Şiiə yolə alimon-82

Əllomə Bəhrani hədis iyən rivayi kitobon tədvinədə qıləy dəğiğ iyən məxsusə şivə və metodış hestebe.əv bo həzrəte Əli(ə) iyən co məsumə imomon imoməti isbot kardero,çı əhlı-sınnəti rəvoyətonku istifodəş kardə və Hədisi-Mənzilətış de əhlı-sınnəti sa qıləsə veyə alimi roy vositə və deçəvon qırd sənəd və kitobon bə ico zikrış kardə.Mənziləti-Hədis  İslomi alimon nəzdədə qıləy məşhurə hədise ki,İslomi əzizə peyğombəri(s) bəvədə həzrət Əli(ə) bəştə nisbətədə bıə vırə və məğamış bənə Haruni bə Mosə(ə) mislədəy.illah ki,çə həzrəti bəpeştə həni co qıləy peyğombər nibome.şiəyon bın bovədən ki,dıqlə nıbuvvət və şəcərə cəhəto bıvətisə əlovə xısləton,Haruni(ə) bə Mosə(ə) coqlə mənziləton həm heste ki,Əli(ə) həm bə islomi peyğombəri(s) nibətədə bıəşe.min cumlə çə həzrəti itoəti vocib bıey,vəzir bıey iyən himoyə, məhbubiyyət və bəsə cokəsonsə barzə səviyyədə bıey……

Əllomə Bəhrani təlif karfdə kitobonku coqlə xıslətonku qıləyni bo qıləy hədisi ruşin kardero çandə qılə iborəonku oko doeye.həmçinin əv bə hədisi sənədon iyən nəğləkəyon qıləy məxsusə dığğətış hestebe və əvoni de dığğəti təhğığ kardedəbe.məsələn,ım yolə alim çı şeyx Tusi Əttəhzibi kitobış təhğığ kardeşe və  əxbari rical və sənəödə bıə ziyodə səhvonış mıəyyən karde. Iştə təhğıği nəticəş de  (tənbihatul-ərib fi ricalit-təhzib) nomi mıntəşirış karde.çqandə qılə yolə alim və tarıxəvonon jıqo hisob kardedən ki,şiyə torıxədə ğərəz Əllomə Məclisi jıqo qıləy dəğiğ təhğığ kardə alim mevcud bıəni.hətto kali vırədə min cumlə hədisi sənəd və səhih beyədə təhğığ kardey.qıləy imtiyozonış heste ki,ıştən-boştə çımi mislış ni…

Əllomə Bəhrani coqlə muhimmə əsəronku qıləyni ərəbi zıvono çəy bo Kərimə-Ğıroni nıvştə “Əlburhan fi təfsiril Ğuran” təfsiri kitobe ki,əyo Əhli-Beytiku(ə) rəsə ziyodə hədisonış vardə və ayəon təfsirədə okoş doə.Əllomə Bəhrani bənav Ğıroni təfsirədə jıqo qıləy şivə və metod nıbe. muəllif ıştə çın kitobi mığəddimədə ıştə  ın kitobi nıvıştey niyyəti barədə jıqo nıvışteydə : həmməkəs çı Ğıroni barzə şərəf iyən məğamiku vağifin və zıneydən ki,nicot və perəxey ro həm bəy təməssık iyən çanq jıeyədəy.çəy mənoon bəhs,təfəkkur iyən tilovət kardey,bə dılon jimoni boyis beydə və elm iyən bəy əməl kardey,çı saxtiyonku perəxey və xilos bıey boyis bəbe.bə məxfiyə sırron və həyğəton de addiyə ağli rəsey nibəbe.bəpe çı Ğıroni tənzil iyən təvili zikri əhliku ım elmi omuto.vindeme ki,alimon və mıfəssıron ğərəz ismətinə Əhli-Beyti(ə) bə cokəson nəzəon əsos dim qətəşone.qıləy holədə ki,bəpe Ğıroni həyğəton və sırron fameyədə dast bıkəşəmon və bə Əhli-Byet(ə) təfsir və təvili səmt dim bıqətəmon.bə həmonə dəlili xoto,İlahi kitobi sırron və təvilədə bo Əhli-Beyti(ə) təfsiri nəzəon bəyoni famey və dərk kardey xoto,təfsiri rəvoyəton cəm kardeme”……