Şiiə yolə alimon-76

Əllomə Feyz Kaşani bə tarifi loyığ qıləy əxloği barzə keyfiyyəton soyb be və çı şehrət iyən ğudrəti bə dast vardey dumo nıbe.əv botıni elmi iyən foydəninə təfəkkuri kəsb kardey bəsə coqlə koonsə tərcih və bəpeş qəte və de hukuməti yolon həmnişin və çəvon mehmon bıeyku bə diyəro mandedəbe.əv çı elmi nəvemon iyən nəfsani kəmolaton dumo beyədə bə ziyodə saxtətiyon tovış varde və dayima bəştə dıroz mıddətin iyən təkrorinə səfəon əzob-əziyyəton tov vardedəbe.əv ıştə nəzə və rayon miyono de vey oşko iyən şucoətinə formə əməl kardedəbe və çı riyokorəti iyən yaltağətiku bə diyəro mandedəbe.Molla Muhsin çoko ki,çı harcurnə dınyo pərəstəti iyən beəxloğətiku ıştə norozətiyon elon kardedəbe,de hışkə mazqon,bemənoə təəssıbon iyən ğeyri-alimonə hərəkəton həm mıxolifət kardedəbe və çı dınyopərəstə alimonku bə diyəro mandedəbe.əv bə Əhli-Beyt(ə)-I tabe be və qıləy holədə ki,əv qıləy məşhurə alim be, fəğət bə Əhli-Beyt(ə)-I məhəbbət nışon doey iyən bəvon pemandey boştə nəf iyən xeyri hisob kardedəbe…..

 Əllomə Feyz Kaşani bə həzrəte Məhdi(əc) qıləy nığılə məhəbbət və dığğətış hestebe.əy ”Bə Məhdi(əc) şovğ” nomo qıləy kitobış nıvıştə ki,çı Sahibul-Əmri(əc) həxədə qıləy məzmuninə şe`re.Feyz Kaşani çın kitobi mığəddəmədə jıqo nıvışteydə:”cıvonəti sıftədə İmom Zəmon(əc) iyən co Pokə İmomon(ə) məhəbbəti bəmı qıləy dıjdə şovğış doe ta həmonə Kərimə İmomi(əc) bıvindom və deəy mıloğatkom.bo ın vindemoni nə qıləy rom pəydu karde və nə çımı həni səbro-hovsələm mande.dılım hestebe deştə bə dıl nıştə şe`ron bə ə buzurquvarə şəxsi bıə çı firaği ğəm iyən vusali şovği deştə zumzuməkom ta çın ğəmiku tikəy oroməti pəydukom….

Əllomə Feyz Kaşani 6 qılə fərzəndış hestebe ki,çəvonku seqlə kinə və seqlə hə zoə fərzənd be ki,əvon həmmə ıştə zəmonə alim iyən pərhizkorə şəxsonku bıən.Feyz Kaşani yolə zoə Əllomə Muhəmməd Ələmulhuda qıləy fəğih iyən muhəddise ki,çəy nəsiliku omə alimon de tosə ısət həm Kaşan, Ğom,Tehron,Kermanşah iyən Şirazi şəhronədə de elmi koon məşğulin.çəy dıqlə co Nurulhuda və Muinuddin nomo zoon həm ıştə zəmonə yolə alim və şəxsiyyətonku bə hisob omən.çı şiyə alimon jimonədə səyfəonədə bəçəmə çəşi peqıniyə reçinə nuktə ıme ki,çəvon xıyzononədə jenon iyən kinon həm bənə merdon de elm,zıney iyən kəmoli koy məşğul bıən və bə barzə elmi məğamon rəsən.adətən əvon çokə alim və ustodon bıə əvon ıştən bə elmi barzə dərəcəon rəsey bədiqə de elmi tədris koy məşğul beydəbin və elmi məclison təşkil doydəbin. Əllomə Feyz Kaşani kinonku bə alimə iyən şayirə bıə Əliyyə Banu və həmçinin Hafizi-Ğıron iyən alim və pərhizkorə kinə bıə Umm Sələmə işorə kardey bəbe…..

Molla Muhsin Feyz Kaşani 84 sinnədə Kaşani şəhrədə ıştə dınyoş əvəz karde və ıştə jimoni zəmonədə hıryə və vəğf kardə qıləy ğəbıstonədə dəfn kardey be.əv de təvazukoronə formə vəsiyyətiş kardə be ki,çəy ğəbi səpe qıləy sayiban ya soğnə vırə iyən kum soxtey nıbu,əmmo ım məsələ çəy çı milləti palu bıə yolyətiku hiççiş bə kam nıkarde.ısət həm deməkə ki,çə komilə arif, fəğih iyən yolə alimi bəfotiku se sor dəvardə,əmmo ijən millət bəçəy yolə şəxsiyyəti hurmət noydən və de ehtıromi əy yod kardedən.joqo ki,Kaşani şəhri əhali har cımə ruji sıbi vaxti çın buzurquvarə şəxsiyyəti ğəbi ziyorət kardedən və boəy fatihə-xey handedən.Xıdolim ha! Şiyə ın yolə alimi de islomi əziz-qıramiyə peyğombəri(s) iyən deçəy məsum və pokə Əhli-Beyti(ə) həmnışinkə...