817-ə hissə-Saffati surə-12-21 şərifə ayəon

817-ə hissə

بَلْ عَجِبْتَ وَيَسْخَرُونَ (12) 

Bəlkəm, tı(çəvon fiiku) təəccıb kardedəş və əvon(bətı) məsxərə kardedən.

وَإِذَا ذُكِّرُوا لَا يَذْكُرُونَ (13) 

Və havaxti(bəvon) nəsyət doey bıbu, pand qəteydənin.

وَإِذَا رَأَوْا آيَةً يَسْتَسْخِرُونَ (14) 

Və havaxti qıləy mecuzə bıvindon, iyən de bə məsxərə karde dəvət kardedən.

وَقَالُوا إِنْ هَذَا إِلَّا سِحْرٌ مُّبِينٌ (15) 

Və voteydən: ım ğərəz oşkoə codu co çi ni.

Navnə proqramədə votemone ki, kofiron ğıyoməti ruji bə həjə jedəbin və inkor kardedəbin. ın ayəon bə Xıdo-Rəsuli(s) xitob kardə holədə hamyedə: əvon nəinki, ğıyoməti inkor kardedən, bəlkəm bəy məsxərə iyən istehzo həm kardedən. əmmo ıştı ki, bə ğıyoməti ruji qıləy komilə yəğın iyən bovə heste, çəvon istehzo iyən məsxərəku təəccıb məkə ki, çokonə əvon xəbə və aqahətişon nıbə çi bedəlil təkzib kardedə. kaş, əvon hiç nıbu sukutışon kardəbe iyən tamışon jıəbe və jıqoşon votəbe: əmə zınedənimon ğıyomət vağe bəbe ya ne?

Ayəon dəvomədə hamyedə: çəvon ım inkori dəlil, çəvon nodonəti iyən cəhli ni, bəlkəm çəvon inodkorəti iyən nəğbətətiye. liza havaxti çın mevzu həxədə bəhs beyədə əvon boçəy məsey həm hozzı nin və bəy dığğət kardedənin. çımisə əlovə həm ehanə qıləy mecuzə həm bıvindon, boəy ğəbul kardey hozzı bedənin, bəlkəm cokəson həm bəy istehzo kardero dəvət kardedən və əvoni bə dast dəğandero voteydən: ımon həmonə çı coduqəron kardə koonin.

Qıləy holədə ki, çı mecuzə de codu tafut ruşin iyən oşkoye. coduqəri bə çandə sor məşğ, cəhd iyən təlimi ehtiyociş heste ta qıləy ko əncom bıdo. qıləy holədə ki, Xıdo pəyğombər(s) hiç qıləy təlim iyən məşğ nıbə holədə fəğət deştə pərvərdıqorə Xıdo izn iyən irodə mecuzə iyən qıləy xariğul-adə ko bə vırə rosneydən .

Çın ayəonku umutedəmon:

1-ehanə çəmə dılon bo həxı ğəbul kardeyro hozzı nıbon, hətto insonon həmməysə çokə qılə həm sıxan bıvoto, bə həmonə insoni təsir nibəkay.

2-məsxərə de həxı mıxolifət kardə kəson şivəonku qıləyniye ki, bəbe çəyku nıtarsi iyən meydoni təy karey lozım ni.

3-mışrikon həyğətədə Kərimə-Ğıroni xariğul-adə bıey iğror kardedəbin, əmmo bəy sehr iyən codu votedəbin.

أَئِذَا مِتْنَا وَكُنَّا تُرَاباً وَعِظَاماً أَئِنَّا لَمَبْعُوثُونَ (16) 

(Voteydən:)Aya çun mardimon və tul iyən(pıxə) astə bimon(ijən) ruf doey(bəyji kardey) bəbimon?

أَوَآبَاؤُنَا الْأَوَّلُونَ (17) 

Və aya çəmə iminə pıon(həm) rost kardey bəbeyn?

قُلْ نَعَمْ وَأَنتُمْ دَاخِرُونَ (18) 

Vuji: bəle, (qırd bəyji bəbeyn)qıləy holədə ki, xar iyən hırd(bəbi) yon.

Vəynə ayəon dəvomədə ın ayəon miadi inkor kardə kəson de Xıdo-Rəsuli(s) miyono diyaloq iyən votemonon bəyon kardedə. odəmi dığğəti cəlbəkə çi ıme ki, bın ayəonədə həm əvon bo miadi təkzibiro qıləy dəlil vardedənin və fəğət çəy ğeyri-mumkin bıey iyən ıştə təəccıbi bəyon kardedən. liza, əvon bovə nıkardə holədə pəyğombəriku(s) dəparsedən ki, çəvon cəsədəon pıxə və bə tuli təbdil bıə  bımyon ğıyomti ruji çokonə bəyji bəbeyn və bəqəm ım mumkine? Məxsusən çəmə dədə-bobon ki, çandə da ya sa sorone ki, mardən şıən və çəvonku hiç qıləy əsər-əlomət həm mandəni. əgər əmə çəvon quron həm bıkandəmon ğərəz tul iyən xoki əyo hiççi nibəvindemon.

In sıvolon təbiiyə formədə bo qırd insonon qıləy muəmmay və əvon çəyku bəhs kardedən. əmmo muminon bə Xıdovəndi be nəhoyətə ğudrəti bovəşon heste və zıneydən ki, Xıdovənd ğadire ijən sənibəton bımyon zəminiku xaric və bəyjiko. əvon çı peyğombəron xəbə doə iyən ğıyoməti həxədə osmoniyə kitobonədə omə məlumaton və mardə insonon ijən bəyji bıey ğəbul kardedən. əmmo əkəson ki, bə Xıdo iyən bəçəy peyğombəron imonışon ni, jıqo qıləy ko ğəbul karde vey saxt iyən ğeyri-mumkine.

Çın ayəonku umutedəmon:

1-Miadi inkor kardə kəson qıləy ğoymə məntığ iyən istidlolışon ni və əvon dəlili əvəzi fəğət ğeyri-mumkin zıneydən.

2-sıvol iyən şubhəon harçənd de sədoğətiyən çokə niyyəti həm nıbu, əmmo bəbe bəvon de oşkoə holəti iyən de ruşinə dəlili cəvob doey bıbu.

3- de həxı inodkorəti iyən nəğbəsəti axırətədə bə insoni zıllət və xarəti boyis bəbe.

فَإِنَّمَا هِيَ زَجْرَةٌ وَاحِدَةٌ فَإِذَا هُمْ يَنظُرُونَ (19) 

Həyğətən, əv(fəğət) qıləy zikkəy. çən, ğəflətən əvon(rost kardey bəbeyn və ğıyoməti səhnə bəvindeyn).

وَقَالُوا يَا وَيْلَنَا هَذَا يَوْمُ الدِّينِ (20) 

Və bəvoteyn: bın cəzo ruji vay bıbu bəmə!

هَذَا يَوْمُ الْفَصْلِ الَّذِي كُنتُمْ بِهِ تُكَذِّبُونَ (21)

(Bəli bəvon votey bəbe:)In həmonə(həxı çı botıliku) co bıey ruje ki, (şımə)dayima əy təkzib kardedəbiyon.

Vəynə ayəon dəvomədə ın ayəon bə Xıdovəndi bımyon bəyji kardey ğudrəti işorə kardedə və hamyedə: qımon məkənən ki, ğərole ğıyoməti ruji tarıxi dırozi çandə milyard insonon ki, mardən iqlə-iqlə ya dastə-dastə bəyji bəbeyn, bəlkəm de qıləy osmoniyə zikməvulə iyən sədo ki, ilahi irodə bəyon kardedə, qırd bımyon bə ikkərə bəyji bəbeyn bəheşteyn və bə ətrofi ebərəxeyn.

Təbiiye kofiron ki, iqlə zəmonədə çı qırd mardə insonon bəyji bıey səhnə mışohidə bəkardeyn, ıştə dınyoədə inkor kardə çi iğror bəkardeyn və bəvoteyn: ım həmonə çiye ki, əmə dınyoədə ımi bə həjə jeydə bimon və inkor kardedə bimon. vay bıbu bəmə ki, ımruj əmə çiç bəkardemon və de əmə çı curə rəftor bəkardeyn?

Çın iğrori mığobilədə ilahi firştə və mələkon həm təkid bəkardeyn ki, ımruj həxı çı botıliku iyən muminon çı kofiron və munkironku co bıə ruje. həmonə ruji çokə ko soybon çı yavə ko soybonku co bəbe və Xıdovənd həmonə ruji ıştə bandəon miyono hakiməti bəkarde və hukm bədoe.

Çıın ayəonku umutedəmon:

1-ğıyoməti ruji bə əməl iyən bımyon bəyji  bıey dəfi surətədə iyən ğəflətən bəbe, nəinki, tədrici iyən vaxt bəbarde.

2- ğıyoməti ruji çı mışrikon heyrəti dılədə iyən mot bəmandeyn və bəştə tale nəzə bəkardeyn.

3-ğıyoməti ruji həsrət iyən peşmonəti ruje. səykəmon dınyoədə qıləy ro bıvıjnəmon ki, ğıyoməti ruji həni bə həsrəti dıço məbəmon.zira həni həmonə ruji peşmonəti hiç qıləy foydəş nibəbe.