işorə bıə. Yasini mıborəkə surə ayəon co baxşədə bə miad, ğıyoməti ruji məhkəmədə bıə sıvol-cəvobi ayid bıə məsələon işorə bıə iyən çı vəhışt və cəhəndımi xısusiyyəton barədə bəhs bıə.

Rəvoyətonədə Yasini mıborəkə surə de “Ğıroni ğəlb”-i nomi zikr bıə. sıftədə bə çın surə 1-ayəku de tobə 4-ə ayəon tilovəti quş doydəmon:

بسم الله الرحمن الرحيم

يس (1) 

Yasin.

وَالْقُرْآنِ الْحَكِيمِ (2) 

Ğəssəm bıbu bə (ğoym iyən)hikmətamizə Ğıroni.

إِنَّكَ لَمِنَ الْمُرْسَلِينَ (3) 

Həyğətən, tı çı peyğombəronkuş.

عَلَى صِرَاطٍ مُّسْتَقِيمٍ (4) 

Və rostə royədəş.

Muğəttəə hərfon həxədə çın surə bənav bənə Bəğərə iyən Ali-İmran surəonədə bəhs kardemone. Bəğərə iyən Ali-İmran iyən Kərimə-Ğıroni co surəon de muğəttəə hərfon bino bedə. ın hərfon mıstəğilə kəlməon nin və bənə təşkilot iyən onemonon mıxtəsərə nomonin ki, çəvon sıftənə hərfonku çəvon ixtisoriyə əloməton hozzı bedə. ın hərfon həm çı kəlməon əlomət iyən nışonəon kuye ki, boəmə ruşin ni. ın hərfon çı Ğıroni rəmzonkuye ki, fəğət pəyğombər(s) iyən məsumə imomon(ə) çəvonku xəbədon və İmom Zəmon(ə)-i zuhuri zəmonədə çəvon həyğəton boəmə oşko bəbe.

Kali rəvoyəton Yasini mıborəkə surədə bıə mığəttəə hərfon çı islomi peyğombər(s) nomonku qıləyni zınəşone və çəy dəlil Yasini bəpeştə bıə ayəon hisob bıə ki, bə Xıdo Rəsuli(s) xitob bıə.

Çoko ki, çımi bənav həm votemone, muğəttəə hərfon adətən Kərimə-Ğıron iyən çəy xısusiyyəton bəpeştə omeydə. ın surə həm bə Ğıroni hikmətamizə xısusiyyəton təkid kardedə və bəy ğəssəm hardedə. qıləy kitob ki, hikməti bəon bə insoni dimi oj kardedə və əy bə mıstəğim iyən rostə roy tərəf hidoyət kardedə.

Təbiiye ki, Kərimə-Ğıroni ğəssəmon bo qıləy çi əzəməti bəyoniroye ki, bəy ğəssəm hardey bıə, nəinki, Xıdovənd boştə mətləbi isbot kardey xoto, bə jıqo ğəssəmon ehtiyociş heste.

In ayəon çı peyğombəri risoləti de Kərimə-Ğıroni nozili miyono bıə rabitə çok-çoki bəyon kardedə və bə həzrəti xitob kardə holədə hamyedə: Ğıron boştə risolətiro vey çokə dəlile. zira ilahi mecuzəy və ikəs kardey nibəzıne bənə əy iyən çəy səviyyədə qıləy kitob biyəy və bənə vəynə peyğombəron ıştı vəzifə milləti bə rostə roy tərəf hidoyət kardeye. Xıdovənd şoydəti kardedə ki, tı sərost iyən siratəl mustəğimədəş iyən əy çok-çoki zıneydəş və bəçəy inhirofiyə roon həm bələdiş.

Bə ın ayə mehtəvo iyən məzmuni dığğət kardeyədə, islomi pəyğombər(s) nəinki, mıstəğimə royədəy, bəlkəm, komilə surətədə əy ehtivo kardedə. ruşine ki, ikəsi ki, piyeşe məxloği bə ın roy dəvətko, bəbe ıştən əməli surətədə çı sərostə roy ulqu bıbu və həmən kardey bızıno milləti səhihə formədə bə rostə roy hidoyətko iyən əvoni bın royədə sabit ğədəm oqəgo.

Bəbe dığğətkəy ki, ilahi roy mustəğim iyən sərost bıey, hiçvaxti hoston iyən rohətəti mənoədə ni. bəbe təsəvvır nıkəmon ki, çın roy hiç qıləy etat-petatış iyən bandə roş ni. mustəğimə royku mənzur iyən məğsəd, çı ziyodə inhirofi iyən nodırıstə roon mığobilədə bə məğsəd rəseyro bıə qıləy səhihə roye. ın roon hətto ehanə zohirədə həmo iyən hiç qıləy şat-şutış həm nıbu, hiçvaxti insoni bə məğsəd nibərosne.

Çın ayəonku umutedəmon:

1-Kərimə-Ğıron qıləy hikmətamiz, ğoym iyən mehkəmə kitobe. Ğıroni ecozi cəhətonku qıləyni çəy qırd fərdi, xıyzoni iyən iştimayi ərsəonədə hikmətamiz bıeye.

2-Ğıroni hidoyətəkə iyən təsirəkə təlimon, bənə peyğombəri qıləy mellimi ehtiyociş heste ki, bəy təlim bıdo iyən ıştən həm əməli surətədə boəvon ulqu bıbu.

3-har nımojədə Xıdoku bıpiyəmon ki, əməni bə mustəğimə roy hidoyətko. Xıdovənd ıştə pəyğombərış bo mustəğim iyən sərostə ro ulquş təğdım kardə. çən, bəbe çə həzrəti sirə və rəftori roy çok-çoki bızınəmon iyən bəçəy əsos əməlkəmon.