865-ə hissə-Zuməri surə-59-63 şərifə ayəon

865-ə hissə

بَلَى قَدْ جَاءتْكَ آيَاتِي فَكَذَّبْتَ بِهَا وَاسْتَكْبَرْتَ وَكُنتَ مِنَ الْكَافِرِينَ (59) 

Bəle, çımı ayəon bəştı soyəx ome. əmmo, əvonı bə həşə je və təkəbbırəti karde və çı kofironku biiş.

وَيَوْمَ الْقِيَامَةِ تَرَى الَّذِينَ كَذَبُواْ عَلَى اللَّهِ وُجُوهُهُم مُّسْوَدَّةٌ أَلَيْسَ فِي جَهَنَّمَ مَثْوًى لِّلْمُتَكَبِّرِينَ (60) 

Və ğıyomıti ruji bə Xıdo duyədə sıxan pesoxtə kəson bəvindeyş ki, çəvon dimon siyo bıə. aya bo yoləşəxəti kardə kəson qıləy vırə cəhəndımədə ni?(həlbəttə ki, heste).

Vəynə proqramədə çə odəmonku sıxan votey be ki, əvon cəhəndımi otəşi mışohidə kardeyədə, ğəfləti haniku oğo bəbeyn və bəştə dınyoədə bəbod şıə umri həsrət bəharde. əvon oruzu bəkardeyn ki, ey kaş bə dınyo oqardeyış zınəbe ta ıştə şıə roy islohko və ıştə dəvardə xəto və səhfon əvəzi beşo.

In ayəon hamyedə: jıləvoni ni ki, Xıdovənd şımə həxədə kutoətiş kardə və bo şımə hidoyətiyən irşodiro lozım bıə qırd  vositəonış vığandəni. bəlkəm, çəvon dınyoədə bıə zəmonədə Xıdovəndi boəvon peyğombəron iyən osmoniyə kitobonış vığandə. ehanə şımə ıştə ağliku oko doəonbe, de rohətə formə çəvon həxəti dərəsiyon və çəvon nışon doə roonku bəhrə əbardiyon.

Əmmo, şımə təkəbbırəti iyən yoləşəxəti ruhiyyə boyis be ki, şımə həxı inkorkon və bə həşə bıjəniyon və ilahi peyğombəron dəvəti ğəbul nıkon. nəticədə əve şımə ımruj bə cəhəndımi otəşi dıço bıəyon. qıləy cəzo ki, çəvon çehrə mırdol iyən siyo bəkarde və bə cəhəndımi əhli çı iyandeyku nifrət iyən zəhlə şıey boyis bəbe.

Beşək, kofir iyən həxı munkiron rəyison ğıyoməti ruji rısvo iyən zəlilo-xar bəbeyn. ğıyoməti ruj həyğətədə, çı insonon fik iyən əməlon təcəssım pəydu kardə iyən çı məxfiyə sırron oşko bıə ərsə və vırəy. bın dınyoədə dılonış siyo iyən toyki və çəvon fik iyən əməlon toyki bıə kəson, əyo çəvon ım holon çəvon çehrə və dimonədə oşko bəbe və çəvon sima siyo və toyki bəkarde.

Çın ayəonku omutedəmon:

1-Xıdovənd de vəhy iyən ağli roy vositə huccəti itmom və təmom nıko, fərdon əzob nibəkarde.

2-kufr iyən həxı inkor kardey əsliyə mənşə, yoləşəxəti iyən təkəbbırəti ruhiyyəy.

3-ğıyoməti ruji insoni zohir iyən botın i bəbe və çəvon surəton deçəvon dılon həmahənq bəbe. dılışon toyki bıə kəson, çehrə və dim oşko və siyo bəbe.

وَيُنَجِّي اللَّهُ الَّذِينَ اتَّقَوا بِمَفَازَتِهِمْ لَا يَمَسُّهُمُ السُّوءُ وَلَا هُمْ يَحْزَنُونَ (61) 

Və Xıdovənd təğva roy qətə kəson deçəvon ovandəditiyon bə ico nicot bədoe. qıləy holədə ki, bəvon hiç qıləy bevəcəti nibərəse və əvon ğəmqin nibəbeyn.

Vəynə qrupi mığobilədə ki, bəştə təkəbbırəti iyən kufri xoto, suyədim iyən cəhəndımi əhl bin, ın ayə ğıyoməti ruji əzobiku perəxey ro, təğvavə pərhizkorəti zıneydə və hamyedə: Xıdovənd təğva əhli xilos bəkarde və əvon bə hərəbaxtəti iyən səodəti bərəseyn.

Hərəboxtəti həmonə sabit iyən əbədiyə ləzzəte. harçənd xoşməzə və ləzzətinə xorək və peşoməninə çiyon, ləzzət baxş kardedə. əmmo,çı hərəbaxtəti iyən baxtəvarəti nışonəy. zira, jıqo ləzzəton dayimi bıəni və qıləy kırtə mıddəti bədiqə çı miyoniku şıə. əmmo, bənə elm iyən mərıfəti kəsb kardey bıə ləzzəton, bə insoni baxtəvərəti boyis beıy bəzıne. çıro ki, həyğəti kəşf iyən mərıfəti dərk kardey ləzzət, qıləy əbədi iyən sabitə ləzzəte.

Dınyəvi xoşə çi və ləzzəton, harçənd qıləy mıddət dəvomış heste, əmmo bə dınyo jimoni umri kuto və kırtətidəlili xoto, çı uxrəvi ləzzəton mığobilədəvey kam və beçiz bə hisob omeydə. de ın tərtibi, həyğiyə hərəbaxtəti insoni koon girovədəy ki, əy axırətədə bə sabit və əbədiyə ləzzəton bərosne, əy harcurnə ğəm iyən ğussəonku ozod bəkarde və hiç qıləy zərəl və xətər əvoni təhdid nibəkarde.

Çın ayəku omutedəmon:

1-dınyo jimonədə təğva və pərhizkorəti, axırətədə hərəbaxtəti iyən səodəti amile.

2-təğva qıləy sipəre ki, insoni çı yavə və bevəcə çiyonku muhafizə kardedə. ğıyoməti ruji pərhizkoron bəd çiyonku bə diyəron və bə ğəmqinəti iyən peşmonəti dıço nibəbeyn.

اللَّهُ خَالِقُ كُلِّ شَيْءٍ وَهُوَ عَلَى كُلِّ شَيْءٍ وَكِيلٌ (62) 

Xıdovənd harçi ofəyə kəse və əv harçi oqətə və nığo doəkəse.

لَهُ مَقَالِيدُ السَّمَاوَاتِ وَالْأَرْضِ وَالَّذِينَ كَفَرُوا بِآيَاتِ اللَّهِ أُوْلَئِكَ هُمُ الْخَاسِرُونَ (63) 

Osmonon iyən zəmini kilidon boəye və bə ilahi ayəon kufr kardə kəson həmonə ziyonkoronin.

In surə ayəon mehvər və məzmun, umumən çı tohid iyən şırki bəhsi barədəy. liza, ın ayəon ijən bə tohidi mevzu oqardedə və bə ın həyğəti işorə kardedə ki, aləmi koon tədbir və əvoni oqətey və nığo doey, de həmonə kəsi dastiye ki, əvonış ofəyə. nəyinki, qımonkənən ki, Xidovəndi dınyoş ofəyə və əvonış bəçəy ıştən holi vadoəşe ya çəvon idorə koonış bə cokəson ehdəş noə.

In ayəon  həyğətədə, bə mışrikon iyən bıtpərəston nəzə qıləy tə`riz və kinoyəy. ımi həm zikr kardey lozıme ki, mışrikonku veyni Xıdo bənə dınyo iyən insoni Xalığ və ofəyəkəsi ğəbul kardedəbin. əmmo, fik kardedəbin ki, çəvon pərəstış kardə çiyon çəvon jimonədə qıləy təsirış heste. jıqo bızın ki, dınyo koon tədbir de həmonə mə`budon dastiye və əvon həmonə bıtə mə`budon çı koon tədbirəkə və ıştə oqətəkəs və nığo doə kəs hisob kardedəbin.

Kərimə-Ğıroni prizmaku Xıdo əvəzi bə cokəson soyəx şıə kəson və əvoni çı aləmi koonədə təsirin zınə kəson, həyğiyə ziyonkoronin. zira, çı qırd hestemoni aləmi malik və soyb bıə və osmonon iyən zəmini kilidon çəy ğudrəti dastədə bıə qıləy Xıdoku dimış qordınə və bə zəyif iyən ocizə mevcudaton soyəx şedən ki, çı hiç qıləy mənfəət və ziyoni mənşə ni və çəvon dastiku hiç qıləy ko nibome. əve əv, çı insoniku xətər və təhlukə dəf və bə diyəro kardey amil bıey əzıni.

Çın ayəonku omutedəmon:

1-qırd hestemoni aləm, xəlğ bıey iyən baği mandeyədə, bə Xıdovəndi ehtiyociş heste. de qıləy co iborəti əv həm dınyoş ofəyə və həmə çəy pərvərdıqor və hestemoni aləmi hifz kardedə və oqəteydə. çən, çı Xıdovəndi Xalığ bıey iyən çəy rububiyyəti miyono harcurnə farğ bıey, inev şırk bə hisob omeydə.

2-tohid, qıləy nəzəy ki, bəpe çı bəşəri jimoni qırd cəhətonədəcari bıbu və bə insoni jimoni iqlə məxsusə baxşi məhdud ni.