849-ə hissə-Sadi surə-84-88 şərifə ayəon

849-ə hissə

‏ قَالَ فَالْحَقُّ وَالْحَقَّ أَقُولُ (84) 

(Xıdovəndi)Hamyeşe: bə həxı ğəssəm və həxədə votedəm.

لَأَمْلَأَنَّ جَهَنَّمَ مِنكَ وَمِمَّن تَبِعَكَ مِنْهُمْ أَجْمَعِينَ (85) 

Ki, cəhəndımi detı iyən de qırd bətı pemandə kəson pur bəkardem.

Navnə proqramədə votemone ki, iblis İlahi dərqoyku tojniye bəpeştə, elonış karde çanədə ki, bəyjiye, əv insonon bə zəloləti səmt bəbarde ta çəvonku ıştə intiğomi bıstəno.

Bın ayəonədə Xıdovənde-Aləm çı iblisi cəvobədə hamyedə: həx ıme ki, fəğət əkəson ki, bətı pemandən və bəştı vəsvəson tabe bedən, ıştə roy qim bəkardeyn və bə zəlolət ebəqıniyen. əvon ğıyoməti ruji bə cəhəndım varid bəbeyn. əmmo, bəştə ağl iyən ilahi pokə fıtrəti təkyə kardə kəson, bəştı vəsvəson giriftor nibəbeyn və əvon bətı pemandey əvəzi, bə ilahi peyğombəron iyən bə həxə təlimon itoət kardedən. əvon  ğıyoməti ruji həm detı bə ico nibəbeyn və əvon çı cəhəndımi otəşiku pebərəxeyn.

Çın ayəonku omutedəmon:

1-Xıdovənde-Aləm həm ıştən həxe və həmən sıxanış həxe və umumən har çi ıştə həxəti Xıdoku peqəteydə.

2-ğıyoməti ruji har qıləy dastə deştə ideoloji rəhbəron məhşur bəbeyn. çokon de çokə dastə və bədə insonon de yavə insonon.

قُلْ مَا أَسْأَلُكُمْ عَلَيْهِ مِنْ أَجْرٍ وَمَا أَنَا مِنَ الْمُتَكَلِّفِينَ (86) 

(Ha pəyğombər ha!)Vuji: mı bo ın(risolət və dini rosney xoto) şıməku hiç qıləy mıkofat tələb kardedənim və ıştəku qıləy çi pesoxtə(və əy bə Xıdo nisbət doə) kəsonku nim.

إِنْ هُوَ إِلَّا ذِكْرٌ لِّلْعَالَمِينَ (87) 

In(Ğıron) bo aləmon ğərəz təzəkkuri(pandi) co çi ni.

وَلَتَعْلَمُنَّ نَبَأَهُ بَعْدَ حِينٍ (88)

Və hukmən qıləy mıddəti bəpeştə, çəy xəbə bəzıniyon.

In ayəon Sadi mıborəkə surə oxonə ayəonin və bə Xıdo-Rəsul(s)-i besəti iyən Kərimə-Ğıroni ayid bıə bə çandə qılə muhim iyən əsosə nuktəon  təkid kardedə. bə ın ayəon əsos, bə duyədə nıbuvvət iyən peyğombərəti iddio kardə və fəğət maddi iyən dınyəvi niyyətışon bıə kəson əks, qırd peyğombəron,min cumlə islomi peyğombər(s) de ojə-oşkoə holəti elon kardedə ki, millətiku hiç qıləy intizor və çəş kardeyışon ni. əvon nə hiçkəsiku nə təğdır və təşəkkur çəş kardedən, nə maddi iyən mənəvi mıkoafton, nə mol iyən məğam və nə co qıləy çi dumon.

Əvon ıştə ilahi xəbə və peyğomi rosnə kəson təğdım kardedən və çəvon çın ilahi xəbə ıştən məzmunədə hiç qıləy rolışon mevcud ni. ın bə kali qıləyniyon əğedə əkse ki, iddio kardedən ki, peyğombəron çokə insonon bıən və əvon çokə koonışon de Xıdo nomi bə insonon rosneydəbin ta de ın roy vositə milləti bo əvoni əncom doeyro təşviğ kardedəbin.

Həyğət ıme ki, peyğombəron ıştə zəmonə milləti miyono bıə sıxan iyən rəftoron, joqo be ki,hətto de əvon mıxolif bıə insonon həm, çəvon jimonədə hiç qıləy zəyifə noxtəşon pəydu kardey zınəni.ehanə jıqo bıəbe, çəvon ın ko dıjd əkəyn və bəçəvon ələyh ımoni ifşo əkəyn. peyğombəron nəyinki,çı maddi mənfəəton dumo nıbin, bəlkəm Xıdo dini təblıği koyədə bə əzob-əziyyəti dıço bedəbin və vey mumkin be bın royədə ıştə coni həm bın royədə fədo kardedəbin.

In ayəon hamyedə: peyğombəron iyən osmoniyə kitobon hədəf, milləti çı ğəflət iyən zılmətiku xaric kardeye. həmonə ğəfləton ki, çı bə dınyo iyən bəçəy koon dıl dəvasteyku nəşət seydə və bə insoni çı maqi bəpeştə bıə ğıyoməti rujiku ğəfləti boyis bedə və ya bə həxı inkor kardey iyən bə kufr iyən şırki zılməti dıço bıey boyis bedə.

Sadi mıborəkə surə oxonə ayə, bəştə mıxolifon xitob kardedə və hamyedə: ehanə həm əvon bə həxə sıxani imon nvıon və əy ciddi nıqəton, rəyrə çəy həx bıey dərk bəkardeyn. əmmo, həmonə ruji boşmə hiç qıləy foydəş nibəbe. zira, həni boçəy əvəzi beşeyro hiç qıləy ro nibəmande.

Çın ayəonku omutedəmon:

1-Xıdo dini təblığ kardə kəson, bəpe bənə pəyğombəron millətiku hiç curnə maddi tələb iyən co intizorışon nıbe və ım boçəvon ıştə peyğomi rosney koy ovandəti pəydu kardey xoto, lozım bıə şərte.

2-Sıxan, rəftor iyən muaşirətədə rost nıbey, bə dini təblığədə ovandəti pəydu kardey mane bəbe. din bəpe de soyə zıvon, həmmə kəsi dərəsə ruşinə formə bıbu ta bəy əməl iyən əy icro kardey, bo milləti təbyin bıbu. ehanə jıqo nıbu, bə insonon zəhməti iyən çı diniku fərol kardey boyis bəbe.

3-İslomi peyğombəri risolət iyən Kərimə-Ğıron, cahanşumule və fəğət bə peyğombəri(s) zəmonədə jiyə ərəbon və co insonon ayid ni.

4-Kərimə-Ğıron çı pand və nəsyəton kitobe və bə insonon oğoəti iyən huşinəti boyis bedə.

5-Ğıron iyən islomi peyğombərəti(s) təlimon həxəti, ayəndə və omə rujonədə məlum bəbe. harçənd, ımruj kali insonon ın erjinə təlimon ğəbul nıkon.