816-ə hissə-Saffati surə-7-11 şərifə ayəon

816-ə hissə

وَحِفْظاً مِّن كُلِّ شَيْطَانٍ مَّارِدٍ (7) 

Və(əy) har qıləy usyonkor iyən yoləşəxə şəytoniku muhafizə kardemone.

لَا يَسَّمَّعُونَ إِلَى الْمَلَإِ الْأَعْلَى وَيُقْذَفُونَ مِن كُلِّ جَانِبٍ (8) 

Əvon bə penə(sırron) quş doey əzınin və har tərəfiku bəçəvon tərəf(şəhabsəng və metoroid) ğandey bedə.

دُحُوراً وَلَهُمْ عَذَابٌ وَاصِبٌ (9) 

Ta tojney bıbon və boəvon dayimiyə əzob heste.

إِلَّا مَنْ خَطِفَ الْخَطْفَةَ فَأَتْبَعَهُ شِهَابٌ ثَاقِبٌ (10) 

İlla qıləy şəyton(bə osmon bışo ta) de surəti qıləy xəbə bədast biyo ki, qıləy zumandə astovə əy təğib kardedə.

Dəvardə bərnomədə votemone ki, Xıdovənde-Aləm osmoni astovəonış boəy zinətış ğərol doə və zəmini sakinon çı osmoni astovəon reçinətiyonku bəhrə bardedən. ın ayəon bə osmoni co tərəfon yəni bəçəy ğeyri-zohir və ğeyri-maddiyə tərəfon işorə kardedə və hamyedə: şəytonon osmonədə bə məlayikon muhit iyən marzon nufuz kardey niyyət və ğəsdışon ta dızdəki bəçəvon sıxanon ğuş bıdon iyən bəçəvon çəğsədon ələyh ko bıkon.

Imi həm zikr kardey lozıme ki, çı zəmini əhli məlumat və xəbon çı pentonə aləmi mələkon ixtiyorədə ğərolış qətə ki, əvon əyo de iande mızokirə kardedən və şəytonon həm çımi dumon ki, bə ğeybi aləmi sırron dast pəydukon. əmmo havaxti əvon bə sərhəddi nez bıbon, bəvon hucum bedə ta çə həmonə vırəku tojney bıbon.

Quya ın ayəon bə bəşəri bəşorət doydə ki, Xıdovənd icozə doydəni çı cınonku bıə idastə usyonkorə fərdon ki, əmə bəvon şəyton votedəmon, bə aləmi idorə iyən tədbiri ğərorqo iyən mərkəzi ki, firiştə və mələkon çəy xıdmətkor iyən karquzaronin, nez bımandon və bəçəvon sırrinə sıxaanon quş bıdon və ya çəvon koonədə qıləy nosozəti icodkon.

Ayə dəvomədə hamyedə: hətto əgər kali şəytonon kardey bızınon çı maneəonku dəvardon və bə firiştəon ğərorqo nez bıbon və qıləy xəbə bə dast biyon, rəyrə bəvon həmlə bedə və əvon çı miyoniku şedən. bənə ımi qıləy mətləb Hicri mıborəkə surə 17 iyən 18-ə ayəonədə və həmçinin Mulki mıborəkə surə 5-ə ayədə omə.

Isət bə ayəon zohiri dığğət kardə holədə Kərimə-Ğıron iyo bə qıləy məhsus iyən mışohidə bıə ko işorə kardedə, ya ayənədə oko doə bıə təbiron təmsil ya təşbihin, qıləy məsləy ki, çəy barədə bəhs bıə. zira bənə ımi ayəon Ğıronədə omə və umum mıəfssır iyən təfsirəvonon bın bovədən ki, iyo Xıdovəndi mənzur iyən məğsəd bə məhsus iyən hiss bıə koon işorə bıə kəlmə və ləfzon nin. mıfəssıron nəzəku ın ləfzon inev de ağıli dərk kardə bıə çi bə hiss kardə bıə təşbihe. bənə Lovh, Ğələm iyən Kursi bıə kəlməon.

Bədihi iyən təbiiye ki, ın ləfzon bəçəy maddi iyən zohiri mənon tətbiğ kardey nibəbe. çımisə əlovə Xıdovənd coqlə vırədə hamyedə: çəmə nozil kardə çi ibaş, məsəlonin ki, ğərəz alimon hişki dərk kardedənin.

Çın ayəonku umutedəmon:

1-penə aləmədə iyən mələkon nəzdədə sırron heste ki, şəytonon əvoni bə dast vardey dumon. əmmo Xıdovənd  jıqo qıləy ko jıqo icozə bəvon doydəni.

2-bə cokəson sıxanon dızdi quş doey şəytoniyə koye və Ğıroni mədəniyyədə əv mızəmmət bıə.

3-bəpe de milləti sıron dumo bıə iyən ıştə mənfəəton cəhətədə əvoni ifşo kardey dumo bıə kəson ciddiyə rəftor bıbu.

فَاسْتَفْتِهِمْ أَهُمْ أَشَدُّ خَلْقاً أَم مَّنْ خَلَقْنَا إِنَّا خَلَقْنَاهُم مِّن طِينٍ لَّازِبٍ (11) 

Çən, çəvonku dəpars: ”aya əvon xılğətədə vey saxtin(zumandin) yaanki, əmə(osmonon iyən zəminədə) ofəyəmone?”. əmə əvonımon çı dəçıkə tuliku ofəyəmone.

Vəynə proqramədə ğeydımon karde ki, Saffati mıborəkə surədə bə bənə miad iyən məbdə bıə etığodi məsələon ziyodə təkid bıə. ın ayə bə pəyğombəre-əkrəmi(s) xitob kardə holədə hayedə: miadi inkor kardə kəsonku dəpars ki, çokonə əvon ijən sənibəton insoni xəlğ kardey koyədə bə Xıdovəndi ğudrəti şəkk kardedən iyən əy inkor kardedən? aya ğıyoməti ruji əvoni ijən nubəsəton xəlğ kardey saxt iyən çətine ya ın əzəmətinə osmonon xılğət? əvon çı ov iyən tulikuofəyə bıən. ısət çı iminə inson ki, mıstəğimən iyən sərostə holədə de tul iyən ovi xəlğ bıə və ya çı mevcud bıə insonon ki, çəvon hardemon iyən peşomon həm çı til iyən ovikuye və insonon həmmə mardey bəpeştə həm bə həmonə tuli dılə bəşen və əyo miyoniku nibəşeyn.

Imruj həm elmi nəzəku sabit bıə ki, çı insonon cismi xısusiyyəton çəvon qırd zərrəonədə mevcude və çı har insoni DNA molekulon bənə çəy anqışton rizi çı cokəsonku farğ kardedə. çən, kifoyət kardedə ki, çı har insoni iqlə zərrə bımando və Xıdovənde-Xalığ ğıyoməti ruji həmonə zərrə çı tuli dılədə ruşd iyən ovc bədoe  və əy ijən sənibəton bənə ımrujnə insoni xəlğ bəkarde.

Dınyo nizom iyən soxtemonədə qıləy vey qədə zərrə bıə sperma çı inə ləvə və luzədə ozavziyedə və 9 manq bədiqə qıləy komilə tifl iyən hırdəni formədə bə dınyo omeydə. ğıyoməti ruji həm bənə zəminədə dılədə perəsə beməyon zəmini bətnədə inkişof bəkarde pebərəse və bənə qıləy komilə insoni çı zəminiku xaric bəbe bebəşe. aya həyğətən, jıqo qıləy imkonış ni iyən ğeyri-mumkine?

Çın ayəku umutedəmon:

1-munkir iyən kofironku sıvol kardey, boçəvon hıtə vijdonon oğo kardey xotoye. təlim iyən tərbiyə nizomədə veyniyə vıronədə mətləbon mıstəğim iyən sərostə formədə ilğa iyən təlğin əvəzi, əy de sıvol iyən mığoyisə metodi oko doey bəbe.

2-insoni vəomə iyən çəy ğıyoməti ruji sənibəton bəyji bıey həxədə bıə inkor iyən şubhəon kali mənşə, insoni dəvardeyədə ıştə çokonə xəlğ bıey çı yodo bekardeye.