Şiiə yolə alimon-55

Bə Mığəddəs Ərdəbili ziyodə təğvo iyən kəroməti dəlili xoto ki,milləti çəyku vindəşonbe,əve əv de Mığəddəs Ərdəbili nomi məşhur bıəbe.nəğl bıə ki,şiyə ım yolə alim çıl sori ərzədə nəyinki,bə qıləy qıno mırtəkib nıbe,hətto qıləy məkruhə koş həm bə vırə nırosne.yəni ın yolə alim fəğət de vocibat iyən mıstəhəbbə koon əncom doey məşğul be.iruj qıləy merd de isrori çəyku dəparseşe ki,aya şımə həyğətən qıno kardedəniyon? Mığəddəs Ərdəbili cəvobış doe:”bəqəm şımə nəcasət hardedon ya hətto bəy nəzə kardedon?çəmə nəzə həm bə qıno jıqoe.bəle,bə dini yol və alimon şoydəti əsos,əv bə zohd,təğva iyən ibodəti oxonə dərəcə rəsəbe və çəy qıləy mislış nıbe. Mığəddəs Ərdəbili ıştə rujiqorədə bəsə cokəsonə həmməysə vey pərhizkor be,vey abid və vey təğvanin be.joqo ki,addiyə millət həməy çı təğva və mığəddəsəti zərbul-misol hisob kardedəbin……

Mığəddəs Ərdəbili deməkə ki,qıləy pok və mığəddəsə şəxs be,bo umum milləti,hətto bo dini alimon həm qıləy çokə əxloği nımunə be.çın yolə alimi təvazu,səbrin bıey,əbaxşəti,səxovəti iyən sodətiku ziyodə hikoyəon nəğl bıə ki,əvoni məsey insoni ğulləon zıneyədə bə odəmi komək kardedə.min cumlə nəğl bıə ki,bo ım yolə alimi ziyodə hədiyyəon ısət çı erjin bıbu ya kamə erjış bıbu,vardədebin əv əvoni ğəbul kardedəbe.qahi zəmon qıləy parçə boəy hədiyyə vardəşon be ki,de telı ğeyməti bərobər be.ın yolə alimi adət və vərdış ım be ki,həmonə parçə bənə əmmomə bəştə sə dəvastedəbe və ıştə roysə bə ehtiyocin iyən fəğırə şəxson baxş kardedəbe.joqo ki,əv bə kə oqardeyədə,çə parçəku qıləy qədə hissə çəy sədə mandedəbe.

Mığəddəs Ərdəbili baxşeş və səxavət qıləy həddədə be ki,bəziyon əy de Hatəm Tayi mığoyisə kardedən.ğəhətiyə rujonədə Mığəddəs Ərdəbili ıştə mənzil və kədə bıə qırd çiyon çı fəğıron miyiono təğsımış və boştə iyən boştə xıyzoni çı qıləy fəğıri səhmi mığdorədə oqəteşe.çəy jimoni həmro ikərə bəçəy bın koy etırozış karde və çəvon fərzəndon vəşyan mandeyku ıştə norohətçətiş nışon doe.Mığəddəs Ərdəbili qıləy cəvob nıdoə holədə ıştə kəyku xaric be ta bışo Kufə məçitədə de etıkofi koy məşğul bıbu.Mığəddəs Ərdəbili çı kəyku xaric bıeyku dı ruj dəvardə nıbe ki,qıləy noməlumə şəxs de ziyodə qandım iyən keyfiyyətinə ordə bə ico bəçəvon kə ome və voteşe ki,ımon şımə məçitədə etıkof kardə şuyə vığandəşe.Muhəğğiğ Ərdəbili bəkə oqardey bədiqə çəy jimoni həmro bə keyfiyyətinə ordə və qandımi vığandey xoto ıştə rizoyətış nışon doe.harçiku bexəbə bıə Muhəğğiğ Ərdəbili dərəse ki,qırd ım ətiyyə və hədiyyə Xıdovəndi tərəfiku bıə,əve de bə Xıdovəndi şukr və həmdi koy məşğul be…..

Təvazukorəti iyən sodə jimon kardey qıləy çokə sıfəte ki,Mığəddəs Ərdəbili de əy dərsotey bıəbe.nəğlışon kardə ki, ruji qıləy kərvon Nəcəfiku  oqardeydəbe və istirohət kardey fikışon hestebe.kərvoni əhliku ikəs ki,vey oqınəbe,Mığəddəs Ərdəbiliş vinde və əvış nızıne.çəyku tələbış karde ki,çı pul və muzdi mığobilədə bışi çəy oləton bışışto.Mığəddəs Ərdəbili əvış ğəbul karde və deçəy oləton şırtey koy məşğul be.bın zəmonədə milləti əvışon zıne və həmonə oləti soybi sə-sıxanışon karde.həmonə merd xəcolət kəşə holədə Mığəddəs Ərdəbiliku uzrxahətiş karde.əmmo,Mığəddəs Ərdəbili de qıləy komilə oroməti və de sırə diyəni bəy voteşe:”mumini bəsə çəy bıvə səy sape bıə həx bəsə çəy oləti şışteysə həm veye”….