829-ə hissə-Saffati surə-123-132 şərifə ayəon

829-ə hissə

وَإِنَّ إِلْيَاسَ لَمِنْ الْمُرْسَلِينَ (123) 

Və bərosti İlyos çəmə vığandəyonku be.

إِذْ قَالَ لِقَوْمِهِ أَلَا تَتَّقُونَ (124) 

Bə zəmon ki, bəştə ğovmi voteşe: aya(Xıdoku) tarseydəniyon?

أَتَدْعُونَ بَعْلاً وَتَذَرُونَ أَحْسَنَ الْخَالِقِينَ (125) 

Aya Bə`li bıti vanq jeydon?(pərəstış kardedon?) və həmməysə çokə xalıği vadoydon?

اللَّهَ رَبَّكُمْ وَرَبَّ آبَائِكُمُ الْأَوَّلِينَ (126)

Qıləy Xıdo ki, şımə iyən şımə sıftənə pıon pərvərdıqore.

Həzrəte İbreym(ə) iyən həzrəte Mosə(ə)-i sərquzəşton bəpeştə, ın ayəon bə həzrəte İlyos(ə)-i macəra işorə kardedə və hamyedə: çə həzrəti deştə ğovmi sıftənə sıxan çəvon çı bıtpərəstəti iyən şırk və çı harcurnə fəsodiku dast kəşey tələb be. qıləy ko ki, betəğvoninə insonon bəy dıço bıəbin və bəçəy təsiri xoto, əvon bə harcurnə yavə və noxələfə koon dast ğandeydən.

Ə həzrət bə bıtpərəston vijdoni xitob kardə holədə hamyeşe: çokonə şımə deştə dasti toşə bıti pərəstış iyən sıtoyiş kardedon,əmmo şıməni ofəyə ıştə Xalığon çı viro bekardə? Aya şımə pərəstış kardə bıton qıləy çi xəlğ kardey zıneydən ki, şımə jıqo çəvon vədə tə`zim kardedon iyən əvoni bə sıtoyiş iyən pərəstışi loyığ vindedon? Aya şımə iyəm şımə dədə-bobon de həmonə bıton vositə ofəyə bıon? Çıro şımə qırd aləmon pərvərdlqor bıə Xıdoon vadoə, bə becon iyən befoydə bıton soyəx şeydon? 

Şək ni ki, bıtpərəston ıştə bıton pərəstışi koyədə, fəğət bəştə dədə-boon sirə və adəton istinod kardedəbin, əmmo həzrəte İlyos(ə)-i çəvon cəvobədə hamyeşe: şımə iyən şımə əbo-əcdod Xıdo ofəyəşe, nəinki, ın bıton!

Çın ayəonku omuteydəmon:

1-qırd ilahi pəyğombəron bəşərışon bə Xıdopərəstəti iyən ğərəz əv co hiççi pərəstış nıkardey tərəf dəvətışon kardə.

2-Fəğət həmməysə çokə xalığ yəni hetsmoni aləmi ofəyə vahidə Xıdo, bo pərəstışi loyığe.

3-pəyğombəron dəvəti iyən qırd kəmoləton rəğ-rişə, təğva iyən pərhizkorətiye.

4-pəyğombəron de milləti rəftorədə cəhdışon kardə ki, de sodə, mığoyisəvi iyən famə bıə sıvolon plani kəşe, əvoni çı ğəfləti haniku oğo kardedəbin. çoko ki, becon iyən befoydə bıton de hestemoni aləmi ofəyə əzınə Xıdo mığoyisə kardey, çəvon vijdonon oğo kardedəbe.

فَكَذَّبُوهُ فَإِنَّهُمْ لَمُحْضَرُونَ (127) 

Çən, əvışon təkzib karde və beşəkk əvon(bə cəhəndım) vardey bəbeyn.

إِلَّا عِبَادَ اللَّهِ الْمُخْلَصِينَ (128) 

Ğərəz Xıdo xolisə bandəon.

وَتَرَكْنَا عَلَيْهِ فِي الْآخِرِينَ (129) 

Və boəy vəoməyon miyono(çokə xotırə) nomone.

Bənə co dəvardə etnoson veyni, həzrəte İlyos(ə)-i ğovmi əksəriyyət həm çə həzrəti risolətışon bə həşə je və hozzı bedənıbin bə ə həzrəti bıtpərəstəti tərk kardey barədə bıə pand iyən nəsyəton quş bıdon iyən əy ğəbulkon. Kərimə-Ğıron hamyedə: çı jıqo təkzibi ağıbət, bə çandə nev qınon iyən yavə koon aludə bıey iyən adət kardey və ilahi dardnokə əzobi ğəbul kardeye. oxoyədə fəğət qıləy kamə dastə ki, bə həzrəte İlyos(ə)-i imonışon vardəbe iyən Xıdo xolisonə şikilədə pərəstış kardedəbin, perəxin iyən nicotışon pəydu karde.

Ayəon dəvomədə hamyedə: Xıdovənde-Aləm bə bəştə peyğombəron kəşə zəhməton ğeymət noydə və əvoni de çokə xotırə iyən nomi ğeyd kardedə ta çə dıjdə merdon ideoloqiyə iyən şıə ro torıxi dırozi bəyji iyən əbədi bımando.

Çın ayəonku omuteydəmon:

1-çı fərdon baxtəvərəti meyor, dınyo jimon ni, bəlkəm çəvon koy oxo, çəvon hərəbaxt ya bədbəxt bıey iyən çəvon çı vəhışti ya cəhəndımi əhl  bıey ğıyoməti ruji mıəyyən bəbe.

2-Xıdo xolisonə formədə pərəstış kardey iyən əmələdə bə ixlosi rioyət kardey, çı perəxey iyən hərəbaxtəti roye və insoni ilahi əzobiku nicot doydə. Xıdo royədə noxolisəti insoni bə məğsədi rəsey koyku oqəteydə.

سَلَامٌ عَلَى إِلْ يَاسِينَ (130) 

Səlom bıbu bə İlyosi.

إِنَّا كَذَلِكَ نَجْزِي الْمُحْسِنِينَ (131) 

Əmə bə çokə ko soybon jıqo mıkofot doydəmon.

إِنَّهُ مِنْ عِبَادِنَا الْمُؤْمِنِينَ (132) 

Həyğətən, əv çəmə muminə bandəonku be.

Çın surə vəynə ğısmətonədə bə kali navkonə pəyğombəron sərquzəşton işorə kardemone. çəvon har qıləyni dastoni oxoyədə, Xıdovənd zumand iyən xolisə imoni soyb bıə dıjdə insonon bə yod dənoydə və çəvon çokə koon bə təğdıri loyığ vindedə və hamyedə: ım çəmə sınnət və adəte ki, çı çokə ko soybon kardə koon əvəzi beşeydəmon və bəvon əmə əcr iyən mıkofot doydəmon.

Bə həzrəte İlyos(ə)-i ayid bıə ayəon oxoyədə həm Kərimə-Ğıron bə həmonə mevzu işorə kardedə və hamyedə: Xıdo royədə ğədəm şodə iyən bə milləti xey rosnə və çokə ko soy bıə çı qırd insonon səy və zəhməton çı yodo nibebəşe.

Im çı Xıdovəndi sınnət iyən adəte ki, bə çokə ko soybon çokə şikilədə mıkofot doydə və çəvon çokə ko əvəzi beşeydə. ısət çı peyğombər bıbu ya addiyə insonon. həlbəttə, de ın şərti ki, əvon Xıdo royədə ğədəm şodon və imoni əhl bıbon. ehanə jıqo nıbu, Xıdo inkor kardə iyən çə mığobilədə təzim nıkardə və bəçəy əmron təslim nıbə kəs, xeyə ko bı vırə bırosno, bo dınyo milləti bə vırəş rosnə və çəy mıkofot çı təşəkkuri ğolibədə əy hejo bın dınyoədə ğəbul bəkarde.

Çın ayəonku omuteydəmon:

1-Xıdovəndiku bəçəy pəyğombəron iyən bə ilahi ovliyaon səlom vığandey omutəmon.

2-Xıdovəndi bə ehson iyən imoni əhli kardə lutf iyıən inoyət, ilahi dayima cərəyon kardə sınnət iyən adətonkuye.

3-hakəs bo Xıdo bandəçəti bıko və imon iyən ehsoni əhl bıbu, tarıxi dırozi ilahi səlomi ğəbul bəkarde.