805-ə hissə-Yasini surə-20-27 şərifə ayəon

805-ə hissə

وَجَاء مِنْ أَقْصَى الْمَدِينَةِ رَجُلٌ يَسْعَى قَالَ يَا قَوْمِ اتَّبِعُوا الْمُرْسَلِينَ (20) 

Və şəhri diyəroə vırəku qıləy merd de tovi ome(və) voteşe: ha ğovm ha! bə ın peyğombəron pemandənən.

اتَّبِعُوا مَن لاَّ يَسْأَلُكُمْ أَجْراً وَهُم مُّهْتَدُونَ (21) 

Bə kəson tabe bıbənən ki, şıməku hiççi piyedənişone və əvon ıştən hidoyət pəydu kardəşone.

Vəynə proqramədə bə ilahi rəsulon bo milləti hidoyətiro bıə cəhdon işorə kardemone. ın ayəon hamyedə: kali muminon hozzon bo ilahi peyğombəron çı sıtəmkorə hukuməton mığobilədə mıdofiyə kardero ıştə coniku həm dəvardon ta de ın vositə əvoni himoyəkon.

Həbib ibn Nəccar nomo qıləy şəxs şəhri kənoyədə məseşe ki, camaat bə ilahi peyğombəron əziyyət kardey iyən əvoni kıştey fikədən. liza de tovi ıştənış bə şəhri mərkəzış rosne iyən co kəsonku koməkış tələbış karde. əv bənə qıləy həyğiyə mumini zıneydəbe ki, həm bəbe ıştən imoni əhl bıbu və həmən cokəson bəbe bə imoni tərəf dəvətko ta deşmınon ilahi rəsulon çı miyoniku bardey nızınon. həmonə rəsul iyən peyğombəron ki, bo məxloği hidoyətiro omən və əvon çı camaatiku hiç qıləy maddiyyat iyən mızd həm tələb kardeydənıbin.

Çın ayəonku umutedəmon:

1-din iyən həxə rəhbəron mıdofiyə kardey, çı imoni əhli vəzifəonku qıləyniye.

2-dini mıdofiyə kardey koyədə coyli iyən bekomək bıey, bə vəzifə bə vırə rosney mane nibəbe. qahi vaxti  yali hərəkət kardey lozıme. həxı mıdofiyə kardey royədə çı koməkəkəyon kam bıeyku tarsey lozım ni.

3-bəkəson pemandəmon ki, əvon həxə royışon pəydu kardə və çəvon həxə royədə bıeyku əmə xatırcəmimon.

وَمَا لِي لاَ أَعْبُدُ الَّذِي فَطَرَنِي وَإِلَيْهِ تُرْجَعُونَ(22) 

Bəmı çiç bıə(boçi) ki, bə mıni ofəyəkəsi ibodət nıkom və(şımə) həmmə bəçəy tərəf oqordıney bəbiyon.

أَأَتَّخِذُ مِن دُونِهِ آلِهَةً إِن يُرِدْنِ الرَّحْمَن بِضُرٍّ لاَّ تُغْنِ عَنِّي شَفَاعَتُهُمْ شَيْئاً وَلاَ يُنقِذُونِ (23) 

Aya çəy əvəzi co xıdoon bıvıjnom ki, ehanə Rəhmonə Xıdo bəmı qıləy zərəl rosneyış bıpyo, çəvon şəfoət bomı hiç qıləy foydəş nibəbe və mıni(Xıdo əzobiku) xilos kardey nibəzne.

إِنِّي إِذاً لَّفِي ضَلاَلٍ مُّبِينٍ (24) 

Bın surətədə mı oşkoə zəlolətədə bəbem.

Bo ilahi peyğombəron himoyə kardero bə şəhri mərkəz omə iyən camaatiku komək tələb kardə şəxs, ıştə tohidiyə əğidə mıdofiyə kardero voteşe: az hiç qıləy dəlil vindedənim ki, bıton iyən şımə xəyoliyə məbudon pərəstışkəm. qıləy holədə ki, zınedəm mehribonə Xıdo mınış ofəyə və ehanə bıpyime ikəsi pərəstışkom, jəqoədə bəbe əy pərəstışkəm. Xalığə Xıdo pərəstış həm bə ağli əsose və həmən de daxiliyə fıtrəti sədo mıvofiğe. qıləy holədə ki, şımə pərəstış kardə məbudon ağli cəhəto hiç qıləy əsosışon ni. zira əgər ikəs bəmı ziyon rosneyış bıpyo, əvon çəy təhlukə çımıku bə diyəro kardey nibəzıneyn və həmçinin ikəs bəmı qıləy xey rosneyış bıpyo, əvon bə ın ko mane bıey əzınin. təbiiye ağl iyən fıtrəti hıkmi bə kəno noey, bə insoni zəloləti boyis bəbe və bo ın ko hiç qıləy bəhonə və dəlil mevcud ni.

Çın ayəonku umutedəmon:

1-Xalığə Xıdo pərəstış kardey, qıləy ğəbul bıəninə koye. əmmo co məbudon pərəstış kardey, ağli nəzəku ğəbul bıənin ni.

2-nəinki, xılğəti sıftə, bəlkəm çı insoni umri oxo həm Xıdo dastədəy. çən, əv bo pərəstışi loyığe və ın pərəstış de insoni ağl iyən daxiliyə fıtrəti sədo mıvofiğe.

إِنِّي آمَنتُ بِرَبِّكُمْ فَاسْمَعُونِ (25) 

(Ha məxloğ ha! bızınən)Az bəşmə pərvərdıqori imon vardəme. çən,(şımə həm çımı sıxani) bıməsən(və imon biyənən).

قِيلَ ادْخُلِ الْجَنَّةَ قَالَ يَا لَيْتَ قَوْمِي يَعْلَمُونَ (26) 

(Oxoyədə əvışon şəhid kardeşone)Bəy votey be: ”bə vəhışt varid bıbi. ey kaş çımı ğovmi zınəyşon be”.

بِمَا غَفَرَ لِي رَبِّي وَجَعَلَنِي مِنَ الْمُكْرَمِينَ (27)‏

“Ki, çımı pərvərdıqor mınış baxşe və çı hurmət soybiku kardeşe”.

Bo ilahi pəyğombəron mıdofiyə kardero ğıyom kardə şəxs, ıştə dəlilon bəyoni bədiqə, elonış karde ki, mı bə ın peyğombəron imon vardəme iyən şıməni həm boçəvon himəyəro dəvət kardedəm. çən, şımə çok-çoki fik-fam iyən təfəkkurkənən.

Əmmo inodkorə kofiron ki, bo həxə sıxani məsey hozzı nıbin, həmonə merdışon şəhid karde və bəştə xiyoli əsos çəy pand iyən nəsyətonku ıştə conışon peroxne. əmmo Xıdovəndi əmrış karde ki, həmonə merdi bə vəhışt daxilkon. qıləy vəhışt ki, ta ruzi ğıyomət dəvomış heste. Xıdovəndi salehə bandəon ki, şəhid bedən de tobə ğıyoməti ruji həmonə vırədə sakin bəbeyn.

De şəhidon bəyji bıey əloğədor, Xıdovənde-Xalığ Ali-İmrani mıborəkə surə 169-ə ayədə hamyedə: hiçvaxti qımon məkənən ki, Xıdo royədə kıştə bıə kəson mardən. bəlkəm, əvon bəyjin iyən ıştə pərvərdıqori palu ruzi doey bedən.

Həmonə imoninə merd jıqo boştə ğovmi xeyrxah be ki, hətto əvon ki, çəy ğatil bin, boəvon dılış suteydəbe iyən oruzu kardedəbe ki, kaş əvon hidoyət bıbon və bə əbədiyə hərəbaxtəti bırəson.

Çın ayəonku umutedəmon:

1-din iyən dini rəhbəron mıdofiyədə, de tobə oxonə nəfəsi istiğamət iyən Xıdo royədə şəhid bıey lozıme.

2-Xıdo ovliyaon çı milləti xeyrxah bıən. əvon ıştə ğovmiku vində de qırd saxti iyən əziyyəton, ijən boçəvon xoşbəxtəti xoto dıvo kardedəbin, nəinki, nifin.

3-Xıdo royədə bıə şəhidon, de tobə ğıyoməti ruji(bərzəxi aləmədə) qıləy məxsusə həyotışon bəbe. əvon Xıdovəndi boəvon hozzı kardə vəhıştədə ruzi iyən nemətonku bəhrə bəbardeyn.