Şiiə yolə alimon-39

De Muhəğğiğ Sani iyən de Muhəğğiğ Kərəki nomi məşhur bıə Əli ibn Həsən Kərəki çı Livani Cəbəl-Amil  məntəğə alimonkuye ki,de şah İsmail Səfəvi dəvəti bə İron omeydə və çı təşəyyu iyən şiyə məzhəbi tərvicədə qıləy muhimmə rolış bıə.əv vey yolə şoqirdonış perosnə və əv Hicri-Ğəməri daminə əsrədə yolə alim iyən fəğihon çın yolə alimi  şoqirdonkuye.

Muhəğğiğ Kərəki Hicri-Ğəməri 865-ə sori Livani Cəbəl-Amil  məntəğədə Kərək diyədə bə dınyo çəşış oj kardə.çəy pı ki,çı şiyə yolə şəxsonku be ıştə vətənədə çın fərzəndi nomış de Əmirəl-Muminin(ə)-I mıborəkə nomi əloğədor,Əliş noe.Cəbəl-Amil  bə mıxtəlifə dəlilon xoto,mığəddəsə sərzəminoku bə hisob omeydə.min cumlə bənə həzrəte Mosə(ə)-I vəsiyy bıə  Yuşə` ibn Nun və Hezğil peyğombəri bıə ənbiya və ilahi ovliyaon məzar əyo mevcude və həmçinin həzrəte İsa(ə) əyo şıe-omeyış kardə….

Cəbəl-Amil  məntəğədə təşəyyu iyən şiyə məzhəbi bino bıey,bə Hicri-Ğəməri sıftənə əsri iminə nimə rəseydə ki,bənə Səlman Farsi,Əmmar Yasir iyən Əbu Zəri bıə muxlisə şiəyon həmonə sərzəminədə de İslom iyən Ələvi təşəyyu və şiəti tərvici koy məşğul bin.ğasbu həm səhobə Əbu Zər ıştə bə həmonə sərzəmini dərbədər bıə zəmonədə bəsə Əli(ə)-I coqləyni dustonku vey bə həmonə məntəğə şiyə bıeyədə ziyodə təsirış bıə.çə həmonə diyori şiəyonku pərhizkor və təğvaninə alimon perəsə və şiyə aləmışon nuroni kardə.Şeyx Hurr Amili ıştə “Əməlul Əməl fi uləmai Cəbəli Amil” kitobədə Cəbəli Amil məntəğə əhaliku beşə  çandə sa qılə şiyə alimon nomış cəm kardə vardəşe və bə kali qıləyniyon həm bəçəvon mığdori çandə da nəfərış həm əlovə kardə.

Cəbəl Amili məntəğə elmiyyə-hovzəon çı Əhli-Beyt(ə)-I məktəbi ehya və bəyji kareyədə vey təsirəkə hovzəonku bə hisob omeydə.çın elmiyyə hovzəon torıxədə həmməysə veyə hərkət və bərəkətış bıə devron bə Hicri-Ğəməri həştminə sriku de tosə yonzəminə əsri ayide.bın devronədə bənə Şəhide-Əvvəl,Şəhide-Sani və Muhəğğiğ Kərəki bıə yolə fəğih iyən alimon Cəbəl Amili məntəğə elmiyyə-hovzəonədə zuhurışon karde.həmçinin çəvon vey zumandə alimon və fəğihon peşo bə İron mıhocirətışon karde ki,ım həm İronədə şiyə məzhəbi tərvici koyədə ziyodə təsirış noe.Muhəğğiğ Kərəki həm bə İron hicrət kardə çın yolə alimonku qıləyni be….