810-ə hissə-Yasini surə-59-65 şərifə ayəon

810-ə hissə

وَامْتَازُوا الْيَوْمَ أَيُّهَا الْمُجْرِمُونَ (59) 

Və(votey bəbe) ha qınokoron ha! ımruj(çı çokə ko soybonku) co bıbən.

Navnə proqramədə Kərimə-Ğıron çı çokə ko soybon vəhıştədə bıə vırə və məğami tosif iyən vəsf kardedəbe. qıləy vırə ki, bə çokə insonon cismi asayiş iyən rufi oroməti boyis bəbe. ın ayə hamyedə: bə ruji yavə ko soybon səf iyən restə çı çokə ko soybonku co bəbe və ıştə royədə hərəkət bəkarden. qıləy ro ki, oxoysə bə cəhəndımi bərəse və vəyo həm boəvon ğərəz teləti iyən saxtəti co çi nibəbe. əvon axırəti əbədiyə əzobışon de dınyo rədəvardə ləzzət iyən şəhvəton hıryeşone və ğıyoməti ruji əvon ıştə nodırıstə vıjnemoni nəticə bəvindeyn. zira, ğıyoməti ruj ilahi ədoləti məğame və həni mənoş ni ki, çokə insonon de bevəcon i restədə iyən iyənde kəno bıbon. çoko ki,dınyo jimonədə iyande kəno bin və de iyande muaşirət kardedəbin.

Çın ayəku umutedəmon:

1-ğıyoməti ruj, insonon bəçəvon fik, əğedə iyən əməlon xoto co bıə ruje. vey mumkine valideyn ıştə fərzəndiku co bıbu və vey mumkine ğeyri-nezə odəmon iyande kəno ğərol bıqəton.

2- ğıyoməti ruj, çı yavə ko soybon cəzo iyən çokə ko xıvandon mıkofati barədə bıə ilahi ədoləti bə həyğət rəsə iyən real bıə ruje.

أَلَمْ أَعْهَدْ إِلَيْكُمْ يَا بَنِي آدَمَ أَن لَّا تَعْبُدُوا الشَّيْطَانَ إِنَّهُ لَكُمْ عَدُوٌّ مُّبِينٌ (60) 

Ha Odəmi fərzəndon ha! bəqəm şıməku əhd nıstənıme ki, bə şəytoni itoət məkənən. həyğətən, əv boşmə qıləy oşkoə dışmene.

وَأَنْ اعْبُدُونِي هَذَا صِرَاطٌ مُّسْتَقِيمٌ (61) 

Və fəğət bəmı pemandənən ki, sərostə ro ıme.

وَلَقَدْ أَضَلَّ مِنكُمْ جِبِلّاً كَثِيراً أَفَلَمْ تَكُونُوا تَعْقِلُونَ (62) 

Əmmo şəyton şıməku ziyodə dastəş bə zəlolət eğandışe. çən, çıro ıştə ağli oko doydəniyon?

In ayəon bə ğıyoməti ruji ərsədə hozzı bıə iyən çəvon səfon  çı muminoku co bıə qınokor iyən xətokoron xitob kardedə. Xıdovəndi tərəfiku bıə ım xitob, de mızəmmət iyən tehməti bə icoye ki, çıro şımə bə şəytoni əmron tabe biyon və Xıdo royon çı viro bekarde?

Kərimə -Ğıron Xıdovəndi ım xitobi çı xılğəti sıftədə qırd insononku sıə əhd-peymoni bə yod dənoydə. qıləy zəmon ki, həzrəte Odəm(ə) deştə jimoni həmro vəhıştədə bə şəytoni hiyləon giriftor beyədə, Xıdovəndi bəçəvon quşi rosneşe ki, boçi bə şəytoni vəsvəsəon dıço bıon iyən çımı ğədəğən kardə çiyon harde? Bəqəm zıneydə nıbiyon ki,şəyton şımə deşımıne?

İnson bəştə ilahi fıtrəti əsos, zıneydə ki, yavə ko bə vırə rosney de insoniyyət iyən insoni fıtrəti i omeydəni və hakəs de har nomi insonon bə jıqo koon tərəf dəvətko, şəytone ısət çı insoni cinsiku bıbu ya ne. bəşəri ilahi fıtrət əy çı yavə çiyonku nəhy kardedə və əy bə Xıdo əmron iyən itoəti tərəf səlo jeydə.

Insoni daxiliyə fıtrətisə əlovə, bə bi nəzə kardey iyən çı navkonəyon tarıxi barədə təfəkkur kardey həm nışon doydə ziyodə insonon bə qıno iyən fəsodi giriftor bıən ki, çəvon ağıbət zəlolət iyən həlokət bıə. ehanə dınyo jimonədə jıqo fərdon barədə mıtoliyəkəmon, bəvindemon ki, çəvon zəloləti əslə illət və səbəb, bə xorafati pemandey iyən bə kəcə fiki soybon və inhirofə fərdon itoət kardeye.

Çın ayəonku umutedəmon:

1-Xıdovənd de daxili fıtrət iyən ağli və de xarici peyğombəron roy, insoniku əhdı-peymonış sıə ki, əv hiçvaxti bə şəytoni ro tərəf nışo.

2-insoni vəzyət, həmişə dıqlə royku xaric ni.ya əv bəbe Xıdo bandə bıbu və ya çı şəytoni bandə.

3-ha nomıjədə Xıdoku bıpiyəmon ki, əməni bə rostə roy tərəf hidoyətko. bə ın ayəon əsos, mıstəğim iyən rostə ro həmonə ibodət iyən Xıdo itoəti roye.

4-bəbe çı ağl iyən əndişəku nəyin ki, çı jimoni rifohi koonədə, bəlkəm bo dəvardə tarıxi zıney iyən şəytoni bə dast dənoə kəson telə ağıbətiku ibrət peqəteyro bəhrə bobəmon.

هَذِهِ جَهَنَّمُ الَّتِي كُنتُمْ تُوعَدُونَ (63) 

Im bəşmə və`də doə bıə həmonə duzəxe(cəhəndıme).

اصْلَوْهَا الْيَوْمَ بِمَا كُنتُمْ تَكْفُرُونَ (64) 

(Şımə)Bəştə kofirəti xoto ımruj əyo varid bıbənən(bısutənən).

الْيَوْمَ نَخْتِمُ عَلَى أَفْوَاهِهِمْ وَتُكَلِّمُنَا أَيْدِيهِمْ وَتَشْهَدُ أَرْجُلُهُمْ بِمَا كَانُوا يَكْسِبُونَ (65)

Imruj bəçəvon qəvon mıhi bəjənemon və çəvon daston deəmə qəp bəjəne və çəvon lınqon bəçəvon kəsb kardə çiyon şoydəti bəkarde.

Vəynə ayəon dəvomədə ki, ğıyoməti ruji çı ğınokoron vəzyəti barədə be, ın ayəon hamyedə: dınyoədə peyğombəron çı çokə ko soybon mıkofat iyən yavə ko soybon cəzo barədə bıə ilahi və`dəon bə milləti rosnəşon be, əmmo məxloği veyni bə ın və`də bovə kardəşon nıbe və hejo bəy məsxərə kardedəbin. ısət əvon ımruj ğıyoməti ərsədə həmonə və`də həyğət bıey deştə çəşon mışohidə kardedən. əvon nəin ki, cəhəndımi vindedən, bəlkəm əyo vaird bedən iyən otəşi sutuney deştə qırd vucudi ləms iyən hiss kardedən.

İlahi ədolətinə məhkəmədə bə qınokor iyən mucrimon sıxan kardey ehtiyoci ni ta əvon qıləy çi niyon ya inkorkon. zira, çı zıvoni əvəzi, çəvon dast, lınqon iyən əzo və cəvarihon sıxan bəkardeyn və çəvon kardə əməlon barədə şoydəti bəkardeyn.

Çın ayəonku umutedəmon:

1-pəyğombəron bə qırd milləti huccətışon təmom kardə və həmişə çı cəhəndımi xətərışon bəçəvon quşon rosnəşone.

2-ğıyoməti ruji sıxan votey vositə bıə qəvon dəbastey bəbeyn və dast-lınqon sıxan bəkardeyn.

3-insoni bədəmi ə`zon inev çı dərk iyən şuuri soybin. liza çəvon sape dəvardə çiyon nıvıştedən oqətedən və ğıyoməti ruji çəy həxədə şoydəti bəkardeyn.