825-ə hissə-Saffati surə-93-101 şərifə ayəon

825-ə hissə

فَرَاغَ عَلَيْهِمْ ضَرْباً بِالْيَمِينِ(93) 

Çən,(bə bıton səmt şe və) deştə rostə dasti bəvon qıləy ğoymə zərbəş one.

فَأَقْبَلُوا إِلَيْهِ يَزِفُّونَ (94) 

Millət de surəti bəçəy tərəf dim qəteşone(və etıroz kardeşone).

قَالَ أَتَعْبُدُونَ مَا تَنْحِتُونَ (95) 

(İbreymi)Voteşe: aya(şımə) deştə dasti toşə çiyon pərəstış kardedon?

وَاللَّهُ خَلَقَكُمْ وَمَا تَعْمَلُونَ (96) 

Qıləy holədə ki, Xıdovəndi şımə iyən şımə soxtə çiyonış ofəyə.

Dəvardə proqramədə votemone ki, həzrəte İberym(ə) qıləy fırsəti dumo be ta bıtpərəston çı ğəfləti haniku oğoko. əv səy kardedəbe bəvon dərosno ki, çı bıton dastiku hiççi omeydəni və çın beconə əşyaon çəvon taleyədə hiç qıləy təsirışon ni.liza, idi mevsumədə ki, millət çı şəhriku xaric bin, əv de noxəşəti bəhonə şəhrədə mande. əv, qıləy mınosibə fırsətədə qıləy təvəş bəştə dast qəteşe bə şəhri bıtxonə şe və bıtonış həmmə arışteşe ğərəz çəvon həmməysə dıjdə qılə.

Çoko ki, bıtpərəston oqardin, de qıləy əcib iyən bovə nıkardə mənzərə dimbədim omin. çəvon dıjd iyən qədə xıdoon darıştə iyən hırd kardə bıəbe və jiyədə lınqon mandəbin.

Çun, İbreym(ə) navko bə bıt iyən bıtpərəston ələyh sıxanonış votəşbe iyən de camaati bə ico çı şəhriku beşənıbe, əvon yəğınışon pəydu karde ki, bıton arıştey çəy koye. liza, de ğəzəb iyən əsəbi bəçəy səmt şin və dəmandin bəy sə-sıxan kardey.

Əmmo, İbreym(ə)çı bıtpərəston xışm iyən ğəzəbiku izərrə nıtarsə holədə de ruşin iyən rasionalə dəlilon bəçəvon iddio iyən sıxnanon cəvobonıış doe. əy voteşe: şımə deştə ıştən dasti toşə iyən soxtə çiyon pərəstış kardedon? əgər qıləy soxtə bıə çi məbud bıey zıneydəbu, çən çəy soxtə kəs həm bo məbud bıey vey ləyoğətış heste. liza, çın bıton pərəstışi əvəzi, boənən aləmon pərvərdlıqor bıə vahidə Xıdo pərəstışkəmon və ın bıton həm çəy məxloğin. çoko ki,şımə çəy ofəyə məxloğiyon.

Çın ayəonku omutedəmon:

1-inhirofə amilon çı miyoniku bardey xoto, bəbe qıləy dəğiğə bərnomə noey və qıləy mınosibə fırsətədə zərbə varid kardey bıbu.

2-pəyğombəron de şırki mıborizə bardey iyən çı inhirofə amilon rəğirişə bırniye koyədə, çı təzəkkur, çəşnavi iyən aqahəti doeysə əlovə, məsləhət zınə vaxti əməli surətədə həm hərkət kardedəbin(çoko ki, İbreym(ə)-i kardeşe).

3-de insoni dasti soxtə bıə çiyon,ısət çı soyə bıbu ya mıosir, həyğətədə çı Xıdo ofəyə çiyonin. zira, çı bəşəri qırd iktişof iyən  ixtiroon mənşə, Xıdovəndi bəy nemət baxş kardə ağl iyən istedode.

قَالُوا ابْنُوا لَهُ بُنْيَاناً فَأَلْقُوهُ فِي الْجَحِيمِ (97) 

Voteşone: boəy qıləy bılındə bina bısoxtənən və əy bə de otəşi(pur bıə) cəhəndımi şodənən.

فَأَرَادُوا بِهِ كَيْداً فَجَعَلْنَاهُمُ الْأَسْفَلِينَ (98) 

Çən, piyeşone bo(İbreymi məhfiro) qıləy hiyləkon. əmmo, əmə əvonımon səfil iyən məğlub kardemone.

Mışrikon bə həzrəte İbreym(ə)-i məntıği iyən de dəlili bıə sıxanon dığğət kardey iyən əy ğəbul kardey əvəzi, bə ın fik dəşin ki, əy çı miyoniku bobən ta bo cokəson həm ibrəti dərs bıbu. liza, qıləy bılındə kurəşon soxte və çəy dıləşon de ezım iyən çu pur kardeşone ki, oxoyədə qıləy dıjdə otəş bə əməl ome.

Bın zəmon İbreym(ə)-şon bə həmonə otəşi dılə ğandeşone ta bəçəvon qımoni əsos, çəy ko idəfənin bə oxo bırsonon. əmmo, de Xıdovəndi tələbi otəş bo İbreymi(ə) vılıston be və əy sutune əvəzi boəy sard be və əvış səlomət oqəte. İbreym(ə) çı mışrikon təəccıbi miyono səlomətə holədə çı otəşi şuləon miyono bə bi beşe və de ın tərtibi çı deşmınon hiylə və məkrinə planış bə hədərış doe.

Çın ayəonku omutedəmon:

1-kufr iyən şırki bınəş ni və qıləy dırstə məntığ iyən istidloli soyb həm nin. bə həmonə dəlili xoto, mışrikon de tohidi mıborizə bardey xoto, hejo zu vositəonku okoşon doə.

2-ilahi merdon ıştə məmuriyyəti bə vırə rosney iyən kufr və zılmi rınə bırniye koyədə, harcurnə təhlukə hıryedəbin və otəşədə suteyku həm hiç qıləy tatrsışon nıbe.

3-Xıdovəndi irodə bə təbyəti ğanunon hakime. liza, əv havxti irodəko, təbiiyi təzahuron iyən amilon təsir əvəz bəbe. çoko ki, İbreym(ə)-i macərədə çı Xıdovəndi otəşiku sutuney ğabiliyyətış se.

وَقَالَ إِنِّي ذَاهِبٌ إِلَى رَبِّي سَيَهْدِينِ (99) 

Və (İbreymi)voteşe: az bəştə pərvərdıqori tərəf şedəm. əv, rəyrə mıni səbəro bəkarde.

رَبِّ هَبْ لِي مِنَ الصَّالِحِينَ (100) 

(Bəmı ro nışon bədoe)Xıdolim ha! bəmı salehonku qıləy(fərzənd) baxşkə.

فَبَشَّرْنَاهُ بِغُلَامٍ حَلِيمٍ (101) 

Çən, əmə bəy qıləy həlim xosyətinə qıləy nevcıvoni mıjdəvoni domone.

Həzrəte İbreym(ə) çı deşmınon boəy tədaruk vində hiyləonku ıştə coni peroxney iyən solim mandey bəpeştə, ıştə risolətış Babili srəzəminədə bə oxo rəseyış vinde. əve, bə ğərol ome bə Şami səmt hicrətko. zira, tarıxi dırozi ın məntəğə çı Xıdo pokə peyğombər iyən ovliyaon sərzəmin bıəbe. İbreym(ə) Xıdoku tələbış karde ki, əy bə vırə boştə vəzifəon bə vırə rosney xoto səbəroko.

Həmçinin, əv Xıdoku piyeşe ki, çok iyən pokə fərzəndon bəy ətoko ta əvon çəy risolət iyən roy dəvom bıdon. qıləy fərzənd ki, har cəhəto saleh iyən ləyoğətin bıbu.

Xıdovənde-Xalığ həm çəy dıvoş ğəbul karde və bənə İsmoyl(ə) iyən İshoğ(ə) bıə fərzəndonış əto karde ki, har dıqləyni çı pok iyən salehə insononku bin və bə nıbuvvəti barzə məğami dastışon pəydu karde.

Çın ayəonku omutedyəmon:

1-ilahi merdon bə Xıdo roy tərəf hərəkət kardedən və çəvon har qıləy koyədə bıə məğsəd həm Xıdo rizoyəte. əvon Xıdoku tələb kardedən ki, əvoni bın roy dırozi hidoyətko və əvon de bə Xıdo təvəkkul kardey rostə roy pəydukon.

2-ehanə əmə Xıdo royədə ğədəm şodəmon, bəbe bəçəy lutf, hidoyət və ro oj kardey həm xatırcəmətimon bıbu.

3-bo salehə fərzəndi soyb bıeyro dıvo kardey, peyğombəron dıvoonku bıə. ım ıştən çı nəsli pok, ləyoğətin iyən dırıstko bıey nışon doydə və bə camiyə pokəti və səlomətəti ziyodə təsir noydə.