806-ə hissə-Yasini surə-28-35 şərifə ayəon

806-ə hissə

وَمَا أَنزَلْنَا عَلَى قَوْمِهِ مِن بَعْدِهِ مِنْ جُندٍ مِّنَ السَّمَاءِ وَمَا كُنَّا مُنزِلِينَ(28) 

Və əmə(çə merdi şəhodəti) bəpeştə hiç qıləy ləşkər osmoniku boçəy ğovmi həlokiro nıvğandemone və umumən çımi bənav həm çəmə adət(ğanun) jıqo nıbe.

إِن كَانَتْ إِلاَّ صَيْحَةً وَاحِدَةً فَإِذَا هُمْ خَامِدُونَ (29) 

Fəğət iqlə dəhşətinə(osmoniyə) sədo ki, ğəflətən qırd əvon hamuş bin.

يَا حَسْرَةً عَلَى الْعِبَادِ مَا يَأْتِيهِم مِّن رَّسُولٍ إِلاَّ كَانُوا بِهِ يَسْتَهْزِئُون (30) 

Vay bıbu bə ın bandəon holiki hiç qıləy pəyğombər boəvon oməni illah ki, bəy istehzo kardeşone.

Navnə proqramədə votemone ki, Şami məntəğə Antakyə şəhri millət boçəvon hidoyətiro omə ilahi pəyğombəron bə əzob-əziyyəti məruzışon noe və çəvon risolətışon təkzib karde. əvon ilahi peyğombəron mıdofiyə kardə Həbib ibn Nəccar nomədə bıə qıləy merdışon həm bə şəhodət rosneşone.

Xıdovənde-Aləm bın ayəonədə hamyedə: peyğombəron bə həşə jıə şəxson, bə həmonə ilahiyə merdi kıştey xoto, bə əzobi loyığ bin. əv həm dınyəvi əzob. əve de ilahi fərmoni osmoniku qıləy dəhşətinə sədo nozil be və əvonış bə həlokət rosneşe.

Umumən mınhərif iyən xətokorə ğovmon həlokət bo Xıdovəndi səhl iyən hostone və bə əskər iyən ləşkəri ehtiyociş ni. lozım ni Xıdovənd çı mələkonku qıləy ləşkər bıvğando ta əvoni bə həlokət bırosno. bəlkəm, deçəy irodə çı osmon iyən zəminiku qıləy dəhşətinə sədo beşedə ki, həmməkəsi hamuş kardedə ta həni nə ikəsiku qıləy hərəkət bə əməl booy və nə qıləy sıxan çəy qəviku beşo.

Ayəon dəvomədə hamyedə: bo Xıdo bandəon həsrət iyən peşmonəti mandedə ki, ilahi hidoyəti ğəbul kardey əvəzi, deştə rəftori ıştə həlokəti zəminə hozzı kardedə. qıləy rəftor ki, de məsxərə iyən istehzo bino bedə və de ilahi ovliyaon əziyyət kardey iyən de əvoni kıştey bə oxo rəsedə.

Çın ayəonku umutedəmon:

1-ehanə qıləy cəmyətədə Xıdo ovliyaon təhğır və əvon bə əziyyəton dıço bıbu, ə cəmyət bə ilahi ənəxəbədo bıə əzobi dıço bəbe.

2-çı xuliqan iyən yoləşəxə şəxson təhdidonku mətarsəmon və həxı royku dast məkəşəmon. əgər Xıdo bıpyişe əvon qıləy kırtə zəmonədə məhf bəbeyn bəşeyn.

3-bə cokəson məsxərə xoto, çəmə imon zəyif nıbu və ıştə dni vəzifəon çok-çoki bə vırə bırosnəmon. bə qırd peyğombəron istehzo kardəşone, əmmo əvon ıştə həxə royku dast kəşə nişone.

أَلَمْ يَرَوْا كَمْ أَهْلَكْنَا قَبْلَهُم مِّنْ الْقُرُونِ أَنَّهُمْ إِلَيْهِمْ لاَ يَرْجِعُونَ (31) 

Aya nıvindeşone çəvon bənav çandə ziyodə nəslon həlok kardemone və əvon bə ın kofiron tərəf niobəqardeyn?

وَإِن كُلٌّ لَّمَّا جَمِيعٌ لَّدَيْنَا مُحْضَرُونَ (32) 

Və əvon həmməy çəmə palu vardey bəbeyn.

Vəynə ayəon dəvomədə ın ayə bə qırd insonon xitob kardə holədə hamyedə: çıro tarıxi dəvardə ğovmon iyən çəvon tale həxədə mıtoliyə kardedəniyon? Bəqəm vindedəniyon ki, şımə bənav ziyodə etnoson omən və qırd əvon çı miyoniku şıən? çəvonku veyni çı ğudrət, sərvət iyən mədəniyyəti soyb bıən. əmmo ımruj çəvonku hiç qıləy əsər-əlomət mandəni və çəvon bə dınyo oqardey iyən de ımrujnə insonon bə ico jimoniro hiç qıləy ro həm mandəni.

Çın ayəonku umutedəmon:

1-Kərimə-Ğıroni tovsiyəonku qıləyni dəvardə milləton və ğovmon tarıxi mıtoliyə kardeye. həlbəttə, bə ibrət iyən pandi boyis bıəqıləy mıtoliyə, nəinki, bo sətasponey ya təfrihiro.

2-tarıxədə ilahi adəton sabit iyən mıəyyəne və tale iyən sənıvışton bəiyande mandən. liza iqlə səhnə vindey bo co qılə səhnə vindero ulqu bıey bəzıne.

3-mardey bəpeştə bə dınyo oqardeyro həni hiç qıly ro mandəni. əve Kərimə-Ğıron çı hinduon “tənasux” yəni mardey bəpeştə insoni coqlə formədə ijən bə dınyo omey nəzəriyyə ğəbul kardedəni.

وَآيَةٌ لَّهُمُ الْأَرْضُ الْمَيْتَةُ أَحْيَيْنَاهَا وَأَخْرَجْنَا مِنْهَا حَبّاً فَمِنْهُ يَأْكُلُونَ (33) 

Və mardə zəmin boəvon qıləy nışonəy. əmə əvımon bəyji karde və çəyku donə(tum) xaric kardemone ki, (əvon) çəyku hardedən.

وَجَعَلْنَا فِيهَا جَنَّاتٍ مِن نَّخِيلٍ وَأَعْنَابٍ وَفَجَّرْنَا فِيهَا مِنْ الْعُيُونِ (34) 

Və əyo xımo iyən anqı doonku boğon ğərol domone. Və bəvədə çeşməon bə cuş vardedəmon.

لِيَأْكُلُوا مِن ثَمَرِهِ وَمَا عَمِلَتْهُ أَيْدِيهِمْ أَفَلَا يَشْكُرُونَ (35) 

Ta çı miyvəonku iyən çəvon deştə dasti bə əməl vardə çiyon bıhardon. çən, boçi şık kardedənin?

Vəynə ayəon bə miad iyən bandəon Xıdo dərqoyədə huzuri mevzu işorə kardedəbe. ın ayəon hamyedə: dınyoədə çı miadi veyçokə nışonəonku qıləyni, zəmini mardey bəpeştə ijən sənibəton bəyji bıeye. zəmin zımıstonədə mardedə və hiç qıləy məhsul doydəni. əmmo əvəsor iyən bəhar fəslədə zəmin bəyji iyən tərovətin bedə və bəvədə çandə nev beməy iyən doon perəseydə. ım cərəyon iyən hərəkat ha sor tikror bedə. zımıstonədə çı rəsəyon jimoni nışon doə qıləy perəsey çəvonku bəçəş çiyedəni. əmmo de əvəsori həşi pemey, vılon zizə kardedə və doon havz bedə.

Odəmi dığğəti cəlbəkə çi ıme ki, bın zəmini kurəsə bıə bəşəri jimon, çı rəsəyon həyotiku bəşıkrəy. ehanə iruj beməyon çı miyoniku bışon və heyvonon bımardon, inson ki, ıştə umdə xorəkon çın rəsəy iyən heyvononku təmin kardedə, həni zəmini dimisə mandey iyən jimon kardey ğudrətış nibəbe.

Hardəninə çiyon miyono həm Kərimə-Ğıron bə xımo iyən anqı qıləy məxsusə dığğətış kardə və əvoni bo bəşəri ilahi nemət hisob kardedə. ğasbu ım bəçəy xotoye ki, ım dıqlə miyvə komilə xorək bə hisob omeydə və çəy tərkibədə çandə nev vitaminon mevcude.

Çın ayəonku umutedəmon:

1-təbyət çı Xıdovəndi xılğəti kitobe ki, çın kitobi har qıləy vərəği nığılə mıtoliyə kardey, insoni bəçəy ofəyəXalıği zıney tərəf hidoyət kardedə.

2-insonon dınyoədə bıə miadi təcrubə kardey bedəni, əmmo doon iyən beməyon miadi vindey iyən təcrubə kardey bedə.

3-inson de çandə nev miyvəon iyən xorəkonku bəhrə bardey, bəbe bə Xıdo şıkko. əmmo məələsəf insonon veyni şukr kardedənin.