811-ə hissə-Yasini surə-66-70 şərifə ayəon

811-ə hissə

وَلَوْ نَشَاء لَطَمَسْنَا عَلَى أَعْيُنِهِمْ فَاسْتَبَقُوا الصِّرَاطَ فَأَنَّى يُبْصِرُونَ (66) 

Və ehanə bıpyimone çəvon çəşon nuri məhf bəkardemon.çən, royədə(iyande) dəvardero cəhd kardeyədə çokonə bəvindeyon?

وَلَوْ نَشَاء لَمَسَخْنَاهُمْ عَلَى مَكَانَتِهِمْ فَمَا اسْتَطَاعُوا مُضِيّاً وَلَا يَرْجِعُونَ (67) 

Və əgər bıpyimone əvoni çəvon vırədə məsx bəkardemon(əvoni bə beconə heykəli obəqordınemon) joqo ki, nə kardey bızınon bəştə roy dəvom bıdon(bəvə bışon) və nə bə(dumo) oqardon.

Vəynə bərnomədə bə qınokor iyən mucrimon ğıyoməti ruji məhkəmədə hozzı bey formə iyən çəvon bədəmi uzvon bəçəvon kardə qınon şoydəti barədə bəhs be. In ayəon hamyedə: Xıdovəndi cəzo fəğət bə ğıyoməti ruji məxsus ni. ehanə Xıdovənd i bıpyişe həmonə bın dınyoədə həm mıxtəlifə qınokoroə fərdon cəzo bədoe və əv bəvon cəzo doey koyədə ociz ni.

Əgər Xıdovəndi bıpyişe bəçəvon çəşon sape qıləy pardə şobədoe ki, əvon həni vindey ğudrətışon nibəbe. Haruj ki, əvon de ə ro şedəbin, həni ə ro şıey əzınin. ısət çı bımando, roy pıyədə çı cokəsonsə bənav dəşon və ım boəvon qıləy vey qədə cəzo bəbe. həmçinin ehanə Xıdo irodəko, əvoni bə qıləy hərəkət kardey nızınə becon və berufə mıcəssımə iyən heykəli pebəqordıne. bın zəmon əvon nə bə nav hərəkət kardey bəzıneyn və nə bə dumo pekırey bəzıneyn.

Ğasbu ım dıqlə cəzo ğıyoməti ruji həm bıbu. zira, mucrim iyən qınokoron bə əbədiyə hərbaxtəti vırə bıə vəhışti ro pəydu kardeyku ociz bəmandeyn və məhşəri səhroədə bə heyrət iyən sərqərdonəti dıço bəbeyn.

Çın ayəonku umutedəmon:

1-inson dınyoədə həm ilahi ğəhro-ğəzəbiku əmonədə ni. liza inson bəbe ilahi cəzo xətəriku iyən neməton dasto doeyku ğafil  nıbu.

2-Xıdovənd dınyoədə bə insonon fəğət məxsusə vırəonədə cəzo doydə ta ixtiyor iyən səçıni həx çəvon dastiku sıey nıbu.

وَمَنْ نُعَمِّرْهُ نُنَكِّسْهُ فِي الْخَلْقِ أَفَلَا يَعْقِلُونَ(68) 

Və bə hakəsi dırozə umr bıdəmon, əy xılğətədə bərəks bəkardemon(bə co şikil dəbənemon .çəy hafizə yodo bebəşe və çəy ğəddış şat bəbe) aya ıştə ağli oko doydənin?

Navnə ayəon dəvomədə ki, bə ilahi dınyoədə bıə cəzoonku qıləyni işorə be, ın ayə hamyedə: həlbəttə, qırd insonon piyəti vaxti bə ağli iyən cismi cəhəto zəyfəti iyən ocizəti dıço bedə və inev bəştə hırdənəti zəmoni oqardedə. ım həyğətədə bəy işorə kardedə ki, cıvonəti iyən miyonsorəti zəmonədə inson bəbe dırıst iyən səhihə roy bıvıjno və həmonə ro həm bəbe bə oxo bırosno. ısət inson oruzu bıko ki, az piyəti vaxti bə həxə roy tərəf obəqardem iyən çokə inson bəbem, ım qıləy xiyoli iyən ğeyri-həyğiyə oruzuye.

Co tərəfo inson bəbe qımon nıko ki, de umri tulani iyən dıroz bıey, çəy zu iyən ğudrət həm ziyod bəbe. həmmə insonon hətto hakim iyən podşoon həm piyəti zəmonədə jıqo bə zəyfəti iyən ocizəti dıço bəbeyn ki, bənə hırdənon bəbeyn ta ikəs bəvon xorək bıdon ya çəvon oləton əvəzkon. çən, həmonə piyəti və zəyfəti vaxt rəsey bənav, bəbe fırsəti ğənimət bızınəmon, mısbətə koon bə vırə bırosnəmon iyən boştə iyən camiyə qıləy səmərə və foydəmon bıbu.

Çın ayəku umutedəmon:

1-insoni umri dıroz bıey bo insoni ğudrət vardedəni. bəlkəm, umri dırozəti çı ğudrət və zumandəti pik həddiku bə zəyifəti iyən ocizəti tərəf oqardeye.

2-insoni umr məhdude və çəy oruzon ziyod. ə kəs bəbarde ki, ıştə məhdudə umriku veyə bəhrə bıbardo.

3-insoni coni peroxnə çi, çəy səhihə əndişə iyən ıştə ağliku oko doeye. əmmo bə insoni ıştə umriku məxsusən cıvonətiku ğafil bıey boyis bıə çi, həyğətədə çəy həlokət iyən bədbəxtəti amile.

وَمَا عَلَّمْنَاهُ الشِّعْرَ وَمَا يَنبَغِي لَهُ إِنْ هُوَ إِلَّا ذِكْرٌ وَقُرْآنٌ مُّبِينٌ (69) 

Və əmə bəy(bə pəyğombəri) şeer nıomutımone və ım bəy(hiç)damedəni. əv ğərəz zikr iyən ruşinə Ğıroni co çi ni.

لِيُنذِرَ مَن كَانَ حَيّاً وَيَحِقَّ الْقَوْلُ عَلَى الْكَافِرِينَ (70)‏

(Im Ğıron bəçəy xotoye ki,) Ta hakəsi(dılış) bəyjiye, çəşnavi bıdo,(bə kofiron huccət təmom bıbu) iyən Xıdovəndi çəvon barədə bıə sıxan bə həyğət bırəso.

Bə tohid iyən miadi ayid ayəon bəpeştə, ın ayəon çı nıbuvvəti həxəti barədəy və hamyedə: çəmə bə həzrəte Muhəmməd(s)-i nozil kardə çi, şeyr ni və Peyğombəre-Əkrəm(s) həm şayir ni. harçənd Kərimə-Ğıroni ziyodə ayəon, məxsusən Ğıroni oxonə surəon qıləy məxsusə ahənq iyən vəznış heste, əmmo bə tarıxi şoydəti əsos, pəyğombər(s) şayir bıəni və şerış votəni.

Həlbəttə, bə pəyğombər(s) –i şayirəti behtoni ğandey, bə Ğıroni şeri holəti məxsus bıey xoto nıbe, bəlkəm bə ərəbon miyono bıə qıləy nodırıstə bovə əsos be ki, qımon kardedəbin şayiron de cınon iritbat iyən rabitəşon heste və əvon de ın roy vositə çəvonku şer omutedən. çun, pəyğombər(s)-i sıxanon boəvon tojə be və əvon deəy oşno nıbin, ə həzrəti mıttəhəm kardedəbin ki, bənə şayiron bə cınon təsiri ji dəşə və əy ım əcibə sıxanon çəvonku omutəşe vəə bəştə zıvon vardedə.

Ayəon dəvomədə hamyedə: bə pəyğombər(s)-i zıvon cari bıə çi, ilahi kəlome və ım həm bo milləti təzəkkur iyən pandi xotoe və hakəs çı həx iyən həyğəton dumo bıbu, deçəy tars iyən çəşnavi ıştə həvaye-nəfs iyən şəytoni vəsvəson ziyoniku əmonədə mandedən. həlbəttə, ın ayəon ki, bə kofiron quşon rəsedə, bəvon hiç qıləy təsiriş ni. zira kufr iyən de həxı inodkorəti ruhiyyə jıqo çəvon vucudış dəqətə ki, jıqo bızın çəy fik iyən dıl sığ bıə və həxə sıxan bəy təsir kardedəni. demiyən boyis bedə ki, huccət bəvon təmom bedə və həni ğıyoməti ruji nıvoton ki, həxə sıxan bəçəmə quşon rəsəni.

Çın ayəku umutedəmon:

1-Kərimə-Ğıron şer iyən şayirəti inkor kardedəni, bəlkəm peyğombəri(s) şayirəti iyən Ğıroni şeer bıey nəfy iyən təkzib kardedə.

2-Ğıron bə şayiron təxəyyulon əsos bıə şeer ni.əv çı hikməti soyb bıə Xıdo kəlome və bə hikmət iyən məntıği əsose.

3-həxı ğəbul nıkardə kəson bımyonsə co qılə çi ni. insoni erj bəçəy dıli oğoəti iyən rufi pokəti xotoye. liza həyğiyə imoni soybon dılon bəyjin və çəvon qıləy realə jimonışon heste və kofiron bənə mardəyon həyğiyə jimoniku məhrumin.çıro ki, kufr dılon kışteydə.