Şiiə yolə alimon-36

Şiyə yolə alimonku qıləyni həm arif,Ğıroni mıfəssır,hədis şınos,iyən məşhurə fəğih seyd Heydər Amoliye ki,Hicri-Ğəməri həştminə əsrədə jiyə.əv iminə fəğih iyən mutəkəllime ki,çı təşəyyu iyən təsəvvufi miyono qıləy nığılə rabitəş icod karde.ım yol və məşhurə alim iyən arif deştə bə şiyə məzhəbi irfani baxşədə bıə qırd zu və təsiron,ijən çı umum millət və hətto çı alimon miyono jəqo həm məşhur bıə nəbe.əmmo,qıləy fransəvıjə mıslmonə filosof Henri Korbin iyən Osman Yəhya ki,əvon har dıqləyni Fransa Sorbon universteti ostadonku bin,dəvardə çandə da soronədə çın yolə alimi çandə qılə əsər və təlif kardə kitobonışon çapo bekarde.çəy bədiqə dınyo universtet iyən elmiyyə mərkəzon de seyd Heydəri əndişə və şəxsiyyəti oşno bin…..

Seyd Heydər Amoli Hicri-Ğəməri 720-ə sori İroni Mazandıran viloyəti Amol şəhrədə qıləy Ələvi seydə xıyzonədə bə dınyo çəşış oj karde.əv ıştə cıvonəti devronədə ıştə zəmonə rəsmi elmonış çok-çoki omuteşe və çun bə donzə imomi irfani ziyodə meylış hestebe,ıştə rəsmi təhsilati kənoyədə,de ciddiyə formə de itfani fundamental təlimi mıtoliyə məşğul bedəbe.Seyd Amoli  boştə təhsilaton təkmil kardero,bə Xorasan və İsfəhon viloyəton səfəş karde ki,ımon bə zəmonə həmməysə muhimmə elmi hovzə və mərkəzon bin.Əv 5 sor bədiqə və ıştə umri 25 sinnədə de qıləy məşhurə çehrə nomi bəştə moəku bıə vırə oqarde.Seyd Heydəri elm,əxloğ iyən istedodi  sədo bə Təbərıstoni hukmdori quş həm rəse.əv ım cıvonə alimış ıştə palu vanqış je,bəy yolə hurmətış karde və bə vəzərotxonə mənsubış karde…….

Seyd Heydər bın zəmonədə ıştə elmi iyən əxloği kəmolatonsə əlovə,həmən çı qıləy barzə iştimayi mevğıyyəti soyb be və maddi cəhəto həm vey çokə həddədə jimon kardedəbe və barzə rifohış hestebe.əv ıştə asayiş iyən rifohi vey barzə noxtədə,sərəse ki,ım dınyo jimon puç,tel və faniye,əve ıştə daxilədə qıləy inğılobış icod karde.Seyd Heydər qırd dınyo neməton min cumlə vətən,məğam,sərvət iyən xıyzonış vadoe və coyli iyən de qıləy kanə oləti bə Xıdo Kə,Əhli-Beyt(ə)-I ziyorət kardey iyən bə co mığəddəsə vıron min cumlə İrağ,Fələstin,Məkkə iyən Mədinə səfəş karde və ıştə nuyə jimoni devronış bino karde…….

Seyd Heydər Amoli Xıdo Kə,peyğombər(s) iyən Əhli-Beyt(ə)-i hərəmon ziyorət kardey bəpeştə, si sinnədə bə İrağ oqarde və hejo əyo həm sakin be.əv İrağədə bənə Əllomə Hilli fərzənd Fəxrul-Muhəğğiğin və Movlana Nəsiruddin Kaşani Hilli bıə yolə alimon məhzəriku bəhrəş barde və çəvon məxsusə dığğətış bəştə səmt cəlbış karde.əv ki,ıştə nevcıvonəti sinnədə islomi irfoni əsosonış vey çok omutəşbe,ısət həm bə praktiki iyən əməli cəhəto bə ın vadi ğədəmış noəbe və suluke iləllah mərtəbon dəvardedəbe.çəy bə ilahi ğurbi xoto bıə pokə niyyət və ixlos və əy Xıdo zikriku bə diyəro kardə har çi tərk kardeyro bıə zumandə irodə,həğiyə elmi bə və dərvozəş dumo yənde  bəçəy dimi oj kardedə…..