878-ə hissə-Ğafiri surə-43-47 şərifə ayəon

878-ə hissə

لَا جَرَمَ أَنَّمَا تَدْعُونَنِي إِلَيْهِ لَيْسَ لَهُ دَعْوَةٌ فِي الدُّنْيَا وَلَا فِي الْآخِرَةِ وَأَنَّ مَرَدَّنَا إِلَى اللَّهِ وَأَنَّ الْمُسْرِفِينَ هُمْ أَصْحَابُ النَّارِ (43) 

Hukmən, şımə mıni bəçəy səmt dəvət kardə çi, boəy nə dınyo və nə axırətədə qıləy dəvəti(ğudrət) ni. (nə dınyoədə və nə axırətədə qıləy ğudrəti dəvət heste)qıləy holədə ki, çəmə oqardemon bə Xıdo səmte və isrofkoron otəşi həmdəmin.

فَسَتَذْكُرُونَ مَا أَقُولُ لَكُمْ وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ (44) 

Çən, rəyrəçımı bəşmə votə çiyon bəştə yod bəvardiyon və az, ıştə ko bə Xıdo ehdə noydəm. zira ki, əv ıştə bandəon(holi) vindedə.

Dəvardə bərnoməonədə votemone ki, fironi xıyzoniku bıə mumin çoko ki, çı milləti mığobilədə ğərolış qəte, həni təğiyyəş bə kəno noe və de ojə-oşkoə holəti çı tohid iyən şırki və çəy yavə təsiron barədə sıxanış vote.

In ayəon həmonə sıxanon dəvomədə ımi bəyon kardedə və hamyedə: şımə mıku tələb kardedon ki, az çı vohidə Xıdoku dast bıkəşom vəşımə bıton pərəstışkəm. qıləy holədə ki, ım behiss və beşuurə bıton, nə dınyoədə bəşmə ko bome və nə axırətədə boşmə qıləy foydəş bəbe. əvon nə qıləy sıxan votedən və nə əvon bə qıləy ro dəvət kardedən. nə çı ikəsi koyku qıləy anqıli oj kardedən və nə qıləy muşkil və problemon həll kardedə.

Qıləy holədə ki, çəmə həmməy oqardemon iyən koy oxo, bə Xıdo səmte və bəpe çəy mığobilədə cəvob bıdəmon. ruşine ikəs ki, bə Xıdo imon vardey əvəzi, bə bıtpərəston səmt dim bıqəto, çəy vırə ğıyoməti ruj cəhəndıme. zira, əvon həxə royku mınhərif bıən və çı hıddiku dəvardən.

Ha millət ha! az bəşımə de oşkoə holəti jıqo votedəm: mı bə vohidə Xıdo imonım vardə və ıştə koy oxom bəçəy ehdəm noə. mı nə şımə təhdidonku tarsım heste və nə şımə ziyodəti iyən ğudrətiku. çıro ki, mı ıştənım bə ikəsi dəspardə ki, çəy ğudrəti oxoş ni və əv həm ıştə bandəon qırd əməl və koonku aqah və xəbədoye. əmmo, əfsus ki, şımə bəvədə çımı sıxani həxəti dəbərəseyon ki, bəvədə həni ilahi məhkəmə vədə bəbiyon və Xıdo otəş iyən ğəzəb şıməni dəbəqəte. həlbəttə, bə zəmon həni di bəbe və həni bə dınyo oqardeyro hiç qıləy ro əmandıni.

De ın formə fironi xıyzoniku bıə mumin deştə ım sıxanon coyli çə həmonə ğovmi mığobilədə mande, ıştə imonış oşko karde və ıştə tohidi xəttış çı şırki xəttiku coş karde.

Çın ayəonku omutedəmon:

1-bə Xıdo imon vardey və ğərəz əv harçi inkor kardeyro, bə dəlil iyən məntıği əsos bənav bışəmon və cokəson həm de ın roy vositə bə Xıdo səmt dəvətkəmon.

2-isrof fəğət molədə ni, bəlkəm ıştə umr iyən istedodon inhirof iyən botılə roonədə bə hədər doey, çı isrofi həmməysə dıjdə nımunəonkuye ki, həlbəttə çəy həm qıləy saxtə cəzoş heste. çən, bəpe ıştə jimoni royədə bəpe de dığğət və ağılmandəti hərəkətkəmon.

3-ıştə vəzifə bə rosney bədiqə, çı deşmınon təhdid iyən məkrinə planon mığobilədə bə Xıdo pənoh bobəmon və bəy təkyəkəmon. çıro ki, çəy ğudrət çı həmmə ğudrəton fovğədəy və bəpeye.

4-ıştə koon bə Yolə Xıdo baspardəmon. zira, əv çəmə hol-əhvol və əməlonku komilə surətədə xəbədoye.

فَوَقَاهُ اللَّهُ سَيِّئَاتِ مَا مَكَرُوا وَحَاقَ بِآلِ فِرْعَوْنَ سُوءُ الْعَذَابِ (45) 

Çən, Xıdovənd əy çəvon hiylə kardə çi ağıbətiku oqəteşe və qıləy saxtə əzobi fironi xıyzonış dəqəte.

النَّارُ يُعْرَضُونَ عَلَيْهَا غُدُوّاً وَعَشِيّاً وَيَوْمَ تَقُومُ السَّاعَةُ أَدْخِلُوا آلَ فِرْعَوْنَ أَشَدَّ الْعَذَابِ (46) 

Otəş, (bəvon)ha sıbh iyən şəv ərzə bəbe(nışon doey bəbe) və qıləy ruj ki, ğıyomət bərpo bıbu(vanq jıey bəbe:) fironi aylə bə vey şiddətinə əzobi daxilkənən.

Fironi xıyzoni mumin çı fironi şiddətinə təhdid iyən hiyləon mığobilədə bə Xıdo pənoh bardeşe. Xıdovənde-Aləm həm çəvon qırd hiyləonış bə bodış doe və əvış çəvon yavə hiyləonku oqətışe və əvış çı imon iyən tohidi royədə ğoym və sabitğədəmış karde. əmmo, çımi mığobilədə fironıjon bəştə inodkorəti xoto, de həxı iyən deçəy tərəfdoron mıborizə bardey koyku dastışon nıkəşe və oxoyədə də həm de ilahi saxtə əzobi dimbədim omin.

Imi həm zikr kardey lozıme ki, bə Kərimə-Ğıroni ayəon dığğət kardə holədə həzrəte Mosə(ə) iyən Bəni-İsrayil de səlomətəti çı Nili ruyku dəvardin, əmmo firon iyən çəy ro dəqıjnə tərəfdoron Nili ruyədə ğərğ bin, eşin. harçənd əvon dıyoədə ğərğ bin, əmmo həyğətədə bə cəhəndımi otəşi daxil bin və de tosə ğıyoməti ruji har ruj sıb iyən şəvədə əy bəvindeyn. həlbəttə, ım nev əzob qıləy bərzəxiyə əzobe. həlbəttə, bə coqləyni əzobi həm işiorə bıə ki, əv həm ğıyoməti ruji saxt və şiddətinə əzobe.

Bə Kərimə-Ğıroni ayəon əsos, çın dınyo bədiqə çı maqiku de tobə ğıyoməti ruji, inson bərzəx nomo qıləy aləmədə bəbe və bın devronədə ıştə kardə koon mığobilədə ya cəzo və ya mıkofot və səvobi bəçaşte. bərzəxi aləm bo çokə ko soybon bə vəhışt varid bıey xoto bıə qıləy bə və dərvozəy və bo yavə ko əhli həm cəhəndımi sutunə qıləy otəş bəbe.

Çın ayəonku omutedəmon:

1-ehanə bə Xıdo təvəkkulkəmon,Xıdovənd həm əməni çı ziyodə deşmınon iyən çəvon hiyləon miyonohifz bəkarde.

2-əgər bə Xıdo təkyəkəmon, nəyinki, fəğət əv bəmə komək bəkarde, bəlkəm çı deşmınon qırd məkrinə planon məhf bəkarde.

3-zolımon cəzo, hejo çəvon həmonə maq iyən həlokətiku bino beydə. əmmo, ğıyoməti ruji çəvon cəzo komil bəbe və əvon bə vey şiddətinə əzobi dıço bəbeyn.

وَإِذْ يَتَحَاجُّونَ فِي النَّارِ فَيَقُولُ الضُّعَفَاء لِلَّذِينَ اسْتَكْبَرُوا إِنَّا كُنَّا لَكُمْ تَبَعاً فَهَلْ أَنتُم مُّغْنُونَ عَنَّا نَصِيباً مِّنَ النَّارِ (47) 

Və bə zəmon ki, (cəhəndımi əhl)otəşədə de hesı-pesi məşğul bəbeyn. çən, təkəbbırəti kardə kəson dasti jiyədə bıə kəson(bəvon) bəvoteyn: əmə(dınyoədə) bəşmə tabe bimon. aya şımə otəşiku i hissə çəməku dəf kardey bəzıniyon?

Navnə ayəonədə bə fironi əhli bərzəxi aləmədə bıə əzobi və peşo çəvon bə cəhəndımi daxil bıey işorə kardedəbe. ın ayə dəvomədə çı cəhəndımi əhli əyo de iyande kardə sıxan və votemononku qıləy səhnə inikas kardedə və hamyedə: əkəson ki, bə cəhəndımi otəşi dıço bıən, de iyande hesı-pes və mıbohisə bəkardeyn. əvon əyo iyande mığəssır bəzıneyn və səy bəkardeyn ıştəni bə sufi bekon. qıləy holədə ki, çəvon həmonə fosid iyən sıtəmkorə rəhbəron bə adilonə məhkəmə əsos, bə şiddətinə əzobi giriftor bəbeyn və hiçkəs hədərə bə cəhəndım şodey nibəbeyn.

Təbiiyə surətədə dınyoədə inhirofə cərəyonon iyən çəvon tərəfdoron ıştə çəş iyən quşon bastə formədə bəştə kofirə rəhbəron pemandedən və çəvon qətə royədə hərəkət kardedən və jıqo intizorışon heste ki, həmonə rəhbəron boçəvon xilos və nicotiro qıləy ko bəkardeyn ya hiçnıbu bəçəvon cəzoku kam bıey boyis bəbeyn. qıləy holədə ki, həmonə fosid iyən sıtəmkorə rəhbəron ıştən həm bə şiddətinə əzobigiriftor bıən və əvon boştə qıləy ko kardey nibəzıneyn, ısət bımando bo cokəson.

Çın ayəonku omutedəmon:

1-dınyəvi dustəti və məhəbbət ehanə həxə royədə nıbu, ğıyomətədə bə xusumət və deşmınəti təbdil bəbe.

2-dınyəvi jimoni muşkilaton, bə insoni kur-kuronə şikilədə bə zolımə rəhbəron tabe bıey icozə doydəni.

3-bə botıli pemandey, bo insoni probelemon xəlğ kardedə. bəpe bıvindəmon ki, çı koon fərdon dumo hərəkət kardedəmon. aya həmonə fərdon ğıyoməti ruji bəçəmə nicoti boyis bıey bəzıneyn ya ne?

4-cəhəndımədə bıə mucrim iyən qınokoron iyande zıneydən və ıştə dınyoədə dəvardə jimoni bə yod vardedən və bəştə bekəs iyən ocizəti xoto, bə cokəson pənoh bardedən.