Şiiə yolə alimon-66

Mirdamadi həmməysə muhimmə şoqird de Molla Sədra nomi məşhur bıə Sədrul-Mutəllihin bıəki,Səfəvi zəmonədə həmməysə nufuz soyb bıə şəxs be və “Hikməte-Mutəaliyə” əsosış noə.ımİlahi həkim ağli yali bə hikməti həyğəton dast pəydu kardero kafi zıneydəni və jıqo hisob kardedəbe ki,ilahi vəhy və irfoni mukaşifaton bəpe de əsl və ğoymə mənbəon nomi fəlsəfədə bəy dığğət kardey bıbu.Hikməte-Mutəaliyə oxonə se ğərn iyən əsri zəmonədə İslomi dınyoədə həmməysə məşhurə fəlsəfə məktəb bıə ki,de şiddəti ğərbi filosofon dığğətış bəştə cəlbış kardə….

Mirdamad 50 qıləsə vey iftixorin iyən erjinə əsəronış təlif kardə ki,çəvon veyni de xətti nusxə formə çəyku yodiqor mandə.çəvon həmməysə muhimmə qıləyni çımonku iborəte: Ğəbəsat, Təğdisat,Cuzəvat və Sədruhul-Muntəha.Mirdamadi Ğəbəsat kitob hestemoni dınyo xılğəti zəminədə və Təğdisat İlahi hikməti həxədə və çı tohid iyən Xıdovəndi vohidəti barədə bə şubhəon cəvobi kitobe.Cuzəvat çı Mirdamadi fəlsəfi rayon və Sədrul-Muntəha kitobi mevzu, Kərimə-Ğıroni təfsire.Miradamadi coqləyni kitob de “Ərrəvaşuhus-Səməvat” nomi həm çı Əyimeye-Əthar(ə) hədis,rəvoyəton iyən sıxanon şəhr iyən bəyonədə nıvıştəşe.həmçinin çın yolə həkimi de irfoni iyən fəlsəfi mevzuon bıə şeron həm baği mandə….

Mirdamad nəzəri elmonədə bıə zumandətisə əlovə,əxloğ iyən şəxsi xıslətonədə həm bemisl iyən barzə səviyyəş bıə.əv çı dini əmron və seyri-suluk iyən çı insoni kəmol və hərəbaxtəti zıneydəbe və bəy ziyodə əhəmiyyət doydəbe,bə Ğıroni ğiroəti eşğış hestebe.joqo ki,nəğl bıə əv haşəv Kərimə-Ğıroni nimə tilovət kardedəbe.bə dini fərizəon iyən mustəhabbaton min cumlə bə Nafilə ziyodə əhəmiyyət doydəbe,de aləmon pərvərdıqori bəşəvnəy razo-niyoz və monocot kardedəbe və ımi tərk kardedə nıbe və əksər vaxtonədə de Xıdo zikr iyən nəfsi təzkiyə və pokəti koy məşğul be.deştə hardemon iyən hıtemoni jıqo məşğul beydəbe ta bo ibodət,tədris iyən təhğığiro qıləy nuyə ğıvvə bə dast biyo.nəyinki,hardey iyən hıtey boçəy təfrih.ləzzəti dumo iyən sətasponeyro bıbu…

Bə fəlsəfə torıxi kitobon ayid bıə kitobonədə de bənə Farabi,İbn Sina,Sehrəverdi,Molla Sədra şəxsiyyəton dimbədim omeydəmon.əmmo,kamə əsəronədə çı Mirdamadi nomi vindedəmon.de veyə təəccıbi çı Miradamdi şoqird bıə Molla Sədra barədə çandə sa qılə kitob iyən məğaləon nıvıştə bıə,əmmo çı Molla Sədra ostad Miradamadi əndişəon həxədə kam iyən məhdudə nıvıştəon mevcude.bə Miradamadi fəlsəfi kitobon,çəy əndişəon iyən nəzəriyyaton bəçəy xoto kam işorə kardey bıə ki,çun çın məşhur və yolə həkimi əndişə və təfəkkuronvey mırəkkəb iyən de qıləy  məxsusə səpki nıvıştə və təlif kardey bıə.əv jıqo hisob kardedə ki,fəlsəfi barzə əndişəon bəpe çı nodonon ixtiyorədə ğərol doey nıbu ki,əvon çı botıni pokəti,solimə zevğ.barzə himmət iyən kifoyət ğədərədə huşiku məhrumin.çıro ki,jıqo fərdon deçəvon dərki həddiku bəpe bıə hikməti mutoliyə kardey beşək bə inhirofi səmt şıey bəzınyn və və həmçinin cokəson həm çı həxə royku bə zəlolət eğandey bəzıneyn.fransəvıjə muasirə filosof Hanri Korben çı Mirdamadi nıvıştey saxtəti dəlili,çəy ıştə deşmınon təkfir iyən təğibiku əmonədə mandeyro zıneydə ki, peşonə soronədə çəy şoqird Molla Sədra bəçəy fəlsəfi nəzəriyyəon xoto,təbid iyən ıştə kə-bəku dərbədər be….