841-ə hissə-Sadi surə-34-38 şərifə ayəon

841-ə hissə

‏ وَلَقَدْ فَتَنَّا سُلَيْمَانَ وَأَلْقَيْنَا عَلَى كُرْسِيِّهِ جَسَداً ثُمَّ أَنَابَ (34) 

Və bərosti əmə Suleymonımon imtovon karde və çəy taxti sape qıləy(beconə) 

cəsəd şodomone. çən, bə Xıdo dərqo inobə və tobəş karde.

قَالَ رَبِّ اغْفِرْ لِي وَهَبْ لِي مُلْكاً لَّا يَنبَغِي لِأَحَدٍ مِّنْ بَعْدِي إِنَّكَ أَنتَ الْوَهَّابُ (35) 

Və voteşe: Xıdolim ha! mıni bıbaxş və bəmı qıləy hukumət ətokə ki, çımı bəpeştə bə hiçkəsi loyığ nıbu. həyğətən, tı vey səxayn(dastojiş).

Vəynə bərnomə dəvomədə ki, çı Xıdovəndi bə Suleymon(ə)-i lutfon həxədə be, ın ayəon bə Suleymon(ə)-i saxtə imtovonon qıləyni işorə kardedə. həlbəttə, çun ın imtovoni macəra ıştən Kərimə-Ğıronədə oməni, əmmo, bın barədə bıə rəvoyəton bəyon kardedəmon.

Həzrəte Suleymon(ə) oruzu kardedəbe ki, Xıdovənd bəy ziyodə fərzəndon nəsibko ta çəvon miyono həmməysə şucoətin iyən zumandə qıləyni boştə canışin bıvıjno və çəy bəpeştə çəy hukuməti idomə bıdo. əmmo, çun bın tələbədə çı Xıdoku ğafil mande və bə Xıdo təəvəkkul kardey iyən çəyku tələb kardey əvəzi, bəştə tələb iyən irodə təkyəş karde. əve, Xıdovəndi bəy saxtış qəte və çəy jimoni həmroon hiç qıləyni çı fərzəndi soyb nıbin. ğərəz qıləy noğisul-xılğə yəni cismi cəhəto noğis bıə qıləy fərzəndi ki, əv həm bənə qıləy beconə cəsədi çəy  mığobilədə şodoşone.

De ın səhnə vindey Suleymon(ə) sərəse ki, çun çı Xıdoku ğafil mandə və bə fərzəndi dılış dəbastə, Xıdovəndi həm əvış bə jıqo imtovoni giriftorış kardə. liza, ıştə ğəflətiku tobəş karde və bə Xıdo tərəf oqarde.

Kali rəvoyətonədə həm omə ki, Suleymon(ə) ıştən ğoym noxəş be və bənə qıləy beconə cəsədi taxtı sape olxarte. ayə dəvomədə hamyedə: həzrəte Suleymon(ə) Xıdovəndiku məğfırət iyən baxşeşi tələb kardey bəpeştə, piyeşe ki, çəy hukumətədə xariğul-addə koon bə əməl boy ta ımon bənə co pəyğombəron mecuzəon bəçəy çı Xıdo tərəfiku bıey iyən peyğombərəti qıləy dəlil bıbu. qıləy ko ki, çəy mislədə koon co hukumətonədə bıəni və bın cəhəto çəy hukumdorəti de co hukumdorətiyon miyono qıləy farğış bıbu.

Çın ayəonku omutedəmon:

1-imtovon ilahi sınnət və adətonkuye ki, bə ilahi dərqoy ğorb və nezəti iyən bə rufi təmizəti boyis bedə. liza, insonon və hətto ilahi peyğombər iyən ovliyaon həm imtovon bedən və hiçkəs çın koyku mustəsna ni.

2-bəzi ənbiya və peyğombəron çəvon peyğombərəti məsuliyyət iyən insonon hidoyəti ko bəştə ehdə peqəteysə əlovə, bə milləti hukumət iyən hukmdoroəti kardey koyışon həm bıə və çın dıqləde iyande hiç qıləy ziddiyyətışon ni.

3-dıvo və sənoədə bə kamə çiyon ğane məbəmon. bəlkəm, bəpe bənə həzrəte Suleymon(ə)-i çəmə himmət barz bıbu və Xıdovəndiku muhimmə çiyon tələbkəmon.

فَسَخَّرْنَا لَهُ الرِّيحَ تَجْرِي بِأَمْرِهِ رُخَاء حَيْثُ أَصَابَ (36) 

Çən, əmə vavazımon boəy təsxir kardemone ki, deçəy əmri bə kom vırə dılış hestebe, de naməti iyən oroməti hərəkətko.

وَالشَّيَاطِينَ كُلَّ بَنَّاء وَغَوَّاصٍ (37)

Və bənnan iyən ğəvvosə hizoperomə cınon(boəy təsxir kardemone).

وَآخَرِينَ مُقَرَّنِينَ فِي الْأَصْفَادِ (38) 

Və cınon coqləyni dastə ki, de zənciri bəyənde dəvastə bıəbin(çəy əmri jiyədə ğərol domone).

In ayəon nışon doydən ki, həzrəte Suleymon(ə)-i tələb kardə dıvo icobət iyən ğəbul be və Xıdovəndi məxsusə ğudrət iyən imkonatış çə həzrəti ixtiyorədə ğərolış doe ki, çəy bənav iyən çəy bəpeştə çı hiç qıləy hukuməti ixtiyorədə bıəni. qıləy xariğul-addə iyən mecuzəvi koon ki, çəy hukuməti ilahi iyən istisnayi bıey nışon doydəbe.

Vo iyən vavazon bənə qıləy mərkəb iyən nıştəco təsxir kardey, Xıdovəndi bə həzrəte Suleymon(ə)-i əto kardə iminə nemət be. vo, Suleymon(ə)-i taxti rost kardedəbe və bəçəy dıli piyə har vırə bardedəbe və ə həzrəti bə həmonə vırə rosneydəbe. bənə ımrujnə rujon osmonədə pərə və hərəkət kardə qıləy təyyorə və ıştənəpəri ki, vey dırozə məsofəon qıləy kırtə zəmonədə ğət kardedə, dəvardedə.

Xıdovəndi bə həzrəte Suleymon(ə)-i baxş kardə dıminə nemət, cınon bo ə həzrəti xıdmətədə mandey xoto əvoni təsxir və ram kardey be. bə ın ayəon əsos, cınə şəytonon çı həzrəte Seulymon(ə)-i təsxir və əmri jiyədə bin.cınonku idastə bənə pard iyən səddon tumo kardey bıə ovdonəti koonədə ko kardedəbin və çəvonku iqlə qrup həm dıyoədə de xıdməti məşğul bin.

Cınonku idastə həm bə həzrəte Suleymon(ə)-i əmri nıpemandin və bəçəvon ın tuğyongərəti xoto, əvon bə zənciri dəvastey bıəbin və bənə co məhbuson bəçəvon daston zəncir jıə bıə holədə zindonədə oqətey bedəbin.

De ın tərtibi Xıdovəndi bəştə lutf iyən ecozi əsos, qırd təbiiyi, insoni iyən cınə ğıvvonış, çı həzrəte Suleymon(ə)-i sultə jiyədə ğərolış doəbe və əvon həmmə bə həzrəti əmri pemandəbin.

Çın ayəonku omutedəmon:

1-cıni qıləy məxsusə ağl və şuurış heste. liza, ıştə kali koon bə vırə rosneyədə çəvonku oko doey və bəhrə bardey bəbe.

2-məmləkəton idorə ya muhimmə planon icro kardey koyədə ixtisosin iyən zumandə kadronku istifodə kardey vey zəruriyə məsələy.

3-bə fərd iyən cəmyəti zərəl rosnə və iştimayi asayi bəyənde jıə kəson, bəpe həbs kardey iyən nəzorəti jiyədə bıbon. qıləy ko ki, həzrəte Suleymon(ə) de bə əmri nıpemandə cınon kardeşe.