808-ə hissə-Yasini surə-45-50 şərifə ayəon

808-ə hissə

وَإِذَا قِيلَ لَهُمُ اتَّقُوا مَا بَيْنَ أَيْدِيكُمْ وَمَا خَلْفَكُمْ لَعَلَّكُمْ تُرْحَمُونَ (45)

Və havaxti bəvon votey bıbu şımə vədə(dınyo cəzoku) iyən şımə peştono bıə(axırəti cəzoku) bıtarsənən ta ğasbu bəşmə rəhm bıbu(Etino kardedənin).

وَمَا تَأْتِيهِم مِّنْ آيَةٍ مِّنْ آيَاتِ رَبِّهِمْ إِلَّا كَانُوا عَنْهَا مُعْرِضِينَ (46) 

Və çəvon pərvərdıqori nışonəonku hiç qıləy nışonə boəvon omeydəni illa əvon çəyku dim qordıneydən.

Vəynə çandə qılə bərnomədə Xıdovəndi hestemoni aləmədə bıə ğudrət iyən əzəməti nışonəon bəyon be. ın ayəon çə bəhsi dəvomədə hamyedə: millətiku i dastə bə Xıdovəndi iyən bəçəy peyğombəron sıxanon dığğət kardey, həmçinin ilahi nışonəonku pand qətey əvəzi, əvon həxıku dim qordıney roşon qəte. çın fərdonku tələb kardeyədə ki, ıştə əməlon iyən rəftoronku mığət bıbon ta bə dınyəvi iyən uxrəviyə əzobon dıço nıbon, əvon bəhonə vardedən və ijən bəştə nodırıstə əməlon dəvom doydən. qıləy holədə ki, ehanə ıştə koyku dast bıkəşon və bə həxı tərəf dim bıqəton, bə ilahi lutf iyən rəhməti şomil bəbeyn və Xıdovənde-Aləm çəy dəvardə səhf iyən xəttonku dəbəvarde.

Çın ayəonku umutedəmon:

1-hestemoni aləmədə Xıdovəndi nışonəon vey ziyode. əmmo milləti bovə iyən ğəbul kardey kame.

2-ilahi rəhməti ğəbul kardey roy hejo oje. illa ki, inson rəhməti bəon ıştən bəştə dimi dəbasto.

وَإِذَا قِيلَ لَهُمْ أَنفِقُوا مِمَّا رَزَقَكُمْ اللَّهُ قَالَ الَّذِينَ كَفَرُوا لِلَّذِينَ آمَنُوا أَنُطْعِمُ مَن لَّوْ يَشَاءُ اللَّهُ أَطْعَمَهُ إِنْ أَنتُمْ إِلَّا فِي ضَلَالٍ مُّبِينٍ (47)

Və havaxti bəvon votey bıbu: Xıdovəndi bəşmə ruzi kardə çiyonku bıbaxşənən, kofiron bə imon vardə kəson voteşone: aya bə kəson xorək bıdəmon ki, ehanə Xıdo piyəyşbe ıştən bəvon xorək ədəy? şımə qıləy oşkoə zəlolətədon.

In ayə bə kofiron kəcfame iyən inodkorəti nımonəonku qıləyni işorə kardedə və hamyedə: Xıdovəndi bə muminon bıə əmronku qıləyni, bə ehtiyocinə şəxson infoğ iyən baxşeşe ki, har qıləy ağılmand iyən insofinə inson çın ko çok bıey famedə və əy təsdığ kardedə. əmmo kali inodkorə kofiron Xıdovəndi həmonə dəstur iyən əmri bə sıvoli ji bardedə və voteydə: çıro Xıdovənd bəşmə dəstur doydə bə beçizə şəxson xorək iyən olət bıdon? boçi əv ıştən ın ko kardedəni? Yəğın əv ıştən dılış ni ki, ehtiyocinə şəxson luzon si bıbu.

Ruşine ım işkal, irad iyən sıvolon, çəvon inodkorəti iyən hışkə mazqətiruhiyyəy. jıqo bıə nıəbe, çəmə qırd çiyon və hətto çəmə bə ehtiyocinə şəxson baxş kardə çi həm, Xıdovəndi bəmə doə rızğo-ruziye və çəmə ıştəku hiççi ni. çəmə ağl, əndişə iyən bədəmi andom, qırd çı Xıdovəndi bəmə doə nemətonin və əmə deçəvon vositə çı ğudrət, sərvət iyən imkonaton soybimon.

Həyğətədə, Xıdovənd bə puldor, əğniya iyən ərbobon duşi çı vəşyan iyən ehtiyocinə şəxson luzi si kardeyış noə. çoko ki, bə tojə bə dınyo omə hırdəni şıt doeyış bəçəy inə ehdəş noə və çı hırdəni ehtiyociş bıə şıtış həm çəy moə sinədə ğərolış doə.

Çın ayəonku umutedəmon:

1-ehanə bızınəmon ki, çəmə çiç heste Xıdo doə rızğo-ruziye, nəyin ki, çəmə mılk, bəvədə əmə vey hostonə formədə infoğ iyən baxş bəkardemon.

2-imoni nışonəonku qıləyni, infoğ kardeye və infoğ və baxşeş nıkardə kəs bə kufr iyən inodkorəti dıço bıə.

3-infoği barədə çı fərdi nodırıstə nəzə, boyis bedə çı umum milləti çəşədə çok iyən normalə koon, çəy nəzəku qıləy nodırıst iyən inhirofiyə ko bə nəzə bo.

وَيَقُولُونَ مَتَى هَذَا الْوَعْدُ إِن كُنتُمْ صَادِقِينَ (48) 

(Kofiron)Votedən: əgər rost votedon ın(ğıyoməti) və`də kon vaxt bərəse?

مَا يَنظُرُونَ إِلَّا صَيْحَةً وَاحِدَةً تَأْخُذُهُمْ وَهُمْ يَخِصِّمُونَ (49) 

Əvon ğərəz əvoni dəqətə qıləy(mardəvardə) sədo çəş kardedənin? qıləy holədə ki, de canq-deşmınəti ıştə sətasponeydən.

فَلَا يَسْتَطِيعُونَ تَوْصِيَةً وَلَا إِلَى أَهْلِهِمْ يَرْجِعُونَ (50) 

Çən, bə holədə nə vəsiyyəti zuşon heste və nə bəştə xıyzoni tərəf oqardey ğıvvə.

Navnə ayə dəvomədə ki,bə Xıdovəndi dəsturon iyən əmron nisbətədə  çı kali kofiron inodkorə ruhiyyə bəyon be,ın ayəon hamyedə:ım fərdon bə ğıyoməti həm məsxərə kardedən və votedən: şımə  ki,zıneydəniyon ğıyomətii ruj keynə bome bərəse,çən şımə boçi hejo çəyku tarseydon və ıştə koonku mığət bedon?  Ehanə həyğətən ğıyomət hestebu,jəqoədə əv keynə bəbe ta əmə həm çəy rəsey zəmoni çəşkəmon?

Kərimə-Ğıron çın bəhonəon cəvobədə hamyedə:qıləy ko vağe bıey zəmoni nızıney,bə həmonə ko nıbey dəlil ni.məsələn seysmik iyən zəlzələ zonada jiyə insonon zıneydənin ki,kon zəmon buməlarzə bome,əmmo zıneydən ki,hukmən bın əraziyədə zəlzələ bome.əve əvon hejo hozzı mandedən.

Ğıyomət,bə ilahi elm iyən ğudrəti əsos bərpo bəbe və bəşəri bəvədə hiç qıləy rolış ni.har zəmon ki,Xıdovənde-Xalığ irodəko,iləzədə qırd osmonon iyən zəmin volo bəbe və hiçkəsi zuş nibəvışke ki,çəy mığobilədə mığovimətko və ya çəyku fərolko.ın məsələ jıqo rə iyən de surəti bəbe ki,nə ikəsi vaxtış bəbe ıştə xıyzoni palu oqardo və nə ıştə bəpeştə qıləy sifarış iyən tovsiyə kardey fırsətış bəbe.çın ayəonku umutedəmon:

1-ğıyoməti inkor kardə kəsonboçəy nıbeyro hiç qıləy dəlilışon ni.liza cəhd kardedən de kali sıvolonku bəhs kardey bəştə qımoni əsos əy bə sıvoli ji bıbardon.

2-ğıyomət ilahi və`dəy və çəy zəmoni məlum nıbey bəçəy nıbey dəlil ni.

3-dınyo oxo iyən axırəti sıftə qıləy holədə bəbe ki,millət de harujnə keşməkeş iyən sətasponey ko məşğul bəbeyn.

4-de dınyo oxo qırd dınyəvi anqılon iyən xıyzoniyə rabitəon iyəndeyku co bəbeyn.ğıyoməti ruji həmməkəs ıştə pı-mo və ya fərzənd-jimoni həmroku co cəzo ya mıkofat ğəbul bəkarde.