867-ə hissə-Zuməri surə-71-75 şərifə ayəon

867-ə hissə

وَسِيقَ الَّذِينَ كَفَرُوا إِلَى جَهَنَّمَ زُمَراً حَتَّى إِذَا جَاؤُوهَا فُتِحَتْ أَبْوَابُهَا وَقَالَ لَهُمْ خَزَنَتُهَا أَلَمْ يَأْتِكُمْ رُسُلٌ مِّنكُمْ يَتْلُونَ عَلَيْكُمْ آيَاتِ رَبِّكُمْ وَيُنذِرُونَكُمْ لِقَاء يَوْمِكُمْ هَذَا قَالُوا بَلَى وَلَكِنْ حَقَّتْ كَلِمَةُ الْعَذَابِ عَلَى الْكَافِرِينَ (71) 

Və kofir bıə kəson dastə-dastə bə cəhəndımi səmt tojney bəbeyn ta çoko ki, bəy bərəseyn, cəhəndımi bəon oj bəbeyn və hıvoskəon bəvon bəvoteyn: aya şımə miyono peyğombəron bəşmə soyəx nıome ta şımə pərvərdıqori ayəon boşımə bəhando və boşımə jıqo qıləy ruji vindemoniku çəşnavi bıdo? bəvoteyn: çıro? (əvon omin və əmə təkzib kardemone)əmmo əzobi fərmon bo kofiron ğətiye.

قِيلَ ادْخُلُوا أَبْوَابَ جَهَنَّمَ خَالِدِينَ فِيهَا فَبِئْسَ مَثْوَى الْمُتَكَبِّرِينَ (72)

Bəvon votey bəbe: cəhəndımi bəonku varid bıbənən ki, əbədi əyo bəmandiyon. çən, çı bevəce çı mıtəkəbbıron(yoləşəxəon) vırə!

Navnə bərnomədə votemone ki, ğıyoməti ruji bə ədolət iyən həxı əsos bıəilahi məhkəmə de mıxtəlifə şoydon iştiroki iyən de insonon əməlon nomə bərpo bəbe və nəhoyətən bo hakəsi mıəyyən bəbe ki. əv bə vəhışti əhl bəbe və vəhışt bəşe ya bə cəhəndım.

In ayəon hamyedə: bə cəhəndımi səmt hukmi eloni bədiqə, əvon dastə-dastə bə cəhəndımi səmt şıkırney bəbeyn. çıro ki, əvon deştə ıştən lınqi bə cəhəndımi səmt şıey hozzı nin. de Kərimə-Ğıroni təbiri cəhəndımi məmuron və hıvoskəon əvoni dezzu bə cəhədnımi bəon səmt bəşıkırneyn və bın zəmon çı cəhəndımi bəon oj bəbe.

Cəhəndımi məmur və hıvoskəon əvoni bəçəvon dınyoədə bıə nodırıstə intixob və vıjnemoni xoto, mızəmmət kardedən ki, aya şımə ıştən miyono bəşmə soyəx peyğombəron nıome ta şımə pərvərdıqori ayəon bo şımə bəhando və de dumo yənde bıə xəbərdorətiyon şımənış çın ımrujnə ruji vindemon iyən mıloğatiku bərhəzərış nıkarde? çıro şımə çı peyğombəron sıxanon təkzib kardeyone və bə həşə jeyone və çəvon çəşnavi iyən xəbərdorətiyon çı viro bekardeyone? şımə qımon kardeyone ki, de ğıyoməti ruji inkor iyən yodo bekardey, şımə dast oj bəbe və şımə har qıləy koyon piye bə vırə bərosneyon? çiç be ısət jıqo bə siyuə ruji mıbtəlo bıəyon? Təbiiye ki, bın zəmon cəhəndımi əhl ğərəz bəştə nodırıstə roy vıjniye etırof kardey co ro ni və əbədi əyo bəmandeyn. çı mıtəkəbbr iyən yoləşəxə insonon vırəçı yavə və bevəce.

Bə ım nuktə həm dığğət kardey lozıme ki, çı cəhəndımi əhlikufr iyən inhirofi əsliyə sərçeşmə, çəvon çı həxı mığobilədə kardə tuğyongərəti, təkəbbırəti iyən məğrurətiye. əvon hejo həxı vədə yoləşəxəti kardedəbin və ıştə jimonədə de tosə ıştə umri oxo ıştə xəto və səhvonku dastış kəşəni. beşək, çəvon bə ilahi ayəon ım inkor iyən kufri isrori nəticə, əbədi cəhəndımədə mandeye.

Çın ayəonku omutedəmon:

1-əvon ki, dınyoədə təkəbbırəti kardedən və çı peyğombəron həxə sıxanon inkor kardedən, ğıyoməti ruji əvon bə təhğıri məruz bəmandeyn. çəvonku qıləy nımunə, həmonə mələkon de əvon bıə rəftore ki, əvoni bə cəhəndımi səmt dezzu bəşıkrneyn.

2-huccəti itmomi bənav, hiçkəs bə cəhəndım nibəşe. ğıyoməti ruji mucrim iyən qınokoron bəştə kardə xəto iyən səhfon etırof bəkardeyn və ğəbul bəkardeyn ki, həx omə bəvon rəsə və əvışon məsə, əmmo əvışon ğəbul kardəni.

3-insonon bə əzobi giriftor bıey dəlil, kufr kardey və çı kufri rəğ-rişə həm çəvon çı həxı mığobilədə bıə təkəbbırətiye.

وَسِيقَ الَّذِينَ اتَّقَوْا رَبَّهُمْ إِلَى الْجَنَّةِ زُمَراً حَتَّى إِذَا جَاؤُوهَا وَفُتِحَتْ أَبْوَابُهَا وَقَالَ لَهُمْ خَزَنَتُهَا سَلَامٌ عَلَيْكُمْ طِبْتُمْ فَادْخُلُوهَا خَالِدِينَ (73) 

Və ıştə pərvərdıqoriku tarsə kəson, dastə-dastə bə vəhışti tərəf sovğ doey bəbeyn ta çoko ki, bəçəy nezi rəsin, qıləy holədə ki, vəhışti bəon oj bəbeyn və vəhışti hıvoskəon(məmuron) bəvon bəvoteyn: səlom bıbu bəşmə çok və pok biyon. çən, daxil bıbən. qıləy holədə ki, əyo əbədi bəmandiyon.

وَقَالُوا الْحَمْدُ لِلَّهِ الَّذِي صَدَقَنَا وَعْدَهُ وَأَوْرَثَنَا الْأَرْضَ نَتَبَوَّأُ مِنَ الْجَنَّةِ حَيْثُ نَشَاء فَنِعْمَ أَجْرُ الْعَامِلِينَ (74)

Və(vəhışti əhl) bəvoteyn: şık bə Xıdo ki, çəy və`də boəmə rost be və(vəhışti) zəminış boəmə miros ğərolış doe ta çı vəhışti har vırəku bıpyişone və bəvıjnemon. çən, çı əməli əhli mıkofot çı çoke.

Bə kofiron əks ki, de təhğır bıə formə bə cəhəndımi səmt şıkırney bəbeyn, imoni əhl və salehə şəxson həm dastə-dastə de ziyodə ehtırom iyən hurməti bə vəhışti tərəf hərəkət bəkardeyn. qıləy holədə ki, çı naviku vəhışti bəon boəvon oj bəbe. bın zəmon çı rəhməti məlayikon ki, vəhışti hıvoskə və məmuronin, bəçəvon və bebəşeyn, bəvon xəşomə bəvoteyn və bəvon səlom bədon və əbədiyə vəhışti mıjdəvoni bəvonxəbə bədon. bın zəmon vəhışti əhl bə Xıdovəndi bəştə və`dəon bəfo kardey iyən əvoni bə vəhışt daxil kardey xoto, bəy həmdo-səno və şukr bəkardeyn.

Imi həm zikr kardy lozıme ki, çoko ki, mıtəkəbbır iyən yoləşəxə cəhəndımi əhl əyo əbədi bəmandeyn, pok iyən salehə muminon həm vəhıştədə əbədi bəmandeyn. harçənd dırstə ko soybon(bənə co insonon) qıləy kırtə zəmonədə dınyoədə jimonışon kardə, demiyən həmonə umri kırtəti, çəyku hikoyət kardedə ki, əvon çandə həzo sor həm jimonışon kardəbe, ijən bə aləmon pərvərdıqori əmron təslim və tabe əbin. ım xısusiyyət çəvon vucudədə rəğ-rişəş ğandə və bəvonədə bə qıləy sabitə xısləti təbdil bıə.

Çın ayəonku omutedəmon:

1-fəğət imon kifoyət kardedəni, bə vəhışti rəseyro təğva iyən pərhizkorəti həm lozıme.

2-vəhışti əhl bə vəyo daxil beyədə, bə Xıdo həmdo-səno və şık bəkardeyn. zira, bə har qıləy neməti rəseyro şık iyən təşəkkur kardey lozıme. əv həm ə nemət ki, Xıdovənd bəştə lutfi əsos bəvon ətoş kardə.

3-salehə əməl nıbə holədə bə vəhışti rəsey mumkin ni. imon iyən təğva insoni bə zəmon bə vəhışt bərosne ki, de ko, cəhd iyən de Xıdo royədə mucohidəton bə ico bıbu. nəyinki, beəməl və çı camiyəku inzivo və təcrid bıə holədə.

وَتَرَى الْمَلَائِكَةَ حَافِّينَ مِنْ حَوْلِ الْعَرْشِ يُسَبِّحُونَ بِحَمْدِ رَبِّهِمْ وَقُضِيَ بَيْنَهُم بِالْحَقِّ وَقِيلَ الْحَمْدُ لِلَّهِ رَبِّ الْعَالَمِينَ (75)

Və firiştəon bəvindeyş ki, (ilahi)ərşi qırdo həlğəşon jıə. ıştə pərvərdıqori hejo sıtoyiş(kardedən) təsbih votedən və çəvon miyono həxədə hukm bəbe və(əvon koy oxoyədə) votedən:şukr və sıtoyiş bə aləmon pərvərdıqor bıə Xıdovəndi məxsuse.

In ayə ki, Zuməri mıborəkə surə oxonə ayəy, bə Xıdo-Rəsuli(s) xitob kardə holədə hamyedə: həmonə ruji Xıdo ərşi qırdo qardə və həlğə jıə məlayikon bəvindeyş və əvon hozzon ki, Xıdovəndi çəy bandəon barədə bıə əmr iyən fərmonon icrokon və bə vırə bırosnon. həmonə ruji bə həx iyən ədoləti əsos çı insonon miyono hukm kardey bəbe və çı məlayikon iyən vəhışti əhli zıvonədə Xıdovəndi həmdo-səno iyən sıtoyiş kardey cari bəbe.

Çın ayəku omutedəmon:

1-həm cəhəndım iyən həmən vəhışti hıvoskə və məmuron, Xıdovəndi əmron bə vırə rosnero məmurin və əvon ğərəz Xıdo fərmonon co qıləy çi nibəkardeyn.

2-ilahi həmdo-səno və təsbih, bə iyande nez və bə icoon. həmd və sıtoyiş fəğət bə kəsi loyığe ki, çı hestemoni aləmi tədbiri vindedə və çəy koyədə hiç qıləy ayb və noxsan mevcud ni.