835-ə hissə-Sadi surə-1-4 şərifə ayəon

835-ə hissə

بسم الله الرحمن الرحيم

ص وَالْقُرْآنِ ذِي الذِّكْرِ (1) 

Sad, bə de pandi(nəsyəti) pur bıə Ğıroni ğəssəm.

بَلِ الَّذِينَ كَفَرُوا فِي عِزَّةٍ وَشِقَاقٍ (2) 

Bəle, kofiron şiddətinə hışkəqiyətidən(de pəyğombəri mıxolifət kardedən).

In surə həm bənə Kərimə-Ğıroni co 28 qılə surəon, de muğəttəə hərfon bino bedə. vəynə bərnoməonədə yəni Bəğərə mıborəkə surə iminə ayə izohədə votemone ki, adətən çın hərfon bədiqə, çı Ğıroni əzəməti həxədə sıxan bə miyon ome. zira, Kərimə-Ğıron qırd insonon ixtiyorədə bıə həmonə əlifabay ki, təlifış pəydu kardə. demiyən,əv qıləy mecuzəy ki, hiç qıləy bəşər kardeyış zınəni iyən kardey nibəzıne bənə əy qıləy kitob biyoy.

In surə həm Sadi hərfi bəpeştə, çı Kərimə-Ğıroni vəsfi barədə hamyedə: ”ın kitob, de zikr iyən pandi pure”. ımi həm zikr kardey lozıme ki, inson ziyodə həyğəton ıştə Xıdo doə pokə fitrətiku zıneydə, əmmo ğəflət və həvaye-nəfs iyən botıni ğərizəon ya daxili amilon boyis bedə ki, inson əvoni çı yodo beko. əmmo, Kərimə-Ğıroni tilovət kardey iyən bəçəy məzmuni dığğət kardey boyis bedə ki, inson çı ğəfləti haniku oğo bıbu və pand bıqəto. həmçinin, mumkine qıləy inson bənə ğıyoməti bərpo bıey bıəbə dini təlimon əsos ğəbul kardə həyğəton,çı viro beko iyən bə ğəfləti dıço bıbu. liza, Kərimə-Ğıroni ayəon ziyodə baxş, insoni mardey bəpeştə dəvordınə çi, mıxtəlifə mınosibətonədə bəçəy yod dənoydə.

Çın ayəonku omutedəmon:

1-Xıdovəndi bə Kərimə-Ğıroni ğəssəm hardey, çın kitobi əzəmətin iyən çəy vardə kəsi həxədə bıey nışonəy.

2-Kərimə-Ğıron insoni hıtə vijdoni oğo iyən çəy çı viro beşə zınə çiyon bəçəy yod vardedə.

3-Kərimə-Ğıron bə milləti pand doey iyən hidoyəti xoto omə. əmmo, i dastə insonon bəştə təkəbbır, inodkorəti iyən yoləşəxəti xoto, bo həxı ğəbul kardey hozzı nin.

كَمْ أَهْلَكْنَا مِن قَبْلِهِم مِّن قَرْنٍ فَنَادَوْا وَلَاتَ حِينَ مَنَاصٍ (3) 

Çəvon bənav veyə ğovmon(bəçəvon kufri xoto) məhf kardemone. çən,(bo imdodiro) fəryod jeşone. lakin həni fərol kardey(vitey) zəmon nıbe.

وَعَجِبُوا أَن جَاءهُم مُّنذِرٌ مِّنْهُمْ وَقَالَ الْكَافِرُونَ هَذَا سَاحِرٌ كَذَّابٌ (4)

Və təəccıb kardeşone ki, çəvon ıştəniku qıləy tarsədə bəçəvon soyəx omə və kofiron voteşone:”ım qıləy duyəvojə sehrboze”.

Kərimə-Ğıroni sıftənə xitob kardə ayəon, Məkkə mışrikon bin. ın ayəonbəvon çəşnavi doydə ki, ehanə şımə bə dəvardə co ğovmon ağıbəti de dığğəti nəzəkon, bəvindiyon ki, çəvonku har qıləyni bə kufr iyən şırki dıço bıəbin, de ilahi ğəhro-ğəzəbi dimbədim omin və əvon həni hiç qıləy nicot iyən perəxey roşon pəydu nıkarde.

Ayəon dəvomədə hamyedə: əmmo, çoko ki, pəyğombər(s) bo mışrikon Kərimə-Ğıroni ayəon tilovət kardeyədə iyən çəşnavi doə zəmonədə, əvon çı navkonə ğovmon taleku pand iyən ibrəti dərsi qətey və Ğıroni ayəon həxədə fik kardey iyən hidoyəti roy pəydu kardey əvəzi,bəy coduqər iyən duyəvoj votedən.

Rəvoyətə kitobonədə omə ki, Ğureyşi yolon çı pəyğombər(s)-i amu Əbu-Tolıbi(ə) palu omin və voteşone: ıştı boə zo çəmə cıvonon çı royku bekardedə və çəmə xıdoon bə sıvoli ji bardedə. ehanə əy şohrət ya sərvətış piyedəbu, əmə hozzımon əy çı Ğureyşi həmməysə sərvətin iyən ərbobə şəxs bıkəmon. əmmo, de ın şərti ki, əv ıştə çın sıxanonku dast bıkəşo.

Çoko ki, Əbu-Tolıb(ə) çı mışrikon ın sıxanon bə pəyğombər(s)-i rosniyədə, ə həzrəti hamyeşe: ehanə əvon həşi bəçımı rostə dasti və ovşımi bəçımı çəpə dasti bınon ta mı ıştə sıxanonku dast bıkəşom, hiçvaxti ın koy nibəkardem. mı ya ıştə sıxanon bə camiyə nufuzbədom və ya çəy royədə kıştey bəbem. Əbu-Tolıb(ə) çı pəyğombər(s)-i ıştə royədə istiğamət iyən sabitğədəməti mışohidə kardeyədə, ərzış karde ki, ıştə royədə ğoym bımand və mı həm hejo bətı komək bəkardem.

Çın ayəonku omutedəmon:

1-ehanə kufr iyən şırk bə inodkorəti xoto bıbu, dınyoədə həm bə insoni həlokəti boyis bəbe.

2-ilahi ğudrət iyən irodə mığobilədə hiç qıləy pənohqo mevcud ni. tobə iyən inobə ilahi əzobi nozil bıey bənav bə dardi dəvo bəkarde. əmmo, çəy bədiqə həni hiç qıləy foydə və təsirış nibəbe.

3-pəyğombəron bəpe çı milləti ıştən cinsiku bıbon ta bəçəvon de insonon miyono mıştərək bıə ehtiyoc iyən xısusiyyəton dığğət kardə holədə, kardey bızınon əvon bo insonon qıləy mınosibə ulqu və nımunə bıbon.