834-ə hissə-Saffati surə-174-182 şərifə ayəon

834-ə hissə

فَتَوَلَّ عَنْهُمْ حَتَّى حِينٍ (174) 

Çən, de tobə qıləy(mıəyyənə) mıddəti(kofironku) dim bıqordon.

وَأَبْصِرْهُمْ فَسَوْفَ يُبْصِرُونَ (175) 

Və bəvon erəx ki, rəyrə(ıştə əməlon cəzo) bəvindeyn.

أَفَبِعَذَابِنَا يَسْتَعْجِلُونَ (176) 

Çən, aya əvon boçəmə əzobi(ro) dastpoçən(əcələ kardedən)?

فَإِذَا نَزَلَ بِسَاحَتِهِمْ فَسَاء صَبَاحُ الْمُنذَرِينَ (177) 

Havaxti(çəmə əzob) bəvon rəseyədə(çəvon sape dəqəteyədə) bəvon tars doə boə kəson çı bədə sıbhışon bəbe!

Vəynə proqramədə bə həxı bə botıli iyən pəyğombəron tərəfdoron bəsə kofir iyən munkironsə bıə səbarzəti işorə be. ın ayəon çə bəhsi dəvomədə bə pəyğombər(s)-i hamyedə: qıləy kırtə mıddətədə çı kofir iyən mışrikonku dim bıqordon və əvoni bəçəvon ıştən holi və bıdə tain ki, əvon ya mutəzəkkir bıbon, pand bıqəton və bə islomi tərəf oqardon və ya Xıdovənd ıştən bəçəvon hisobi bərəse və ıştə əzobi bəvon nozil bəkarde.

Peşo hamyedə: əvon rəyrə ıştə koon nəticə bəvindeyn və imoni əhl həm çəvon məğlubiyyət iyən zılləti mışohidə bəkardeyn. həlbəttə, kofiron hejo de məsxərə iyən bovə nıkardə holədə votedəbin: bəşmə və`də doə bıə əzob kon zəmonədə bome bərəse bə? jıqo bızın əvon çı əzobi enovney koyədə tadibəsən və əcələ kardedən. qıləy holədə ki, əzob nozil beyədə, şımə həyğəton dərk bəkardeyon. əmmo, həni bəvədə çı foydə?

Çın ayəonku omuteydəmon:

1-de etıroz iyən təhdidi şivə mıxolifonku dim qordıney, çı pəyğombəron metodonku qıləyni bıə. inodkorə fərdon isloh iyən tərbiyə royədə, qahi vaxti qıləy kırtə mıddətədə əvoni bəçəvon ıştən holi vabıdəmon ta ğasbu əvon tənbih bıbon və bə həxə roy səmt oqardon.

2-muvəğğətən mıxolifonku rık kardey iyən çəvonku dim qordıney, bəpe bə məntıği əsos bıbu,(dayimi iyən de intiğom sıey məğsədi nıbu) ta bo inodkor iyən ıştıə roy qim kardə fərdon isloh iyən oqardero roy dəbastə nıbu.

3-dınyoədə dini inkor iyən deəy deşmınəti kardə kəson çı məğlubiyyəti telə tə`mi bəçaşteyn ta bə cokəson ibrəti boyis bıbon. muminon həm çəvon ağıbəti mışohidə bəkardeyn.

وَتَوَلَّ عَنْهُمْ حَتَّى حِينٍ (178) 

Və de tosə qıləy mıddəti(çəvonku) dim bıqordın.

وَأَبْصِرْ فَسَوْفَ يُبْصِرُونَ (179) 

Və odyəs ki, rəyrə(ıştə əməlon cəzo) bəvindeyn.

سُبْحَانَ رَبِّكَ رَبِّ الْعِزَّةِ عَمَّا يَصِفُونَ (180) 

Iştı rəbb, izzəti soyb pərvərdıqor(çəvon) vəsf kardə çiyonku pok iyən mınəzzəhe.

وَسَلَامٌ عَلَى الْمُرْسَلِينَ (181) 

Və səlom bıbu bə vığandə bıəyon

وَالْحَمْدُ لِلَّهِ رَبِّ الْعَالَمِينَ (182)

Və həmd iyən sıtoyiş bə aləmon pərvərdıqor bıə Xıdovəndi məxsuse.

Bə navnə mətləbi təkidədə ijən Xıdovənde-Aləm bə pəyğombər(s) iyən muminon xitob kardə holədə hamyedə: həxı mığobilədə inodkorəti kardə iyən bo həxə sıxanon məsey hozzı nıbəkəsonku i mıddət dim bıqordınən və əvoni bəçəvon ıştən holi vabıdənən və mıntəzir bımandənən ki, Xıdovənd oxoyədə əvoni bəçəvon ıştən kardə əməlon cəzo bərosne.

Saffati mıborəkə surə oxonə ayəon hamyedə: izzət iyən ğudrət fəğət bəştı pərvərdıqor bıə Xıdo məxsusue və oxoyədə imoni əhl səbarz bəbe və kofiron iyən mışrikon zılləti telə tə`mi bəçaşteyn.

Ehanə imoni əhl bə Xıdo təvəkkulkon və fəğət bəy təkyəkon, xotırcəm bıbənən ki, Xıdovənd əvoni bəsə kofironsə səbarz bəkarde və kofiron məğlub. qıləy Xıdo ki, çı harcurnə zəyfəti iyən ocizətiku mınəzzəh, pok və bə diyəroe və əv harçi irodəko əy bə vırə rosnero zu və lozım bıə ğudrətış heste.

Bə torıxi şoydəti əsos, Xidovənde-Mutəal hejo bəştə vığandə pəyğombəron koməkış kardə, çəvon himoyədor bıə və əvonış ıştə sulh iyən əmonədə nığoş do,oqətəşe. liza, bəpe izzət iyən əzəməti soyb bıə iyən çı aləmon koon tədbiri vində Xıdo, hejo bə həmd iyən sıtoyişi loyığ vindey bıbu.

Çın ayəonku omutedəmon:

1-Xıdovəndi çı kofir iyən dini deşmınon həxədə bıə və`dəon, hətmi iyən ğətiye və bın koyədə şəkk kardey lozım ni.

2-sabitə izzət və ğudrət fəğət bə Xıdo məxsuse və Xıdo bandə bıə kəson həm izzətin və sabitğədəm bəbeyn.

3-fəğət aləmon pərvərdıqor bıə Xıdo bə sıtoyişi məxsuse. zira, əv çı qırd hestemoni aləmi mailk iyən tədbiri vindedə və çı həmmə kəmolaton və reçinətiyon sərçeşməy.