822-ə hissə-Saffati surə-62-68 şərifə ayəon

822-ə hissə

أَذَلِكَ خَيْرٌ نُّزُلاً أَمْ شَجَرَةُ الزَّقُّومِ (62) 

Aya həmonə(vəhışti neməton) bo mehmon bıeyro vey çoke ya Zəğğomi do?

إِنَّا جَعَلْنَاهَا فِتْنَةً لِّلظَّالِمِينَ (63) 

Həyğətən, əmə Zəğğomi do bo(kofirə) sıtəmkoron işkəncə iyən əzobi vositə ğərol domone.

Vəynə ayəonədəbə bə vəhışti neməton i quşə iyən bə vəhışti əhli rifoh iyən asayişi işorə kardemone. əmmo, ın ayəon çəvon holətış de duzəx iyən cəhəndımi əhli  vəzyət və şərayiti mığoyisə kardedə və hamyedə: aya vəhıştədə de xos iyən nuş bıəninə mıxtəlifə peşoməninə çiyon vey çoke ya çı cəhəndımi əhli de tel iyən zəhrımorə peşomənin və hardəninə çiyon?

Ruşine ki, ın dıqlə de iyande mığoyisə kardey kərdənin ni ta votey bıbu kon qıləyni vey çoke. zira,umumən duzəx iyən cəhəndım çı rifoh iyən asayişi vırə ni ta əy de mıxtəlif nev ləzzəton iyən asayişon pur bıə vəhışti mığoyisəkəmon. bəlkəm, jıqo təbiron bo ğafil iyən hıtə şəxson oğo kardey iyən bəvon təzəkkur iyən pand doey xotoye ki, ehanə şımə nodırıst və noloyığə koon bə vırə bırosnon, bə ləzzət və xoşəti rəseydon, əy de vəhışti əbədiyə rifoh iyən asayişi və de cəhəndımi daymiyə əzob iyən norohətəti mığoyisəkənən.

Çın ayəonku umutedəmon:

1-de iyande koon mığoyisədə fəğət çı dınyo rədəvardə təsir iyən nəticəon məvindəmon. bəlkəm, bə uxrəvi mıkofot iyən cəzo həm dığğətkəmon.

2-bə cəhəndımi vardi bıey meyar və şərt, zılm və sıtəme. bəştə, bə cokəson, bə Xıdo iyən bəçəy ovliyaon kardə bıə zılmon.

إِنَّهَا شَجَرَةٌ تَخْرُجُ فِي أَصْلِ الْجَحِيمِ (64) 

Bərosti, ın do çı cəhəndımi nığılə vırəku perəseydə(beşedə).

طَلْعُهَا كَأَنَّهُ رُؤُوسُ الشَّيَاطِينِ (65) 

Çəy zizə və huşon bənə şəytoni(divi) kəlləon(çırkin iyən bevəce).

فَإِنَّهُمْ لَآكِلُونَ مِنْهَا فَمَالِؤُونَ مِنْهَا الْبُطُونَ (66) 

Çən, cəhəndımi əhl çəyku bəhardeyn və ıştə luz-ləvə de əy pur bəkardeyn.

In ayəon cəhəndımədə bıə Zəğğomi do vəsf kardedə. çoko ki, Duxani mıborəkə surə 43-46-ə ayonədə həm çı Zəğğomi bardə jıqo qıləy sıfəton omə. bə dıqlə dast ayəon əsos, Zəğğom qıləy rəsəy və doye ki, çı cəhəndımi sutunə otəşon miyono perəsedə və xaric bedə və cəhəndımi əhl çəyku bəhardeyn. təbiiye ki, qıləy beməy ki, çı otəşi miyono perəso, nəinki, çı ovi miyono, qıləy sutunə xosyətış bəbe və çəy doə miyvə bəçəy hardə kəsi əzob iyən əziyyəti boyis bəbe.

Çın rəsəy bevəcə bu, məzə iyən təmisə əlovə, Kərimə-Ğıron əy hovlnokəti iyən ya çırkinətiyədə bə divi sə təşbih kardedə. ımi həm zikr kardey lozıme ki, millət çı ğədimə zəmononku çı divi sə vəhşətnok iyən dəhşətin vəsf kardedəbin. çoko ki, əvon firiştə və mələkon ıştə zehnədə reçin iyən dılbərə şikilədə təsəvvır kardedəbin. qıləy holədə ki, hiçkəsi firiştə iyən divışon vindəni.

Çın ayəonku umutedəmon:

1-axırəti nizom de dınyo sistem iyən soxtemoni farğ kardedə. liza, çı do iyən beməy çı cəhəndımi nığılə vırədə perəsey imkon, mevcude.

2-dınyoədə bə şəytoni əmron pemandə kəson, bə cəhəndımi giriftor bəbeyn ki, çı havz iyən reçinə mənzərəon vindey əvəzi, bə nifrəti boyis bə iyən bevəcə mnəzəron mışohidə bəkarde. jıqo bızın dəhşətin iyən tarsnokə şəytonon zəminiku xaric bəbeyn.

ثُمَّ إِنَّ لَهُمْ عَلَيْهَا لَشَوْباً مِّنْ حَمِيمٍ (67) 

Peşo, çəy(xorəki) sape de qılə iyən sutunə ovi umujən pebəşomeyn.

ثُمَّ إِنَّ مَرْجِعَهُمْ لَإِلَى الْجَحِيمِ (68) 

Çən, çəvon oqardemon bə cəhəndımi tərəfe.

Təbiiye ki, Zəğğomi miyvə do hardey, dumo ıştə təşnəti vardedə və ın ayəon hamyedə: əvon ki, Zəğğomi do hardedən, boştə təşnəti bərtərəf kardero, qılvıniyə bıə iyən vey tatə ov pebəşomeyn. əmmo, çəvon peşomə ın qılə ov çəvon təşnəti çı miyoniku bardey əvəzi, tiki həm bəvon təşnəti bədoe və çəvon ciqər bəsute.

Ayəon dəvomədə hamyedə: əvon bə duzəx iyən cəhəndımi mərhələ daxil bıey iyən  Zəğğomi do iyən bevəcə peşoməninə çiyonki, dəvardə ayəonədə ğeyd be, bənə  şoyvonəti məclisonədə bəçəvon vəy beşə və bəvon doey bıəbu, bəvədə bə duzəx iyən cəhəndımi daxil beıy bəpeştə əvoni çokonə ğəbul bəkardeyn iyən çəvon holon çokonə bəbe?

Çın ayəonku umutedəmon:

1-cəhəndımi əhli həm bənə vəhışti əhli hardənin iyən peşoməninə çiyonışon bəbe. əmmo, ımon nəinki, ləzzətin nin, bəlkəm yavə məzə və təmışon bəbe və bəçəvon əzob-əziyyəti həm boyis bəbe.

2-dınyoədə ıştə luz-ləvə de həromi pur kardə və Xıdo əmron dığğət nıkardə kəson, ğıyoməti ruji həm çəvon ləvə de bəçəvon əzob-əziyyəti boyis bıə çiyon pur bəbe.

3-ğıyoməti məvağif iyən mandə vırəon farğ kardedə. cəhəndımi əhl mıxtəlifə mərhəlonku dəvardey bəpeştə, cəhəndımədə bəştə əsliyə ğərolqo daxil bəbeyn.