819-ə hissə-Saffati surə-31-38 şərifə ayəon

819-ə hissə

فَحَقَّ عَلَيْنَا قَوْلُ رَبِّنَا إِنَّا لَذَائِقُونَ (31) 

Çən, çəmə pərvərdıqori(əzobi) və`də bə həyğət rəse. beşəkk, əmə əzobi bəçaştemon.

فَأَغْوَيْنَاكُمْ إِنَّا كُنَّا غَاوِينَ (32) 

Çən, əmə şıməmom bə zəlolət eğande. zira, əmə ıştən həm mınhərif, zəlolətədə bimon.

فَإِنَّهُمْ يَوْمَئِذٍ فِي الْعَذَابِ مُشْتَرِكُونَ (33) 

Çən, əvon həmonə ruji ilahi əzobədə mıştərəkin.

Dəvardə proqramədə votemone ki, ğıyoməti ruji bə zəlolət eqıniyə iyən ıştə ro qin kardə kəson, ıştə qınoon bəştə dınyoədə bıə camiyə yolon iyən kufri sərdoron qiy şobədon və bəvoteyn ki, əvon əməşon bə inhirofi tərəf kəşəşone. əmmo, əvon cəvob bədoyn ki, şımə ıştən çı inhirofi dumo biyon və bəştə tuğyongərəti iyən bə həxıku dəvardey xısləti xoto, çəmə dumo omiyon. nəinki, əmə şıməmon məcburi surətədə bə zəlolət eğandemone iyən mınhərif kardemone. əmə ıştən həm ıştə roy qimımon kardəbe və şımə həm çəmə dumo omiyon və mınhərif biyon. ın ayəon hamyedə: ıştə roy qin kardə rəhbər və yolon bə ın nəticə bərəseyn ki, jıqo hesı-pes iyən canqi hiç qıləy foydəş ni. zira, çəvon həxədə ilahi əzobi fərmon beşə və əvon rəyrə cəhəndımi əzobi təmi bəçaşteyn. əvon həmmə bın ilahi əzobədə şərikin və çəvon vırə hejo cəhəndıme. həlbəttə, təbiiye ki, çəvon vırə dərəcə iyən mərtəbəon farğ kardedə. hakəs bəştə qıno iyən bəçəy cokəson zəlolətədə bıə təsiri mığdor iyən mizoni əndozə cəzo bəvinde və çı qınokoron cəzo i formadə ni.

Çın ayəonku omutedəmon:

1-ğıuoməti ruji qınokoron bə peyğombəron dınyoədə elon kardə ilahi əzobi və`də etırof bəkardeyn. əmmo, çın etırofi həni boəvon hiç qıləy foydəş nibəbe.

2-de roy qin kardə kəson əyşt-nışt karde və bə ico bıey, çı insoni zəloləti zəminə hozzı kardedə və bəçəvon de cəhəndımi əhli bə ico bıey boyis bəbe.

3-fosidə fərdon bo camiyə rəhbər vıjniye və bəvon pemandey bə zılm iyən zəloləti zumandəti boyis bəbe və nəticədə millət əzobədə şərik bəbeyn.

إِنَّا كَذَلِكَ نَفْعَلُ بِالْمُجْرِمِينَ (34) 

Bərosti əmə de qınokoron jıqo rəftor kardedəmon.

إِنَّهُمْ كَانُوا إِذَا قِيلَ لَهُمْ لَا إِلَهَ إِلَّا اللَّهُ يَسْتَكْبِرُونَ (35) 

Əvon ki, havaxti boəvon ğərəz Xıdo co məbud ni(la ilahə illəlah)-votey bedə yoləşəxəti, təkəbbırəti kardedən.

In ayəon bə Xıdovənd de mucrim iyən qlınokoron rəftori adəti işorə kardedə və hamyedə: çoko ki, peyğombəron milləti bə tohid iyən İ bıə Xıdo pərəstışi tərəf də`vət kardedəbin, çəvonku idastə təkəbbır kardedəbin və hozzı nıbin bəçəvon sıxanon quş bıdon və ya çəvon votə sıxanon barədə qıləy fik-fam iyən təfəkkurkon. joqo fərdon bəştə inodkorəti xoto çı kufr iyən şırki roşon qəte və ğıyoməti ruji həm boəvon saxtə əzob heste. çın həxı mığobilədə bıə ın təkəbbırəti iyən inodkorəti qahi vaxti  ıştəni mol, məğam iyən nomi cəhəto bəpe qəteyku və ya qahi vaxti həm bəştə dədə-bobon iyən camiyə yolon kur-kuronə təğlidi iyən çəvon ıştə əğayidədə bemənoə təəssıbi xoto be. har qıləy surətədə ın həxı məsey iyən əy ğəbul kardey mığobilədə qıləy dıjdə maneəy. həxı mığobilədə yoləşəxti iyən təkəbbır insoni bə vırə rosneydə ki, qıləy yoləşəxə şəxs nəinki, həxı inkor kardə, bəlkəm, bə həxə sıxani votə şəxsi istehzo iyən məsxərə həm kardedə və bəy qıləy norəvoə nisbət həm doydə.

Çın ayəonku omutedəmon:

1-ilahi və`dəon dınyo iyən axırətədə real bəbe və bə həyğət bərəse və hiçvaxti çımi xilof nibəbe.

2-qıno, cinoyət iyən inhirofi rəğ-rişə, çı tohid, rostəti iyən həxı mığobilədə təkəbbırəti kardeye.

3-peyğombəron milləti bə İ bıə Xıdo tərəf səlo jeydəbin,nəinki, bəştə tərəf. əvon bın dəvətədə boştə hiç qıləy nəf iyən foydə nəzədə qətəşon ni və eyni holədə hejo ıştə mıxolifon tərəfiku de əzob-əziyyət iyən behtonon dim bədim omən.

وَيَقُولُونَ أَئِنَّا لَتَارِكُوا آلِهَتِنَا لِشَاعِرٍ مَّجْنُونٍ (36) 

Və votedən: ayə əmə bə qıləy cındoə şayiri xoto ıştə xıdoon sə va bıdəmon.

بَلْ جَاء بِالْحَقِّ وَصَدَّقَ الْمُرْسَلِينَ (37) 

(Hiçvaxti jqıo ni)Bəlkəm, əy həxış vardə və(navkonə) peyğombəronış təsdığ kardə.

إِنَّكُمْ لَذَائِقُو الْعَذَابِ الْأَلِيمِ (38) 

Beşək, şımə qıləy ilahi dardnokə əzobi bəçaştiyon.

In ayəonbə mışrikon çı peyğombəron də`vəti rədd kardeyro bəhonəon işorə kardedə və hamyedə: əvon peyğombəron mıttəhəm kardedəbin ki, çəvon sıxanon bənə şayiron bə xiyol iyən emossiyaon əsose, nəinki, bə fik iyən məntıği əsos. çımisə əlovə votedəbin ki, peyğombəri ın şeer iyən şayirətiş bə cınon təsiri xoto omutəşe və ıştəku hiç qıləy çiş ni.

Tarıxədə omə ki, ərəbi cəzirə və ləpəkiodəmon etığodışon hestebe ki, şayiron de cınon rabitə vositə şeer votey fəndi omuteydəbin və ğəşənqə şeer votey zıneydəbin.

Çın ayəonku omutedəmon:

1-çı xorafi iyən nodırıstə fik iyən əğıdəon təəsıbi kəşey, bə insoni həxı ğəbul kardey mane bedə.

2-behton iyən təhğır bo peyğombəron dəvəti pevolo bıey vəy qəteyro, çı həxı inkor kardə kəson əbzoronkuye.

3-qırd peyğombəron təlimon iqlə cəhətədən. əvon həmmə milləti bə tohid iyən İ bıə Xıdo pərəstış kardey tərəf dəvət kardedəbin.